47-р бүлэг
Есүс Христ шавь нараа адисалсан нь
Шавь нар нь түүнээс Сүмийг юу гэж нэрлэхийг асуув. Энэ нь Өөрийнх нь Сүм учраас Өөрийнх нь нэрээр нэрлэгдэх ёстой гэж Есүс хэлжээ.
Есүс шавь нартаа Тэнгэрлэг Эцэг Өөрийг нь бүх хүний төлөө амиа өргөх зорилгоор дэлхий рүү илгээсэн юм гэж хэлэв.
Наманчилж, Өөрийнх нь нэрээр баптисм хүртэж, зарлигуудыг нь дуулгавартай дагадаг хүн бүр Тэнгэрлэг Эцэгийн өмнө гэм буруугүй байх болно гэж Тэр хэлэв.
Аврагч шавь нартаа өөрийнх нь хийж байхыг харсан бүх зүйлийг хий хэмээн хэлэв. Тэр тэдэнд үлгэр жишээ үзүүлсэн билээ.
Тэр мөн тэдэнд үзсэн сонссон зүйлээ бичиж тэмдэглэснээр бусад нь үүний тухай мэдэж авах болно гэжээ.
Есүс шавь нараасаа өөрөөс нь юу хүсэж байгааг асуулаа. Тэдний ес нь дэлхий дээрх амьдралынхаа дараа Түүнтэй цуг амьдрахыг хүсэж байсан.
Есүс тэдэнд 72 настайдаа Өөр рүү нь тэнгэрт очих болно гэж амлав.
Бусад гурван шавь хүсэж буй зүйлээ зориглон гуйгаагүй боловч Есүс мэдэж байлаа. Тэд Есүсийг дахин иртэл дэлхий дээр үлдэж, сайн мэдээг заагаасай гэж хүсэж байлаа.
Тэд ямар нэгэн өвчин тусах, шаналах, үхэхийн алийг нь ч үзэхгүй гэж Аврагч тэдэнд амлажээ. Тэд Түүнийг эргэж иртэл сайн мэдээг заах болно.
Есүс дэлхий дээр үлдэх гурван шавиасаа бусдад нь гараа хүргэв. Тэгээд тэр явлаа.
Гурван шавь тэнгэрт аваачигдан, тэнд олон гайхамшигт зүйлийг үзэж, сонсов. Тэд Бурханы зүйлүүдийг илүү сайн ойлгож авчээ.
Тэдний бие махбод өөрчлөгдсөнөөс тэд үхэхээргүй болов.
Гурван шавь дэлхийд эргэж ирэн, номлож, баптисм хүртээж эхлэв.
Ёс бус нифайчууд гурван шавийг шоронд хийж, гүнзгий нүх рүү шидсэн боловч Бурханы хүч чадал тэдэнд оргоход нь туслав.
Тэднийг зууханд мөн зэрлэг амьтдын үүрэнд хийсэн ч тэднийг мөн л Бурханы хүч чадал хамгаалж байлаа.
Гурван шавь Есүс Христийн сайн мэдээг нифайчуудад үргэлжлүүлэн номлов. Тэд одоо ч түүний сайн мэдээг номлосоор байгаа.