Te mau faahoaraa pŭpŭ maitai roa‘e o te mau faahoaraa ïa tei opuahia, te ohie, e te moni ore e te arearea atoa ra. A imi i te mau rave‘a apî ; e oaoa te mau taata i te faaoaoaraa o te faaite mai i te rau o te mau ohipa e o te faati‘a ia ratou ia matau i te tahi atu mau taata a oaoa ai ratou. A ani i to outou mau metua, to outou mau hoa, aore râ to outou feia faatere no te feia apî no te mau mana‘o no ni‘a i te mau faahoaraa pŭpŭ. Teie noa te tahi mau mana‘o no te haamata:

• A rave i te hoê tere mata‘ita‘i i te fare hamaniraa monamona i to outou vahi nohoraa, te fare hamaniraa pata paari, aore râ te tahi atu mau vahi mata‘ita‘iraa.

• A faanaho i te hoê pô tamaaraa amui e a faataa i te mau taata ia afa‘i mai i te tahi mau maa tamaa aore râ te tahi mau maa amuamu.

• A haere e mata‘ita‘i i te hoê aua i reira outou e nehenehe ai e faaamu i te mau manu, a hahaere avae noa, a taora i te frisbee, a haere na ni‘a i te pereoo taataahi, aore râ a faafaaea.

• A haere e mata‘ita‘i i te hoê vahi faaiteiteraa i te mau tauhaa tahito, te hoê faaamuraa i‘a, aore râ te hoê vahi faaiteiteraa animara. A hi‘o i roto i te ve‘a aore râ i ni‘a i te Itenati no te mau titeti mâmâ aore râ tamoni ore.

• A faatupu i te hoê ohipa taviniraa. A para‘u i te pehu a te hoê taata tupu, a horoi i te mau haamaramarama, aore râ a tauturu i te tahi mea e ti‘a ia ravehia.

• Mai te mea te ora ra outou i roto i te hoê vahi e rave rahi te hiona i reira, a patu amui i te hoê taata hiona. Mai te mea te ora ra outou i tahatahi, a patu i te hoê fare one. Aore râ a patu i te mau fare one, e a faatupu i te hoê tatauraa o te haavâhia e te feia mata‘ita‘i.