51-р бүлэг
Жаредчууд амлагдсан нутаг руу аялсан нь
Жаредын ах наманчлан, залбирсан. Их Эзэн Жаредын ахыг өршөөсөн боловч дахин нүгэл үйлдэж болохгүй гэж хэлэв.
Их Эзэн Жаредын ахад хүмүүсээ амлагдсан нутаг руу аваачих том завь барь хэмээн хэлэв.
Их Эзэн Жаредын ахад хэрхэн завь барихыг зааж өгөв.
Завийг агаар орохооргүй битүү хийсэн тул ус дотогш нэвтрэх боломжгүй байлаа.
Хүмүүсийн амьсгалах агаарыг завин дотор хэрхэн оруулах билээ гэж Жаредын ах гайхав. Тэр Их Эзэнээс юу хийх ёстойгоо асуув.
Их Эзэн түүнд завь болгоны дээр, доор хоёр нүх гарга гэж хэлсэн. Нүхийг агаар оруулахад зориулан онгойлгож, ус оруулахгүйн тулд хааж болохоор байв.
Жаредын ах завин дотор харанхуй байна гэж Их Эзэнд хэлжээ. Их Эзэн түүнээс завин дотор ямар арга замаар гэрэл гаргах тухай бодохыг хүсэв.
Завин дотор гал гаргах юм уу цонх хийж гэрэл гаргах боломжгүй байлаа. Учир нь тэдгээр нь унтарч эсвэл эвдэрч мэдэхээр байв.
Жаредын ах ууланд гарч, хаднаас 16 жижиг чулуу хэлтэлж авав. Чулуунууд тунгалаг шил мэт харагдаж байсан. Тэр найман завь тус бүрд хоёр хоёр чулуу бэлдэв.
Жаредын ах чулуунуудыг уулын орой өөд аваачив. Тэндээ тэр Их Эзэнд хандан залбирсан.
Жаредын ах Их Эзэнийг уг чулуунуудад гар хүрэхийг гуйв. Тэгснээр тэдгээр нь завин дотор гэрэл гаргах боломжтой болох байв.
Их Эзэн чулуу бүрд хуруугаараа хүрэв.
Жаредын ах агуу итгэлтэй хүн байсан тул Их Эзэний хурууг олж харсан юм. Энэ нь яг л хүний хуруу шиг харагджээ.
Дараа нь Их Эзэн өөрийгөө Жаредын ахад харуулав.
Есүс Өөрт нь итгэдэг хүмүүс мөнх амьдралыг хүлээн авах болно гэж хэлсэн.
Есүс Жаредын ахад олон зүйлийг зааж мөн үзүүлэв. Есүс түүнийг үзсэн, харсан зүйлээ бич гэж хэлжээ.
Жаредын ах чулуунуудаа уулын уруу авч явав. Тэр завь бүрийн урд мөн хойд талд нэг нэг чулуу тавив. Тэдгээр чулуу завин дотор гэрэл гаргаж байв.
Жаредчууд завин дотор ан амьтад болон хоол хүнсээ авч орлоо. Их Эзэн завинуудыг амлагдсан нутаг тийш хүргэх хүчтэй салхи үлээлгэхээр болгов.
Их Эзэн тэднийг догшин ширүүн далайд хамгаалж байв. Тэд Их Эзэнд талархаж, түүнийг магтан дуулав.
Усанд 344 өдөр аялаад, завинууд амлагдсан нутгийн эрэгт газардлаа.
Жаредчууд завинаасаа гарч ирж, сөгдөн суугаад, баярын нулимс унагав.
Жаредчууд амлагдсан нутагт байшин барьж, тариа тарив. Тэд хүүхдүүддээ Их Эзэнийг сонсож, дуулгавартай дагахыг заалаа.