E nehenehe e o vau tera

I te hituraa o to‘u nei matahiti, ua faaea mai te hoê tamahine i roto i to‘u nei vahi nohoraa, e ua riro mai maua ei mau hoa. Ua au maua i te hoê â mau mea, e ua riro maua toopiti ei haamaitairaa no te tahi e te tahi. Ua rave maua i te mau ma‘itiraa maitai no te mea ua haapii mai to maua na metua ia maua ia ma‘iti na roto i te paari.

Area râ a tae atu ai maua i te piha hopea no te fare haapiiraa tuatahi, ua rave maua i te mau ma‘itiraa hape ia fariihia maua e to maua mau hoa e ta ratou mau peu ti‘a ore. I te matahiti i muri iho, ua faaoti au e ua ti‘a ia‘u ia taui i te mau hoa ia nehenehe ia‘u ia rave faahou i te mau ma‘itira ti‘a na roto i te oraraa i te mau ture teitei a‘e. Te hoê noa ra fifi o to‘u ïa hoa no te mea e hoa noa â maua, e aita vau e hinaaro i te faaea i te haere atu na muri ia’na.

E mea fifi roa te raveraa i te mea ua ti‘a ia‘u ia rave. Ua parauhia vau i roto i te taatoaraa o to‘u nei oraraa ia ma‘iti i te mau hoa maitai e ia faateitei i to‘u mau tumu faufaa. Aita râ to‘u e iteraa papû no teaha e mea faufaa rahi te reira, no reira ua ti‘a ia‘u ia ti‘aturi e e mea tano te reira. I te tau mahanahana e i roto i te piha va‘u, ua faaea maua i te haere apiti e ua ma‘iti maua i te mau haerea taaê.

Ua ite au i te mau haamaitairaa no teie nei faaotiraa te tahi taime i muri mai i taua ihoa matahiti ra. Ua faaoti to‘u mau hoa tahito i te afa‘i mai i te ava i te fare haapiiraa. Ua ani ratou i te tahi atu mau tamahine ia inu, e ua roohia ratou paatoa i te fifi. Ua ite au e o vau paha te hoê o taua mau tamahine ra. Ahani vau i pihaiho ia ratou, eita ïa vau e ite mai te mea e puai to‘u no te ti‘a atu no to‘u mau ti‘aturiraa.

Ia feruri ana‘e vau i te mau hopea ua ti‘a paha ia‘u ia faaruru, ua hepohepo roa vau. Ua matau paha ïa vau i te inu, ua fifi paha ïa vau e te ture, ua ere paha ïa vau i te ti‘aturiraa a to‘u na metua, e te hau atu i te mau mea atoa, ua ofati paha ïa vau i te ti‘aturi a to‘u Metua i te Ao ra ia‘u nei.

Ua ite au e te mea ta te peropheta i parau no ni‘a i te oraraa i te mau parau tumu teitei no to tatou ïa parururaa. Noa’tu e te faariro nei paha tatou i te oraraa i te mau parau tumu teitei mai te hoê mea au ore hia, na te reira râ e tauturu ia tatou i te pae varua, i te pae tino, i te pae feruriraa e na roto i te tahi atu mau rave‘a o te ore roa e itehia e tatou.