Ta‘u nei moemoea faahiahia

I roto i te hoê ati purumu e rave rahi mau matahiti i ma‘iri a‘e nei, ua farii vau e rave rahi mau pepe, te mea ino roa o tei faahaere ia‘u i roto i te coma e toru ava‘e. Ua horo‘a te mau haamaitairaa o te Autahuaraa, e te patururaa a to‘u nei utuafare ia‘u te mea o ta te hoê o to‘u mau taote i pii « te hoê faaoraraa faahiahia roa ».

Ua haaparuparu râ te mau pepe i to‘u haamanaoraa poto noa, e eita vau e haamana‘o faahou i ta‘u moemoea. E mea pinepine vau i te ara e e mana‘o vau, « te moemoea ra vau », e i tera ihoa taime e mo‘e roa te moemoea mai roto atu i to‘u feruriraa.

Ahuru ma hitu matahiti i muri a‘e i taua ati ra, ua piihia vau ei episekopo no ta‘u paroita. I muri mai i roto i te hoê apooraa paroita, ua ani te peresideni Paraimere ia piihia te hoê tane e ta’na vahine faaipoipo no te haapii i te piha CLB. Ua hi‘o tonau tauturu e o vau nei ia matou iho ma te maere.

Te haere mai nei teie tuahine i te pureraa, eita râ i te mea pinepine, e ta’na tane aita roa oia i haere mai e rave rahi mau matahiti. Noa’tu ra te reira, ua ite matou paatoa e ti‘a ia ferurihia no ni‘a i te piiraa.

I te pô na mua a‘e e aparau ai au i teie na taata, ua tupu ia‘u te hoê moemoea maramarama maitai. Ua ara mai au i te po‘ipo‘i a‘e e ua haamana‘o vau i te taatoaraa o taua moemoea ra. No ni‘a ïa i te mea ta‘u e parau i roto i te uiuiraa ia ti‘a ia raua ia farii i te piiraa no te tavini.Ua maere roa vau i te neheneheraa ia‘u ia haamana‘o i ta‘u moemoea no te taime matamua i muri a‘e 17 matahiti te maoro, e hau roa atu â i te reira, ua haapuai e ua faanaanatae te mea i roto i te moemoea ia‘u nei.

Ua tii mai to‘u tauturu ia‘u i taua ahiahi ra. A tere ai maua i te vahi farereiraa, ua parau oia, « Bishop, e vaiho vau ia oe ia rave i te parauparauraa ». Te haamana‘o nei au e ua ataata vau no te mea ua ite au e ua faanaho te Fatu i te ohipa.

I roto i te uiuiraa ua faaite faahou vau i te moemoea ma te papû maitai, e ua farii raua i te piiraa. A ho‘i ai maua i te fare i te pô, ua parau mai to‘u tauturu, « ua ite au e ua haapiihia vau na te taata haapii aravihi ». Ua ataata faahou vau no te mea ua ite au e parau mau te reira – ua haapiihia maua toopiti atoa ra na te Fatu.

Ua haapa‘o maitai te tane e ta’na vahine i ta raua mau ohipa i roto i te Paraimere, e ua riro mai raua toopiti atoa ra ei melo itoito i roto i te paroita. Tau matahiti i muri iho ua taatihia raua i roto i te hiero.

Tae noa mai i teie mahana, teie ana‘e te moemoea o ta‘u i haamana‘o i roto i te roaraa matahiti e 28. Ua ite papû roa vau e ua ite to tatou Metua i te Ao ra i te taime tano no teie nau taata faaipoipo. Ei hopearaa no te reira ua faauru Oia i te Peresideni Paraimere e, no te hoê noa pô, ua haamaitai oia i te hoê tufaa o to‘u feruriraa, o tei fifi, ia ohipa maitai roa. Oia mau roa, ua ite au e te ti‘a nei te Fatu i te upoo o teie Ekalesia e « ta te Fatu mau rave‘a, e ti‘a ïa i te vairaa, e tupu â hoi, e ia tupu mau te mau mea atoa i parauhia mai e ana ra » (Moromona 8:22)