31-р бүлэг
Ахмад Моронай Зарахемнаг дийлсэн нь
Нифайчууд газар нутгаа хадгалж, гэр бүлийнхнээ эрх чөлөөтэй байлгахыг хүсэж байв. Тэд мөн Бурханд бишрэл хүндэтгэлээ үзүүлэхдээ ч эрх чөлөөтэй байхыг хүсэж байлаа.
Ахмад Моронай нифайчуудын их цэргийн ахмад байсан. Леменчүүдийг байлдахаар ирэхэд Моронай тэднийг цэргүүдийнхээ хамт Жершоны нутагт угтав.
Ахмад Моронай их цэргээ зэр зэвсэг, бамбай, зузаан хувцас, хуяг дуулгаар хангаж бэлтгэсэн байв.
Леменчүүдийн цэргүүд тоогоор илүү байсан ч нифайчуудын хуяг дуулгыг хараад айжээ. Леменчүүд маш бага хувцас өмссөн байлаа.
Леменчүүдийн цэрэг Ахмад Моронайн их цэрэгтэй байлдаж зүрхэлсэнгүй. Леменчүүд аглаг буйд руу зугтан, нифайчуудын өөр нэг хот руу довтлохоор шийджээ.
Моронай леменчүүдийг тандуулахаар тагнуулууд илгээв. Тэр мөн Их Эзэнээс тусламж хүсэн залбирахыг Алмагаас хүссэн. Их Эзэн Алмад леменчүүдийг хаашаа довтлох гэж байгааг хэлэв.
Моронай Алмагийн мэдээг хүлээн аваад, хэсэг цэргийг Жершоныг мануулахаар үлдээж, үлдсэн цэргүүдтэй хамт леменчүүдийг угтахаар жагсан явав.
Ахмад Моронайн цэргүүд леменчүүдийн цэргүүдийг отож, Сидон голын хоёр талаар нуугдав.
Тулалдаан эхэлж, леменчүүд гол гатлан зугтахыг оролдсон боловч голын нөгөө талд илүү олон нифайчууд тэднийг хүлээж байлаа.
Урьд урьдынхаас ширүүн байлдсан Зарахемна ба түүний цэргүүд олон нифайчуудыг алав. Нифайчууд Их Эзэнээс тусламж гуйн залбирч байв.
Их Эзэн нифайчуудын цэргүүдийг хүчирхэг болгосон. Цэргүүд нь леменчүүдийг бүслэхэд Моронай байлдааныг зогсоохыг тушаав.
Моронай, нифайчууд леменчүүдийг алахыг мөн боолоо болгохыг хүсэхгүй байна гэдгийг Зарахемнад хэлэв.
Есүс Христэд итгэх нифайчуудын итгэлийг леменчүүд устгаж чадахгүй гэж Моронай хэлэв. Нифайчуудыг итгэлтэй хэвээрээ байгаа цагт Бурхан тусалсаар байх болно гэж тэр хэлжээ.
Моронай Зарахемнад зэвсгээ хураалгахыг тушаав. Леменчүүд нифайчуудын эсрэг дахин хэзээ ч байлдахгүй гэдгээ амлавал тэднийг алахгүй гэв.
Зарахемна Моронайд зэвсгээ хураалгасан боловч байлдахгүй гэж амласангүй. Моронай өөрсдийгөө хамгаал гэж зэвсгийг нь леменчүүдэд буцааж өгөв.
Зарахемна Моронайг алахаар ухасхийсэн ч нифайчуудын нэг цэрэг Зарахемнагийн сэлмийг цохиж хугалав.
Дараа нь уг цэрэг Зарахемнагийн хуйхыг авч, сэлэмнийхээ үзүүрт өлгөөд, дээш өргөв.
Леменчүүд зэвсгээ хураалган, дахин хэзээ ч байлдахгүй гэж амлахгүй л бол хуйхаа авахуулсны адил газарт унах болно гэдгийг хэлэв.
Олон лемен хүн зэвсгээ Моронайн хөлд тавьж, дахин байлдахгүй гэдгээ амлав. Тэднийг суллан явуулахыг зөвшөөрчээ.
Ихэд хилэгнэсэн Зарахемна үлдсэн цэргүүдээ байлдаанд уриалан дуудав. Моронайн цэргүүд тэдний олныг алав.
Өөрийг нь бас бүх цэргийг нь алах гэж байгааг хараад Зарахемна амийг нь өршөөхийг Моронайгаас гуйв. Тэр нифайчуудтай дахин хэзээ ч байлдахгүй гэж амлав.
Моронай байлдааныг зогсоож, леменчүүдийн зэвсгийг хураав. Дахин байлдахгүй гэж амласных нь дараа леменчүүдийг явуулав.