22-р бүлэг
Алмагийн Аммонайха дахь номлол
Алма нифайчуудын ёс бус байдалд сэтгэл нь зовж байсан тул бүх цаг заваа сайн мэдээг номлоход зарцуулахаар шийджээ. Тэр Нифайхаг өөрийн оронд ерөнхий шүүгч болгохоор сонгожээ.
Алма газар нутаг даяар сайн мэдээг заав. Алмаг Аммонайхад номлохыг хичээх үед хүмүүс сонсохыг хүссэнгүй. Тэд түүнийг хотоосоо хөөн гаргажээ.
Аммонайхагийн хүмүүс туйлын ёс бус байсанд Алма харамсаж байв. Тэр өөр хот руу явж байв.
Тэнгэр элч үзэгдэн, Алмаг тайвшруулав. Тэнгэр элч түүнд Аммонайха руу буцаж очоод, дахин номло гэж хэлсэн. Алма яаран буцав.
Алма өлсөж байсан. Тэр хот руу орж ирээд, нэгэн хүнээс идэх хоол өгөхийг хүсэв. Тэнгэр элч тэр хүнд Алма бол Бурханы бошиглогч бөгөөд удахгүй энд ирнэ гэж хэлсэн байжээ.
Амюлек гэгч энэ эр Алмаг гэртээ авчран хооллов. Амюлек болон түүний гэр бүлийнхэнтэй Алма олон хоног хамт амьдарчээ. Тэр Амюлекийн гэр бүлийнхний төлөө Бурханд талархан, тэднийг адислав.
Алма Аммонайха дахь хүмүүст заахаар ирсэн дуудлагынхаа талаар Амюлект хэлэв. Амюлек хүмүүст заахаар Алматай хамт явав. Ариун Сүнс тэдэнд тусалжээ.
Алма хүмүүст нүглээ наманчил, эс бөгөөс Бурхан тэднийг устгах болно гэж хэллээ. Тэр Есүс Христ ирж, өөрт нь итгэж, нүглээ наманчилсан хүмүүсийг аврах болно гэж хэлэв.
Аммонайха дахь хүмүүс ихэд хилэгнэж байв. Тэд Алмаг шоронд хийхийг оролдсон боловч Их Эзэн түүнийг хамгаалжээ.
Тэгээд Амюлек номлож эхлэв. Олон хүн Амюлекийг таньдаг байсан бөгөөд тэр Алмагийн адил харийн хүн биш байлаа. Тэр тэнгэр элчийг харсан тухайгаа тэдэнд хэлэв.
Алма бол Бурханы бошиглогч бөгөөд үнэнийг ярьж буй гэдгийг Амюлек гэрчлэв. Хүмүүс Амюлекийн гэрчлэлийг сонсоод, ихэд гайхсан.
Хүмүүсийн зарим нь, ялангуяа Зиезром гэгч нэгэн ёс бус хүн ихэд уурлав. Тэр асуултуудаараа Амюлекийг заль мэхэндээ оруулах гэсэн боловч төлөвлөгөөнийх нь тухай мэдэж байгаа гэдгээ Амюлек хэлэв.
Зиезром сайн сайхан бүх зүйлийг сүйтгэхийг хүсэж байлаа. Тэр янз бүрийн асуудал үүсгэж, дараа нь хүмүүс түүний үүсгэсэн асуудлуудыг шийдүүлэхийн тулд өөрт нь мөнгө төлдөг байв.
Зиезром Амюлекийг мэхэлж чадаагүй учир Бурхан байхгүй гэж хэлбэл мөнгө өгье гэж түүнд хэлжээ. Амюлек Бурхан амьд гэдгийг мэдэж байсан бөгөөд Зиезром бас үүнийг мэдэж байгаа боловч Бурханаас илүү мөнгийг хайрладаг гэдгийг нь түүнд хэлэв.
Дараа нь Амюлек Есүсийн тухай болон Амилуулалт, мөнх амьдралын тухай Зиезромд заав. Хүмүүс гайхширч байлаа. Зиезром айн дагжиж эхлэв.
Алма, Амюлек хоёр өөрийнх нь бодлыг мэдэж байгаа учраас тэдэнд Бурханы хүч байгаа гэдгийг Зиезром мэдэж байлаа. Зиезром асуултууд тавин, Алмагийн сайн мэдээнээс заахыг сонссон.
Зарим хүн Алма, Амюлек хоёрт итгэж, нүглээ наманчлан, судраас судалж эхлэв.
Гэвч ихэнх хүн Алма, Амюлек хоёрыг алахыг хүсэж байлаа. Тэд уг хоёр эрийг хүлээд, ерөнхий шүүгч дээр аваачив.
Зиезром ёс бус байсандаа мөн хүмүүст худал хэлсэндээ харамсаж байлаа. Тэр хүмүүсээс Алма, Амюлек хоёрыг суллахыг хүсэв.
Алма, Амюлек хоёрын заасан зүйлсэд итгэсэн хүмүүсийг мөн Зиезромыг хотоос хөөн гаргажээ. Ёс бус хүмүүс тэдэн рүү чулуу шидэж байв.
Дараа нь ёс бус хүмүүс тэдэнд итгэсэн эмэгтэйчүүд, хүүхдүүдийг цуглуулан, судруудынх нь хамт гал руу шидэв.
Галд шатаж байгаа эмэгтэйчүүд, хүүхдүүдийн үхэхийг Алма, Амюлек хоёрт хүчээр харуулж байв. Амюлек тэднийг аврахын тулд Бурханы хүч чадлыг ашиглахыг хүсэж байлаа.
Гэвч Алма Амюлект аллагыг зогсоох хэрэггүй, учир нь үхэж буй хүмүүс удахгүй Бурхантай хамт амьдарч, ёс бус хүмүүс шийтгэгдэх болно гэж хэлэв.
Ерөнхий шүүгч Алма, Амюлек хоёрыг хэд хэдэн удаа алгадаж, шатаж байсан эмэгтэйчүүд, хүүхдүүдийг аварч чадаагүйнх нь төлөө элэг доог хийн, тохуурхав. Дараа нь тэр тэднийг шоронд хийв.
Өөр ёс бус хүмүүс шоронд ирж, Алма, Амюлек хоёрыг өлсгөж, тэдэн рүү нулимах зэргээр янз бүрийн аргаар доромжилж байлаа.
Хэрэв Алма, Амюлек хоёр Бурханы хүчийг ашиглан өөрсдийгөө чөлөөлбөл тэдэнд итгэх болно гэж ерөнхий шүүгч хэлэв. Тэр тэднийг дахин алгадав.
Алма, Амюлек хоёр босож зогсов. Алма залбиран, Христэд итгэх итгэлийнх нь улмаас өөрсдийг нь хүч чадалтай болгож өгөхийг Бурханаас гуйв.
Бурханы хүч чадал Алма, Амюлек хоёрыг дүүргэж, тэд өөрсдийг нь хүлсэн олсыг тасдав. Хилэнцэт хүмүүс маш их айж, зугтахаар оролдсон боловч газарт унацгаав.
Газар доргиж, шоронгийн хана ёс бус хүмүүсийн дээрээс нурж унав. Их Эзэн Алма, Амюлек хоёрыг хамгаалсан учир тэд гэмтэж бэртсэнгүй.
Аммонайха дахь хүмүүс юу болж байгааг нүдээр үзэхээр иржээ. Алма, Амюлек хоёрыг нурсан шоронгоос гарч ирэхийг харсан хүмүүс айж зугтлаа.
Их Эзэн Алма, Амюлек хоёрт Сидом руу оч гэв. Тэндээс тэд зөв шударга хүмүүсийг олжээ. Зиезром мөн тэдний дунд байсан бөгөөд хүндээр өвдсөн байлаа.
Зиезром Алма, Амюлек хоёрыг харсандаа баяртай байлаа. Тэрээр өөрийнх нь хийсэн зүйлээс болж тэднийг үхсэн байх гэж сэтгэл нь зовж байжээ. Тэр тэднээс өөрийг нь эдгээж өгөхийг хүсэв.
Зиезром Есүс Христэд итгэж, нүглээ наманчилсан байлаа. Алмаг түүний төлөө залбирахад Зиезром тэр дороо эдгэрэв.
Зиезром баптисм хүртэж, сайн мэдээг номлож эхлэв. Өөр олон хүн мөн баптисм хүртэв.
Алмагийн бошиглосны дагуу леменчүүд Аммонайха дахь ёс бус хүмүүсийг бүгдийг нь алжээ.