41-р бүлэг
Христийн төрөлтийн тэмдгүүд
Есүс Христийг төрөхөөс өмнө тохиолдох болно гэж бошиглогчдын хэлж байсан агуу тэмдэг, гайхамшгуудыг нифайчууд харав.
Гэвч зарим нифай хүн Есүсийн төрөх цаг аль хэдийн өнгөрсөн гэж ярьж байв. Тэд лемен үндэстэн бошиглогч Самуелийн үгэнд итгэсээр байгаа хүмүүсийг шоолж байсан.
Есүс Христэд болон бошиглогчдод итгэж байсан хүмүүс бошиглолыг ямар нэгэн саадаас болж биелэхгүй байж магадгүй гэж санаа нь зовж байв.
Есүс Христийн төрөхийн тэмдэг болох гэгээтэй шөнийг хүмүүс итгэлтэйгээр хүлээж байв.
Есүс Христэд итгэдэггүй хүмүүс хэрэв уг тэмдэг тохиохгүй бол итгэгчдийг алах өдрийг товлов.
Аврагчид итгэдэггүй хүмүүсийн ёс бус байдлаас болж Нифай их гунигтай байлаа.
Нифай алуулах гэж байгаа хүмүүсийн төлөө бүх л өдөржингөө залбирав.
Их Эзэн Нифайг тайвшруулан, тэр шөнө харанхуй болохгүй, Есүс дараагийн өдөр нь Бетлехемд төрөх болно гэж хэлэв.
Тэр орой нар жаргасан боловч харанхуй болсонгүй. Есүс Христийн төрөлтийн тэмдэг тохиов. Хүмүүс гайхширч байлаа.
Итгэгчдийг алахаар төлөвлөж байсан хүмүүс газарт унан, үхсэн мэт харагдаж байв.
Тэд ёс бус байсандаа айж байв. Аврагч мэндэлнэ мөн бошиглогчдын үг зөв байсан гэдгийг тэд одоо мэдэж авчээ.
Бүх л шөнийн турш гэрэлтэй байлаа. Дараагийн өдөр нь нар мандахад, хүмүүс тэр өдөр Есүс Христ төрөх болно гэдгийг мэдэж байв. Бошиглол биеллээ.
Бошиглогчдын хэлсэнчлэн тэнгэрт шинэ од үзэгдэв.
Сатан хүмүүсийг үзсэн тэмдгүүддээ итгэхгүй байлгахыг оролдсон ч ихэнх нь итгэв.
Нифай болон Сүмийн бусад удирдагч итгэж, нүглээ наманчилсан бүх хүнд баптисм хүртээв.
Бошиглогчдын үг биелсэн тул газар нутаг даяар баяртай мэдээ тархаж байлаа. Есүс Христ мэндэлжээ.