12-р бүлэг
Бенжамин хаан
Бенжамин хаан нас өндөр болж мөн хүмүүстээ хандан ярихыг хүсэж байлаа. Түүний хүү Мозая дараагийн хаан болно гэдгийг тэр тэдэнд хэлэх хэрэгтэй байв.
Газар газраас хүмүүс ирж, ариун сүмийн ойролцоо цугларцгаав. Тэд майхныхаа амыг ариун сүм рүү харуулан босгов.
Бенжамин хаан нифайчуудад дуу хоолойгоо хүргэхийн тулд цамхаг дээрээс ярьсан.
Тэр тэдэнд үйлчлэхийг их хичээсэн гэдгээ хэлэв. Тэр бусдад үйлчилснээр Бурханд үйлчилдэг гэж хэлсэн.
Бенжамин хаан хүмүүст Бурханы зарлигуудыг дага гэж хэлэв. Зарлигуудыг итгэлтэй дагадаг хүмүүс аз жаргалтай байж, хэзээ нэгэн өдөр Бурхантай хамт амьдрах болно гэж тэр хэлсэн.
Бенжамин хаан Есүс Христ удахгүй дэлхийд мэндэлнэ мөн Түүний эхийг Мариа гэх болно гэж хэлэв.
Есүс гайхамшгуудыг үзүүлэх болно. Тэр өвчтөнийг эдгээж, нас барагсдыг амилуулах болно. Тэр сохор нэгнийг хараатай болгож, дүлий нэгнийг сонсголтой болгоно.
Есүс бүх хүний нүглийн төлөө зовж шаналан, үхэх болно. Нүглээ наманчилдаг, Есүст итгэдэг хүмүүс нүглээсээ өршөөгдөх болно.
Гэм нүгэлтэй хүмүүс Есүсийг ташуурдаж, тэгээд цовдлох болно гэж Бенжамин хаан нифайчуудад хэлсэн.
Гурван өдрийн дараа Тэр амилуулагдах болно.
Хаан Бенжаминыг ярьж дуусахад нифайчууд бүгд газарт сөхрөн унав. Тэд хийсэн нүгэлдээ харамсан, наманчлахыг хүсжээ.
Хүмүүс Есүс Христэд итгэж байсан бөгөөд өршөөл хүртэхийн тулд залбирцгаав.
Ариун Сүнс тэдний зүрх сэтгэлийг дүүргэв. Бурхан өөрсдийг нь өршөөсөн бөгөөд өөрсдөд нь хайртай гэдгийг тэд мэдсэн. Тэд амар амгалан, баяр баяслыг мэдрэв.
Бенжамин хаан ард түмэндээ Бурханд итгэ хэмээн хэлэв. Бурхан бүх зүйлийг бүтээсэн бөгөөд ухаалаг, хүчирхэг гэдгийг тэр тэдэнд мэдүүлэхийг хүсэж байлаа.
Бенжамин хаан хүмүүст даруу байж, өдөр бүр залбир хэмээн хэлэв. Тэр ард түмнээсээ Бурханыг үргэлж санаж, итгэлтэй байгаасай гэж хүсэж байлаа.
Тэр эцэг эхчүүдэд муудалцаж, маргахыг үр хүүхдүүддээ бүү зөвшөөр гэж захив.
Тэр дуулгавартай байхыг мөн нэг нэгнээ хайрлаж, үйлчлэхийг үр хүүхдүүддээ заа гэж тэдэнд хэлэв.
Тэрээр хэлж, хийж, бодож байгаа зүйлдээ хянамгай хандахыг хүмүүст сэрэмжлүүлсэн. Тэд үлдсэн амьдралынхаа туршид итгэлтэй байж, зарлигуудыг дагах ёстой байв.
Бенжамин хаан хүмүүсээс өөрийнх нь заасан зүйлст итгэж байгаа эсэхийг асуув. Тэд бүгд тийм гэж хэлсэн. Ариун Сүнс тэднийг өөрчилсөн бөгөөд тэд цаашид нүгэл үйлдэхийг хүсэхгүй байв.
Тэд бүгд Бурханы зарлигуудыг дагана хэмээн амлаж, гэрээ байгууллаа. Хаан Бенжамин сэтгэл хангалуун байв.
Хаан Бенжамин өөрийн хүү Мозаяд шинэ хаан болох эрхийг олгов. Хаан Бенжамин үүнээс хойш гурван жилийн дараа нас баржээ.
Мозая зөв шударга хаан байв. Тэр аавынхаа адил шаргуу хөдөлмөрлөж, ард түмэндээ үйлчилдэг байв.