I ROTO I TE MAU PARAU APÎ

I roto noa hoê ava‘e, ua faaite te Peresideni Thomas S. Monson i te paturaa o na hiero apî e toru i Arizona, i te mau Hau Amui no Marite. Te faaiteraa apî roa ua tae mai ïa i te 24 no Me 2008, i reira to te peropheta faaiteraa e te opuahia nei i te patu i te hoê hiero i Phoenix.

I te 28 no Eperera ua faaite oia e e patuhia na hiero apî i roto i na Afaa no Gilbert e no Gila, i Arizona.

« E mea mure ore te mau haamaitairaa o te hiero », te parau ïa a te Peresideni Monson i roto i te hoê rata i te mau melo. « Te feia o te haere mai i roto i teie nei fare mo‘a, e farii ïa i te here o te Atua no Ta’na mau tamarii e riro ïa ratou i te ite i te hoê atu maramaramaraa o to ratou iho tumu hanahana ei mau tamarii tamaroa e tamahine Na’na ».

E roaahia ïa te rahiraa o te mau hiero apî i Arizona e pae, na te reira e faaiti mai i te mau titauraa rahi i roto i te mau hiero o te tĭtĭ i Mesa e i Snowflake.

Patuhia i te matahiti 1927, e mea rahi roa te mau melo e haere nei i te Hiero no Arizona i te tahi noa’tu hiero i roto i te ao nei e i rapae i Utaha, te taviniraa i te mau melo no na tĭtĭ e 74, ia au i te faaiteraa a te Aupŭpŭ o te Hiero o te Ekalesia.

Aita ă e tai‘o mahana i faataahia no te hamaniraa i teie nei na hiero apî e toru, e roaahia ïa 140 hiero e faaohipahia nei e aore râ, i opuahia i te ao atoa nei.

I te hepetoma no te haamo‘araa o te Hiero no Curitiba i Paratira, ua putu mai tauasini mau melo no te faaroo i te Peresideni Thomas S. Monson i te tahi mau vahi i te pae apatoa e i te pae ropu no Paratira.

Apeehia e Elder Russell M. Nelson no te Pŭpŭ no te Tino Ahuru Ma Piti Aposetolo e o Elder Charles Didier no te Hitu Ahuru, ua haamo‘a te Peresideni Monson i te hiero no Curitiba i roto i na tuhaa pureraa e maha i te Sabati 1 no Tiunu 2008.

I te aru‘i na mua noa mai, ua putuputu tauasini mau melo i te tahua tu‘aro no te hoê faahanahanaraa ohipa iho tumu o ta te peropheta i haere atu.

Te hiero o Curitiba o te paeraa ïa o te hiero i Paratira, e ua roaahia ïa hoê milioni mau melo i reira. Ua hau i te 42.000 taata tei haere mai e mata‘ita‘i i te hiero i te taime no te opani iriti. Ua opuahia te onoraa o te hiero i Manaus.

I te Monire 2 no Tiunu, ua tere atu te Peresideni Monson i Brasilia i Paratira, no te farerei i te mono peresideni o Jose Alancar. Apeehia e Elder Nelson e Elder Didier, ua pûpû te Peresideni Monson na Alancar Tane hoê tii iti no te utuafare e te hoê hoho‘a no te « Te Utuafare: E Poro‘i i to te Ao nei » (Liahona, Atopa 2004, api 49).

I muri mai, ua amui atu Elder Nelson e ta’na vahine Wendy i te Peresideni Monson no te paraparau atu i na melo e 8.000 i roto i te hoê pureraa pô utuafare na te mau tĭtĭ e rave-rahi.

Na roto i te aueueraa fenua rahi tei tupu i te mataeinaa Tinito no Sichuan i te ava‘e Me nei, ua tere hau i te 600 melo no te Ekalesia na Hong Kong atu i te fare hamaniraa tauihaa no Shenzhen i te fenua Tinito no te faaineine 10.000 pute tauturu rû no te feia ati.

I roto i te hoê pute tauturu rû, te vaira te mau faraoa paapaa, te ŭ puehu, te punu i‘o, te tihopu, te pu‘a, te poromu e te pu‘a niho, te mau tauera, te hoê ahu faarari, te hoê tapo‘ipo‘i, e te hoê mohina pape.

Ua faanahonaho te pŭpŭ Tauturu Aroha o te Ekalesia, te hoê rima tauturu hui-raatira a te Ekalesia i te hoê fâ, o te hoê ïa tuhaa tauturu i te feia ati i roto i te aueueraa fenua. I roto i teie nei tauturu, te vaira 5.000 fare ‘ie e e 4.000 pute ta‘otoraa e te pe‘ue.

Ei faahauraa i te mau tauturu, ua horo‘a te pŭpŭ Tauturu Aroha a te Ekalesia i te hoê parau moni i te feia o te hau e i te Tatau-Uru no Shenzhen. No roto mai teie nei tuhaa moni i te mau melo no te Ekalesia i Hong Kong e i te ao atoa nei.

Ua faataa Bruce Lai, te hoê taata faatere ohipa e e melo no te Ekalesia i ta’na fare hamaniraa i Shenzhen no teie nei ohipa i tupu.

Ua opere te Amuiraa Aroha no Taina i te mau tauihaa i te mau oire i roto i te area no te aueueraa fenua.

Ua farerei te Peresideni Dieter F. Uchtdorf, Tauturu Piti i roto i te Peresideniraa Matamua, i te mau melo o te Ekalesia e te mau hoa i roto i te hoê tere faaati i Peretane, i Heremani e i Farani i te hopea no Me e i te omuaraa no Tiuni 2008.

Ma te faahiti i te mau aamu no Heremani e no Farani, ua parau oia i te mau taata o Paris o tei putuputu mai i Versailles e « noa’tu e ua tupu na e rave rahi mau tama‘i i rotopu i teie nei na fenua e piti, ua riro râ tatou i teie nei ei mau hoa e ei mau taata tapiri maitai. E mana rahi to te evanelia a Iesu Mesia no te faariro ia tatou paato‘a ei mau feia maitata‘i ma te ma‘iti-ore i te hau e i te û ».

Ua parau faahou oia e: « Ua amui-tahihia tatou e, e mau taea‘e e e mau tuahine ana‘e tatou. Ua riro te evanelia ei pahonoraa i te mau titauraa i roto i te ao nei, i te mau uiraa atoa o ta te mau utuafare, ta te mau oire e ta te mau nunaa e faaruru nei ».

Ua riro te Peresideni Uchtdorf ei melo no te Ekalesia i to’na vai tamarii-roa-raa. Ua piihia oia ei Tauturu i roto i te Peresideniraa Matamua i te ava‘e Febuare no teie matahiti.