Te tahi atu mau mana‘o tauturu no te taime faaanaanataeraa no atopa 2008

Teie te mau faahauraa mana‘o na te feia faatere o te Paraiemere o te nehenehe e faaohipahia i roto i te Taime Faaanaanataeraa tei nene‘ihia i roto i te Liahona o te ava‘e Atopa 2008. No te haapiiraa, te mau haamaramaramaraa e te mau ohiparaa e tano e teie mau mana‘o a hi‘o « E Riro Vau ei Tavini No’na » i te mau api F4 e F5 i te tuhaa na te mau tamarii i roto i teie ve‘a.

1. Hou te taime faaanaanataeraa, a rave mai i te mau hoho‘a o te Peresideniraa Matamua e o te Pŭpŭ no te Tino Ahuru Ma Piti Aposetolo. A tuu i te reira i ni‘a i te tabula ereere. A hamani i te hoê parauhuhu tei tapa‘ohia i to ratou mau i‘oa e a tuu te reira i te hiti o te tabula ereere.

   A haamata na roto i te uiraa i te mau tamarii ia faatu‘ati i te mau i‘oa o te Peresideniraa Matamua e o te Pŭpŭ no te Tino Ahuru Ma Piti Aposetolo e to ratou mau hoho‘a. A tauturu i te mau tamarii ia tuu i te mau hoho‘a tano na te haamataraa mai ia au i to ratou tau piiraa e to ratou paari.

   A ma‘iti mai roto mai i te amuiraa rahi i oti a‘e nei e aore râ, na roto i te tahi atu mau ve‘a Liahona, i te mau a‘oraa a te Peresideniraa Matamua e a te Pŭpŭ no te Tino Ahuru Ma Piti Aposetolo o tei faarotahi i ni‘a i te taviniraa. A faaite i teie mau parau poro‘i, e a aparau i te mau rave‘a o ta te mau tamarii e nehenehe e faaohipa i te mea o ta ratou i haapii mai no te tauturu ia ratou a tavini ai ia vetahi ê. A hi‘o i Te Parau Haapiiraa e te Mau Parau Fafau tuhaa 4:2 no te faahaamana‘o i te mau tamarii e tavini tatou ma to tatou aau atoa, ma te puai, ma te mana‘o e ma te itoito. A himene i te hoê himene no ni‘a i te mau peropheta. A faaite i te iteraa papu no ni‘a i te haamaitairaa no te mau peropheta, mau hi‘o e mau heheu parau, o tei haapii mai ia tatou na roto i ta ratou mau parau e to ratou mau hi‘oraa maitai e nahea ia tavini ia vetahi ê.

2. A papa‘i i te parau tumu o te evanelia o te hepetoma i ni‘a i te tabula ereere: « No te mea te tavini mai nei vetahi ê ia‘u, te hinaaro atoa nei au i te tavini ». A ani manihini i te mau tamarii ia himene i te mau himene no ni‘a i te Faaora, te mau peropheta, te mau utuafare, te mau hoa e te vai atura ă. A tabula i te feia tei faahitihia i roto i te himene i raro a‘e i te pereoda No te mea te tavini nei vetahi ê ia‘u.

   A hi‘o i Te Parau Haapiiraa e te Mau Parau Fafau tuhaa 4:2 e tuhaa 59:5. A tauturu i te mau tamarii ia imi i te mau parau aau, puai, mana‘o e itoito. A faaineine i te mau materia e tano na te mau tamarii no te faaoti i te tumu i te api F4.

   Ia oti te mau tumu, a ani manihini i te mau tamarii ia himene i te mau himene no te imi i te mau rave‘a o ta ratou e nehenehe e rave no te tavini. A himene i te mau himene no ni‘a i te taviniraa. A papa‘i i te mau pahonoraa o tei roaa ia ratou i roto i te mau himene i raro a‘e i te pereoda E hinaaro atoa vau i te tavini. A faaite i te iteraa papu no te mau haamaitairaa e roaa na roto i te taviniraa ia vetahi ê e mai roto mai i te feia o te tavini nei ia outou.