I hea vau e ti‘a ai ?

Ua ite a‘ena anei outou i taua mau Sabati ra e aita roa’tu outou e hinaaro i te haere i te fare pureraa. Ua tupu te reira ia‘u nei aita i maoro roa. No tae noa iho nei au i roto i te hoê paroita apî i Cape Town, Afirika Apatoa. E ere no te mea e ere te mau taata i roto i te paroita i te mea maitai aore râ i te mea hoa. E ere noa râ ratou to‘u mau hoa no to‘u vahi faaearaa.

I muri a‘e i ta‘u hebedoma matamua i roto i te paroita ua faaoti vau – mai teie atu taime e haere noa vau i te pureraa oro‘a. I te hebedoma i muri iho ua haere taere atu vau. A tomo ai au na roto i te uputa o te fare pureraa, ua fariihia mai au e te tahi mau taata e ua parahi ihora vau. A parahi ai au i reira, ua mihi au i to‘u utuafare. Te mea noa ta‘u i hinaaro o ta‘u ïa paroita tahito, te mau hoho‘a mata hoa tei matau ia‘u.

I muri iho ua ti‘a mai te taata a‘o matamua e ua haamata i ta’na ra a’oraa. E au ra te paraparau ti‘a maira oia ia‘u nei. Ua paraparau oia i to’na mana‘o moemoe i roto i te hoê oire apî, e ua ite ihora vau e e ere o vau ana‘e tei roto i te reira huru. I muri iho ua faaite mai te piti o te taata a’o i te tahi atu parau poro‘i faufaa rahi roa no‘u. Hou a faaoti ai te pureraa, ua ti‘a maira te episekopo e ua parau maira ia matou i to’na here rahi ia matou tata‘itahi. Ua parau oia e ua ite oia e te vai ra te mau taata o te ti‘aturi nei i ni‘a ia’na ia haapa‘ohia e ia atuatuhia ratou.

A himene ai au i te himene hopea, ua ite au e i ô nei au e ti‘a ai ia ti‘a mai. Aita vau i ite i taua huru hau ra e mea maoro i teie nei, e ua ite au e no ô mai te reira i to tatou Metua i te Ao ra. Ua ite Oia ia tatou tata‘itahi e i to tatou mau hinaaro. Ua horo‘a mai Oia i te mea i hinaarohia e au i taua mahana ra, e ua ite au e mai te mea e tamau noa vau i te ora i Ta’na ra mau faaueraa, e na reira noa â Oia .