Te faaineineraa no te hoê misioni

E rave rahi mau matahiti i muri ae i to to‘u utufare bapetizo-raa-hia, e haere mai te mau misionare e tamaa i to matou utuafare i te mau mahana atoa. Ua haapii mai au i te here i te mau misionare, e ua hinaaro vau ia riro mai ratou ra te huru.

I te 11raa o to‘u matahiti, ua ani mai te episekopo ia‘u no te hoê farereiraa i roto i to’na piha toro‘a. Ua parau oia, « Ulisses, ua tae i te taime no te haamata i te faaineine ia oe no te haere i te misioni ». Ua maere roa vau no te mea e 11 anae tou matahiti ! Ua parau mai râ oia, « e faaineine taua i te reira i teie nei ».

Ua parau mai to‘u episekopo, « e uiui au ia oe i te tahi mau taime ia ite i to oe haereraa i mua ». I muri iho, ua horo‘a mai oia ia‘u te tahi mau arata‘iraa. Ua aparau oia ia‘u no ni‘a i te mau faaueraa, te autahuaraa, te vai ti‘amâ-noa-raa, e te parau ti‘a. Ua faahiahia roa vau no te mea ua hi‘o mai oia i roto i to‘u na mata e ua parau mai, « e tavini oe i te hoê misioni mai te mea e pee oe i te mau aratairaa o ta‘u e horo‘a atu nei ia oe ».

Ua haamana‘o noa vau i ta’na mau parau, ia farerei anae ihoa râ vau i te hoê tamataraa. Te hoê hi‘oraa, i te hoê taime ua horo‘a mai to‘u metua vahine te moni no te haere i te fare toa e hoo mai i te tahi mau maa hotu. Ua rahi ae te moni o ta te vahine hoo i faaho‘i mai i te moni o ta‘u i horo‘a atu ia’na no te aufau i te mau maa hotu. Ua haamata vau i te ho‘i i te fare, e i to‘u hohora raa i to‘u rima ua ite ihora vau e mea rahi ae ta‘u moni i teie nei.

Ua tamata o Satane i te parau uana ia‘u e e nehenehe ta‘u e tape‘a mai te moni na‘u iho. Ua feruri au, « te vai nei te moni o ta‘u e faaohipa e e faaho‘i atu vau i te moni toe ti‘a i to‘u metua vahine ra ». Tera râ ua feruri ihora vau, « aita, e ere te reira ta te episekopo i parau ia‘u. Ia riro ei misionare e ti‘a ia‘u ia vai parau-ti‘a noa ». Ua ite au i te Varua i taua taime ra e ua ho‘i atu vau i te fare toa no te faaho‘i i te moni. Ua tupu te mana‘o au maitai i roto i to‘u aau. Ua mana‘o ihora vau, « ua vai parau ti‘a vau, ua haapa‘o vau i te mau faaueraa, e te faaineine nei no ta‘u misioni. E riro vau i te hoê misionionare, e ua ti‘a ia‘u ia vai parau ti‘a noa ».

A haere ai au i te haapiiraa tuarua ua rave au i te ohipa no te haaputu i te moni no ta‘u misioni. Mea veve roa to‘u na metua e aita e nehenehe ia raua ia aufau i te mau mea atoa. Aita i rahi ta‘u moni, tera râ i muri ae i te aufauraa i te tufaa ahuru, ua faaoti au e hoo mai hoê ahu i te ava‘e hoê no ta‘u misioni. I te hoê ava‘e ua hoo mai au i te hoê ahu oomo, te hoê atu ava‘e hoê taamu arapoa, e i tahi atu â ava‘e hoê â ahu oomo. I roto i taua mau matahiti ra e toru, ua noaa ia‘u te moni no te hoo mai i te taatoaraa o te mau mea o ta‘u e hinaaro. Ua nehenehe ia‘u ia aufau no ta‘u misioni. Ua haapii mai au i te tumu parau no te haaputuraa i te moni. Ua haapii mai au i te tumu parau no te haapa‘oraa i te ture no te tufaa ahuru e te rahiraa o te mau haamaitairaa e fariihia ia aufau anae tatou i te tufaa ahuru.

Ua riro ta‘u misioni e ohipa rahi roa o tei tupu no te mea ua tauturu oia ia‘u ia taa maitai i te mau parau tumu o te oraraa e nahea ia faaohipa i te evanelia i roto i ta‘u mau ohipa i te mau mahana atoa.

E te mau tamaroa e te mau tamahine, a faaineine no te hoê misioni maitai e te hoê oraraa maitai. Te ti‘a’i nei te Fatu no te horo‘a mai i te mau haamaitairaa atoa o ta tatou e hinaaro.