TE AHU E TE FAANEHENEHE
Te tere i te fare toa
A oomo i te ahu tano no te faaite i to outou faatura i te Atua e ia outou iho. Eiaha roa e faatopa i te faito o to outou huru ahu no te mau huru oro‘a atoa. Eiaha e faahuru ê ia outou na roto i te mau nana‘oraa e i te mau pati‘araa i ni‘a i te tino.
Te hoohoo ra to‘u mama e o vau nei a ite ai au i te hoê piritoti ereere tei hinaaro-mau-hia e au. Ua tamata vau i te oomo i te piritoti and ua haere mai au i rapae no te faaiteite i to‘u mama. Ua faaea rii oia hou a parau mai ai, « Becky, i to‘u manaoraa e mea poto rii te reira ». Ua pahono atu vau aita vau i mana‘o i te reira e ua haapapû atu vau ia’na e te oomo nei te mau tamahine i te fare haapiiraa i te hoê â huru piritoti – e mea poto roa’tu te tahi. Ua tamata vau e rave rahi mau minuti i te taparu ia’na ia au i te piritoti.
I te pae hopea ua parau ti‘a mai to‘u mama, « e mea poto roa. Eita taua e hoo i te reira. A haere e taui ». Aita vau i taa e no teaha oia i etaeta roa’i i ni‘a ia‘u, i te taime ihoa ra ua mana‘o vau e ua paari vau no te faaoti o vau iho eaha ta‘u e nehenehe e oomo. Ua ino roa ta maua nei tere hoohoo e ua ho‘i atu maua i te fare ma te paraparau ore.
I te pae hopea, ua parau mai to‘u mama : « Becky, te tumu aita vau i faati‘a ia oe ia hoo i te piritoti no te mea e ere i te mea nehenehe maitai i ni‘a iho ia oe. E mea poto roa te piritoti e aita te reira e faaite mai i to oe iho huru mau. E tamahine oe na te Atua ».
Ua haapii mai te tatararaa a to‘u mama ia‘u i te hoê haapiiraa e ore roa e mo‘ehia ia‘u. E tamahine au na te Atua, e te mau mea atoa ta‘u e rave e ta‘u e oomo e faaite mai ïa te reira eaha to‘u mana‘o no ni‘a ia‘u iho e to‘u mana‘o no to‘u Metua i te Ao ra e to‘u nei Faaora.
Ua riro te oomo raa i te ahu tano e aroraa tamau, ua mauruuru râ vau e aita vau i fati e i haafifi i ta‘u mau tumu parau. Ua ite au e mai te mea e taa maitai ia tatou e e tamarii tatou na te Atua, e upootia ïa tatou i ni‘a i to tatou mau hinaaro ia oomo i te ahu mai to te ao nei.