Te mau tareta uiraa e te mau tareta No te Puai o te Feia Apî

Ua faaue to tatou Metua i te Ao ra i Ta’na mau tamarii ia haapa‘o maitai i to ratou mau tino. E ti‘a ia tatou ia amu i te maa maitai, ia faaetaeta tamau noa i te tino, e ia nava’i te taoto. Ia na reira anae tatou, e vai tiamâ noa ia tatou i te mau mea e haavî ia tatou . E noaa te mau haamaitairaa no te hoê tino maitai, te hoê feruriraa o te araara maitai e te arata‘iraa a te Varua Maitai.

E tuino te ava e te avaava i to tatou mau tino e mau varua. E haavî ratou ia tatou e e tuino i to tatou mau tino, e e haaparuparu i to tatou ite e te faatereraa ia tatou iho, e e haapoto te reira i to tatou mau oraraa. No te mea hoi e e te hinaaro nei tatou ia puai i te pae tino, i te pae feruriraa, e i te pae varua, eita ïa tatou e inu i te taofe aore râ te ti aore râ e faarahi i te rave i te raau taero aore râ te raau taero hamanihia e te taata.

Te faaite nei te hoê o na Ture ahuru e ore hoi Iehova e faati‘a ia’na i tei faahiti faufaa ore noa i to’na ra i‘oa, no reira e faaohipa noa tatou i te i‘oa o te Atua e o Iesu Mesia ma te tura e te faatura. Te parau e te hautiutiraa ino, e te faufau e tae noa’tu i te mau parau hauti hairiiri e peu ino ïa i te Atua e ia vetahi ê.

E faaite rahi mai ta outou huru paraparau e o vai ra outou. E faaite te parau mâ e te maramarama e te vai ra to outou feruriraa maramarama e te au maitai. E faaohipa tatou i te parau o te faaitoito e te haapoupou ia vetahi ê e ti‘a ai ia tatou ia haapa‘o i te faaueraa ia here te tahi i te tahi. E faaitoito tatou ia vetahi ê ia faaohipa i te parau mâ.

E mea faahiahia te mau hoaraa, e nehenehe râ te faatupu-oioi-raa i te hoaraa e aratai ti‘a’tu i te viivii, e taotia i te rahiraa o te tahi atu feia apî ta outou e farerei, e e faaere ia outou te mau mea e nehenehe e tauturu ia outou ia ite i te pae hopea te taata ta outou e faaipoipo atu. Aita te taatoaraa o te feia api i titauhia i te faahoa aore râ e hinaaro nei i te faahoa. E nehenehe e e ti‘a râ ia faatupu i te mau auraa maitai i te mau faito matahiti atoa.

Ia haamata ana‘e outou i te faahoa, a haere na roto i te mau pŭpŭ aore râ ta toopiti te mau faahoaraa e a opua i te mau faaoaoaraa maitai, e te mâmâ, e o te tauturu ia tatou ia haamatau maitai atu te tahi e te tahi. E ti‘a i te hoê feia apî tane e te hoê feia apî tamahine e faahoa ra ia tauturu te tahi e te tahi ia tape‘a i te mau faito tumu e ia paruru i to te tahi hanahana e to te tahi viivii ore.

Te ti‘aturi nei matou e o Iesu Mesia e tama‘iti Oia na te Atua e o Oia tei Hamani i te mau mea atoa. I to Iesu oraraa i ni‘a i te fenua nei, ua ora Oia i te hoê oraraa maitai roa e ua haapii oia na roto i te parau e te hioraa e nahea tatou ia ora amui i roto i te here. Te ti‘aturi nei matou e na roto i te tusia Taraehara a te Mesia, e nehenehe tatou e faaorahia i ta tatou mau hara mai te mea e pee tatou Ia’na.

I te mau hebedoma atoa i te pureraa a rave ai matou i te oro‘a, te faaapî nei matou i ta matou fafauraa ia haamana‘o noa Ia’na e ia haapa‘o i Ta’na mau faaueraa.

Te here nei matou ia Iesu Mesia. Te haamori nei matou ia Iesu Mesia. O Oia to Tatou Faaora e to Tatou Taraehara.