No te Puai o te Feia Api

A ma‘iti i te parau-ti‘a e te oaoa, noa’tu eaha te huru o to outou oraraa. A rave i te hopoia no te mau ma‘itiraa ta outou e rave. A faarahi i to outou mau aravihi e to outou mau taleni, e a faaohipa i te reira no te rave i te ohipa maitai. A ape i te faaea-noa-raa e a hinaaro i te rave puai i te ohipa.

Ia vai mai te hoê varua mauruuru i roto i te mau mea atoa ta outou e rave e ta outou e parau. A haamauruuru i te Atua no ta outou mau haamaitairaa, e a faaite i to outou mauruuru ia vetahi ê o te tauturu nei ia outou.

A faaineine ia riro ei faaururaa no te maitai i roto i te ao nei. A titau i te hoê haapiiraa, e ia riro e taata anaanatae i te haapiiraa. A haere i te haapiiraa evanelia.

A rave i ta outou tuhaa no te paturaa i te hoê utuafare oaoa. A faatura i to outou mau metua, e a haapuai i to outou mau auraa e to outou mau taea‘e e to outou mau tuahine.

A ma‘iti i te mau hoa o te farii i to outou mau tumu faufaa teitei. A hamani maitai e a faatura i te mau taata atoa. A ani i te mau hoa no te tahi atu mau haapa‘oraa i te mau faaoaoaraa a te Ekalesia. A haere atu e farerei i te mau taata faafariu-apî-hia e te mau taata itoito rii..

A oomo i te ahu tano no te faaite i to outou faatura i te Atua e ia outou iho. Eiaha roa e faatopa i te faito o to outou huru ahu no te mau huru oro‘a atoa. Eiaha e faahuru ê ia outou na roto i te mau nanaoraa e i te mau pat‘araa i ni‘a i te tino.

A ma‘iti i te mau faaoaoaraa o te faateitei. A ape i te mau mea ino atoa, te faufau, te viivii, te hauti puai, aore râ te hoho‘a faufaui. A faaoti i te haapa‘o i te mau faito ture a te Atua.

A faaroo i te pehe o te tauturu ia outou ia piri atu i to tatou Metua i te Ao ra. Eiaha e faaroo i te pehe o te faaitoito i te viivii, o te faahanahana i te puai, aore râ o te faaohipa i te parau ino. Ia ori ana‘e, a ape i te faaû i te tino aore râ te tahi mau hautiraa ti‘a ore o te tino.

A parau i te mau parau o te faateitei, o te faaitoito e o te faafaahiahia ia vetahi ê. A faaohipa i te i‘oa o te Atua e o Iesu Mesia ma te tura e te faatura. Eiaha e parau i te mau parau faufau, te mau parau ino, aore râ te mau parau e te mau peu faufau.

Eiaha e faatupu i te faahoaraa e tae noa’tu e ua rae‘ahia to outou matahiti 16. A faahoa atu i te feia ana‘e e mau ture tumu teitei ta ratou. Ia haamata ana‘e outou i te faahoa, a haere na roto i te mau pŭpŭ aore râ ta toopiti te mau faahoaraa. A faanaho i te mau faaoaoaraa o te tauturu ia outou ia vai piri noa i te Varua o te Fatu.

A tape‘a mâ noa ia outou i te pae morare. Eiaha e rave i te hara o te viivii na mua a‘e i te faaipoiporaa. Eiaha e tomo atu i roto i te mau paraparauraa aore râ te mau faaoaoaraa o te faatupu i te hiaai puai. Eiaha e tomo atu i roto i te mau ohipa taotoraa te tane i te tane e te vahine i te vahine. A imi i te tautururaa mai te mea ua roohia outou i te maferahia, i te taotohia e te hoê metua, aore râ i te tahi atu mau ohipa haamani-ino-raa.

Na roto i te taraehara a te Faaora, e roaa‘i ia outou te faaoreraa hara e ia tamâhia i ta outou mau hara ia tatarahapa outou. A fa‘i i ta outou mau hara i te Fatu e i te feia atoa ta outou i hamani ino. Mai te mea e mau hara teiaha, e ti‘a atoa ia outou ia haere e faaite i te reira i to outou episekopo.

Ia vai parau-ti‘a noa outou ia outou iho, ia vetahi ê, e i te Fatu. Eiaha e faati‘a ia outou na roto i te parauraa e, e mea maitai te parau-ti‘a ore.

A faaohipa i te sabati no te haamori i te Fatu, ia haere i te pureraa, ia haafatata’tu ia outou i to outou utuafare, e ia tauturu ia vetahi ê. Eiahe e imi i te faaoaoaraa aore râ te haamau‘araa i te moni i te sabati. Mai te mea e nehenehe, eiaha e rave i te ohipa i te sabati.

A aufau i te hoê tufaa ahuru ti‘a ma te aau tae. A haere i te faaafaroraa no te tufaa ahuru. A haapa‘o i te ture no te haapaeraa maa.

A haapa‘o i te ture no te parau paari. A amu i te maa maitai, a faaetaeta tamau i te tino, e ia nava’i te taoto. Eiaha e faaohipa i te mau raau taero, te ava, te taofe, te ti, aore râ te mau avaava. Eiaha e faaohipa rahi i te mau parau raau a te taote aore râ te mau raau rapaau e hoo-noa-hia ra.

A tavini ia vetahi ê i roto i ta outou mau piiraa i roto i te Ekalesia e i roto i to outou utuafare, fare haapiiraa e to outou oire. A imi i te mau mahana atoa te arata‘iraa a te Varua Mo‘a no te ite o vai ta outou e tavini e nahea te tauturu i te pahono i ta ratou ra mau hinaaro.

Ia vai parau-ti‘a noa i te Fatu e i Ta’na ra Ekalesia. A pure tamau i ta outou iho mau pure e a tai‘o i te mau papa‘iraa mo‘a. A tape‘a i ta outou mau fafauraa e a faaroo i te mau parau riirii a te Varua. E tauturu ïa te Fatu ia outou ia faaû i ta outou mau tamataraa e ta outou mau titauraa.