Nahea ia horo‘a

E mahana no te tau veavea. Ua pohe to‘u metua vahine i te avatea. Ua ho‘i to‘u metua tane, to‘u taea‘e, e o vau nei i to matou utuafare mai te fare ma‘i mai, o matou ana‘e ra. Ua faaineine matou iho i te hoê amuamu e ua paraparau i te mau taata i haere mai. Te pô ra te mahana e te poiri atura e ua haamana‘o vau e aita â matou i faama atura i te mau mori.

U iriti o papa i te opani. O Tati Catherine e o Tonton Bill. Ua ite au e te tape‘a ra o Tonton Bill i te hoê mohina maa hotu (cerise). E nehenehe ta‘u e ite atu i te uteute rahi fatata roa i te vareau o te mau cerise e te tapo‘i piru anaana o te mohina. Ua parau oia, « e au roa outou i teie maa. Aita paha ta outou e maa rii hopea ».

Aita roa. Ua parahi matou e toru i te iri amuraa maa, ua taepu i te tahi mau cerise i roto i te au‘a, e ua amu e te horoi ra o Tonton Bill e o Tati Catherine i te mau farii maa.

E nehenehe ta‘u e parau, e toru tufaa e vai ra i roto i te horo‘araa e te fariiraa i te hoê ô rahi. Teie ïa, o te faahoho‘ahia e teie ô o te mau cerise.

Hoê, ua ite au e ua ite o Tonton Bill e Tati Catherine i te mea o ta‘u e ite ra. Ua ite raua e ua rohirohi roa matou no te faaineine i te tahi atu mau maa. Ua ite raua e horo‘a mai te hoê au‘a cerise, no te hoê noa taime iti, i te mana‘o au maitai no te hoê utuafare. Aita vau e haamana‘o nei i te au o te mau cerise tera râ te haamana‘o nei au e ua ite e ua maramarama te hoê taata i te mauiui o ta‘u e farii ra.

Te Piti, ua ite au e mea horo‘a noa te ô. Ua ite au e ua ma‘iti o Tonton Bill e Tati Catherine na roto i to raua iho hinaaro ia hopoi mai i te hoê ô. Ua faatupu te ô i te oaoa ia raua i to raua horo‘araa.

Te Toru, ua tupu te faatusiaraa. Ua ite au e ua tamohina o Tati Catherine i taua mau maa ra no to’na utuafare. Mea au roa na ratou te mau cerise. Ua faaere ra oia ia ratou i taua oaoa ra no te horo‘a mai ia‘u nei. E faatusiaraa te râ. Ua ite ra vau, mai reira mai, i teie tufaa faahiahia : No Tonton Bill e o Tati Catherine e mea rahi a‘e to raua oaoa e na‘u e amu i te cerise eiaha râ na raua.

E toru mea e vai nei i roto i te horo‘araa i te hoê ô rahi : E ite oe i te mea o ta te tahi ê e ite ra, e horo‘a hua o, e faariro oe i te tusia ei marôraa.

Ua horo‘a te Atua te Metua i Ta’na Tama‘iti, e ua horo‘a mai o Iesu Mesia ia tatou te Taraehara – te ô aore roa e itehia te hohonuraa e te faufaa hoi no tatou. Ua horo‘a hua noa o Iesu i Ta’na ô, no tatou paatoa na roto i to’na iho hinaaro. Te hoê o te mau tapa‘o papû no te hoê taata tei farii i te ô no te Taraehara a te Faaora o te hoê ïa hinaaro mau i te horo‘a.