27-р бүлэг
Корихор
Корихор гэдэг нэгэн эр Зарахемлад ирэв. Тэр Есүс Христэд итгэдэггүй байсан бөгөөд бошиглогчдын хэлсэн Аврагчийн тухай үгийг худлаа гэж номлодог байжээ.
Есүс дэлхий дээр ирж, тэдний нүглийн төлөө зовж шанална гэдэгт итгэсэн хүмүүсийг тэнэг мунхаг гэж Корихор хэлж байв.
Үхлийн дараах амьдрал гэж байхгүй учраас хүмүүс нүглийнхээ төлөө шийтгүүлэхгүй гэж тэр хэлж байсан. Олон хүн Корихорт итгэж, ёс бус болжээ.
Корихор Аммоны хүмүүст номлохыг оролдсон боловч тэд сонссонгүй. Тэд түүнийг хүлээд, Аммонд хүргэхэд Аммон түүнийг хотоос хүчээр хөөн гаргав.
Корихор Гидеоны газар нутагт ирсэн боловч тэнд байсан хүмүүс түүний үгийг бас л сонссонгүй. Ерөнхий шүүгч түүнийг Алма руу илгээв.
Алма Корихороос Бурханд итгэдэг эсэхийг асуув. Корихор үгүй гэж хариулав. Алма Бурхан байдаг бөгөөд Христ ирнэ гэж гэрчилсэн.
Корихор Алмагаас Бурхан байдгийг батлахын тулд гайхамшгийг үзүүлэхийг хүсэв. Хэрэв Бурханы хүч чадлыг илтгэсэн тэмдэг үзүүлбэл Бурханд итгэнэ гэж Корихор хэлжээ.
Судруудаар мөн бүх бошиглогчийн гэрчлэлээр дамжуулан Бурханы хүч чадлыг илтгэсэн олон тэмдгийг аль хэдийн үзсэнийг нь Алма Корихорт хэлэв.
Алма газар дэлхий, түүн дээр байгаа бүх зүйл мөн огторгуйд байгаа од гаригсын хөдөлгөөн, энэ бүх зүйл Бурхан байдаг гэдгийг нотлох тэмдгүүд гэж хэлэв.
Корихор итгэхээс татгалзсан хэвээр байв. Алма Корихорын ёс бус байдалд харамсаж, түүний бодгаль устгагдаж болзошгүйг сэрэмжлүүлэв.
Бурхан байгаа гэдгийг батлах тэмдгийг Корихор шаардсаар байсан. Корихор ярьж чадахаа болих нь Бурханаас ирэх тэмдэг байх болно гэж Алма хэлэв.
Алмаг үүнийг хэлсний дараа Корихор ярьж чадахаа болив.
Корихор энэ тэмдэг нь Бурханаас ирсэн бөгөөд Бурхан байдаг гэдгийг үргэлж мэддэг байсан гэж бичжээ. Тэр Алмагаас залбирч, уг зүхлийг зайлуулахыг хүсэв.
Хэрэв Корихор ярьж чаддаг болбол хүмүүст дахин худлаа хэлэх болно гэдгийг Алма мэдэж байлаа. Корихор ярьж чаддаг болох эсэхийг Бурхан шийдэх болно гэж тэр хэлсэн.
Их Эзэн Корихорт ярих чадварыг нь эргүүлж өгсөнгүй. Корихор нэг айлаас нөгөөд хэсүүчилж, хоол гуйн явах болжээ.
Корихорт юу тохиолдсон тухай өгүүлсэн захидлыг ерөнхий шүүгч орон нутаг даяар илгээв. Корихорт итгэсэн хүмүүсийг наманчил гэж тэр хэллээ. Хүмүүс наманчилцгаав.
Корихор зорамчуудтай хамт амьдрахаар явав. Тэр нэг өдөр гуйлга гуйж байгаад, бусдын хөлд гишгэгдэн нас баржээ.