Faaroo no te tape‘a i te hoê pape pue

E mahana faatupuraa raau i Helsinki, Finland. Te anaana maite ra te mahana, e te tahe vitiviti noa ra te hiona. E maha hora to‘u raveraa i te ohipa i piha’i iho i ta‘u nau tamarii tamaroa, Juha e va‘u matahiti, Hannu e ono matahiti, no te tape‘a i te pape hiona ia tahe i roto i te tahua raro roa o to matou fare. Te vai paari noa ra â te faataheraa pape no te farii i te pape.

I te haere raa’tu ta‘u nei tane i te ohipa i taua po‘ipo‘i ra, ua parau mai oia ia haapa‘o maitaihia eiaha te pape ia tahe atu i roto i te tufaa i raro roa o te fare. Ua rohi tamau noa matou e tae noa’tu i te avatea i te taime no te haere i te pureraa paraimere. (I taua tau ra e faaterehia te Paraimere i te hoê mahana i roto i te hebedoma.) Ua parau atu vau i ta‘u nau tamaroa e eita raua e haere i te Paraimere no te mea e ti‘a roa ia tape‘ahia te pape ia tahe atu i roto. Hau atu i te reira, e ere ta‘u tane i te melo no te Ekalesia, e eita oia e taa i te faufaa rahi o te Paraimere no ta maua na tamaroa.

Toopiti atoa ra, ua faaite papû mai o Juha e Hannu ia‘u e mai te peu e haere matou i te Paraimere, e haapapû maitai to tatou Metua i te Ao ra e eita te pape e tae atu i roto i te fare.Ua hi‘o atu vau i na pae e piti, mai te vai haaputuraa pape e tae atu i te mata tei î i te faaroo o ta‘u na tamaroa. Te parau mai ra te hoê pae o vau iho e, « eita e ti‘a ia oe ia haere ê atu no te mea aore roa e puai no te tape‘a i te pape ia tahe atu i roto i te fare ». Ua taparu vau i to‘u Metua i te Ao ra na roto i te hoê pure i roto i to‘u aau. I muri iho, ua rave vau i te hoê faaotiraa fifi roa.

« E haere tatou i te Paraimere i teie nei ! » Parau atura vau ma te vaiho i te mau patete. Noa’tu eaha te tupu mai, eita vau e haafifi i te faaroo o ta‘u nau tamarii.

Ua au maitai te mau tamaroa i te Paraimere. I to matou ra tereraa no te ho‘i i te fare, ua rahi roa to‘u taia a piri noa’tu ai matou i te fare. I te tapaeraa, ua horo oioi atu te mau tamaroa i te opani o te tahua i raro. A hi‘o ai raua i raro, ua tuo maira, « e mama, eaha ta maua i parau ia oe ? » Ua haere oioi atu vau i reira. Eita roa e mo‘ehia ia‘u te mea o ta‘u i ite. Ua maro roa taua vahi ra mai te huru ra e ua tamarohia. Aita roa‘e e pape i te mau vahi atoa. Tae noa mai i teie nei, 40 matahiti i muri ae, e mea maere roa ia‘u te mea o ta‘u i ite.

Ua faaite mai te anaana e vai ra i roto i te mata o ta‘u nau tamaroa i te oaoa e te ti‘aturi i to tatou Metua i te Ao ra. Ua î atoa to‘u aau i te oaoa – e te mauruuru !

Aore roa e puai i roto i teie ao e nehenehe e upootia i ni‘a ae i te faaroo o te mau tamarii. Te faaite nei te mau papa‘iraa mo‘a e mai te mea e ti‘aturi tatou ma te feaa ore e nehenehe ia ta tatou e faanuu i te hoê mou‘a (a hi‘o mataio 17:20). I taua mahana ra ua tape‘a te faaroo o ta‘u nau tamarii i te hoê pape pu‘e.