18-р бүлэг
Залуу Алма наманчилсан нь
Хаан Мозая Алмаг Зарахемла дахь Сүмийн удирдагч болгов. Дараа нь Алма нифайчуудад заахад өөрт нь туслах эрчүүдийг сонгон авсан.
Алма, хаан Мозая хоёр итгэлгүй хүмүүс Сүмийн гишүүдийг итгэлийнх нь улмаас зовоож байгаад санаа нь зовж байлаа.
Алмад Алма хэмээх хүү байв. Залуу Алма эцгийнхээ заасан зүйлст итгэдэггүй, ёс бус нэгэн болжээ.
Залуу Алма хаан Мозаягийн дөрвөн хүүтэй нийлж, Сүмийн эсрэг босов. Тэд олон хүнийг Сүмээ орхиж, ёс бус болоход ятгасан.
Алма хүүгээ үнэнийг мэдэж, наманчлаасай гэж залбирав.
Залуу Алма болон хаан Мозаягийн хөвгүүд Сүмийг устгахыг тасралтгүй оролдож байлаа.
Нэгэн өдөр тэдэнд тэнгэр элч үзэгдэв. Тэнгэр элч газар доргим чанга дуугаар тэдэнтэй ярив.
Уг таван залуу маш их айснаас газарт унав. Анхандаа тэд тэнгэр элчийн юу гэж хэлж байгааг ойлгосонгүй.
Тэнгэр элч Сүмийн гишүүдийн залбирлын хариуд иржээ. Тэнгэр элч Залуу Алмагаас яагаад Сүмийн эсрэг босож байгааг нь асуув.
Тэнгэр элч Сүмийг устгахыг оролдохоо зогсоо хэмээн Алмад хэлэхэд газар доргив.
Залуу Алма болон Мозаягийн хөвгүүд дахин газарт унав. Тэд тэнгэр элчийг харсан бөгөөд Бурханы хүч чадал газрыг доргиосон гэдгийг мэдэж байлаа.
Залуу Алма ихэд цочирдсон тул ярьж ч чадахгүй байлаа. Тэр маш сул дорой болсноос гараа ч хөдөлгөж чадахгүй байв.
Мозаягийн хөвгүүд залуу Алмаг өргөн, аав дээр нь аваачиж, юу тохиолдсон тухай ярив.
Алма баяртай байв. Бурхан түүний залбиралд хариулсан гэдгийг тэр мэдэж байлаа.
Их Эзэн өөрийнх нь хүүд болон Мозаягийн хөвгүүдэд юу учруулсныг харуулахын тулд Алма олон хүн цуглуулав.
Алма Сүмийн бусад удирдагчийн хамт мацаг барин залбирч, Бурханаас Залуу Алмаг дахин хүч тэнхээтэй болгоход туслахыг гуйв.
Хоёр өдөр, хоёр шөнийн дараа залуу Алма ярьж, хөдөлж чаддаг болов.
Тэр нүглээ наманчилсан учраас Бурхан өөрийг нь өршөөсөн тухай хүмүүст хэлэв.
Бурханы хаант улсад орохын тулд хүн бүр зөв шударга байх ёстой гэдгийг тэр хүмүүст заав. Тэр мөн нүглээсээ болж өөрийн туулсан асар их зовлон шаналлын талаар хэлэв.
Залуу Алма нүглээ наманчилж, Бурхан түүнийг өршөөсөн учраас баяртай байлаа. Бурхан өөрт нь хайртай гэдгийг тэр мэдэж байв.
Залуу Алма ба хаан Мозаягийн хөвгүүд үзсэн сонссоноо хүн бүрд ярьж, газар нутаг даяар үнэнийг зааж эхлэв.
Тэд хийсэн буруу зүйлээ засаж залруулахыг хичээж байлаа. Тэд хүмүүст судрыг тайлбарлан өгч, Есүс Христийн тухай заав.
Залуу Алма болон Мозаягийн хөвгүүдийг сайн мэдээ зааж байхад Бурхан адислав. Олон хүн тэднийг сонсож итгэжээ.