Pagbuhat diha sa Tanan nga Kakugi

Mga kaigsoonan, mapasalamaton ko nga makauban kamo karong gabhiuna. Ug nahimong mapaubsanon sa unsay akong nasayran mahitungod sa inyong matinud-anong priesthood nga pangalagad. Mamulong ako kaninyo karong gabhiona mahitungod sa kakugi diha sa pagserbisyo sa Ginoo. Ang bag-o nga mga kasinatian mao ang nagdala kanako sa pagpili niini nga hilisgutan.

Ang usa mao ang akong mainampingong pagtuon sa talagsaon nga bag-ong gamay nga basahon alang sa Aaronic Priesthood, mahitungod sa gihisgutan ni David L. Beck. Giulohan kini og Pagtuman sa Akong Katungdanan ngadto sa Dios. Samtang ako nagbasa ug namalandong kon unsay gilauman niini nga buhaton sa mga batan-ong lalaki ug unsa sila sa umaabut, akong naamguhan nga naghulagway kini sa gisaad ni Presidente Brigham Young ngadto sa naghupot sa priesthood nga nagmakugihon sulod sa tibuok kinabuhi: “Ang tawo nga naghupot sa Priesthood, ug padayon nga nagmatinud-anon sa iyang calling, nga mahimuot kanunay sa pagbuhat sa mga butang nga gisugo sa Dios nga iyang buhaton, ug nagpadayon sa tibuok kinabuhi sa pagbuhat sa matag katungdanan makabaton sa iyang kaugalingon dili lamang sa pribilehiyo sa pagdawat, apan sa kahibalo kon unsaon sa pagdawat ang mga butang sa Dios, nga siya kanunay nga masayud sa hunahuna sa Dios.”¹

Pipila pa lamang ka mga semana ang milabay, nakakita ako og usa ka bag-ong deacon nga nagsugod niana nga dalan sa kakugi. Ang iyang amahan mipakita kanako og usa ka diagram nga gihimo sa iyang anak nga lalaki nga nagpakita sa matag linya sa lingkuranan sa ilang chapel, sa gidaghanon sa matag deacon nga sangunan sa pagpaambit sa sakrament, ug sa ilang agianan diha sa chapel sa pagpangalagad sa sakrament ngadto sa mga miyembro. Ang amahan ug ako mipahiyum nga naghunahuna nga ang usa ka bata, nga wala sugoa sa paghimo niini, naghimo og usa ka plano aron masiguro nga magmalampuson siya sa iyang priesthood nga pangalagad.

Akong nakita diha sa iyang kakugi ang sundanan gikan sa bag-o nga gamayng basahon nga Katungdanan ngadto sa Dios. Kini mao ang pagkat-on sa unsay gilauman sa Ginoo kaninyo, paghimo og plano aron sa pagbuhat niini, pagbuhat sa inyong giplano uban sa kakugi, ug dayon ipakigbahin sa uban kon sa unsang paagi nga ang inyong kasinatian nakapausab kaninyo ug nakapanalangin sa uban.

Ang deacon mihimo niana nga diagram aron sa pagsiguro nga iyang mabuhat ang unsay gitawag sa Ginoo nga iyang buhaton. Sa sinugdanan sa iyang priesthood nga pangalagad, ang Ginoo nagtudlo kaniya nga mahimuot kanunay sa “pagbuhat sa mga butang nga ang Dios nagkinahanglan kaniya sa pagbuhat.”²

Ang laing kasinatian nga migiya kanako sa pagpamulong kaninyo mahitungod sa kakugi karong gabhiona mao ang pagkakita sa usa ka tawo nga hapit na mahuman sa iyang priesthood nga pangalagad niining kinabuhia. Nahimo siya nga bishop duha ka higayon. Ang iyang unang tawag isip usa ka bishop, mga katuigan sa wala pa nako siya makaila, nahitabo kaniadtong batan-on pa siya. Karon tigulang na siya, na-release sa ikaduhang higayon isip bishop. Ang iyang nagkaluya nga panglawas nakapahimong lisud kaayo sa bisan unsang priesthood nga pangalagad.

Apan siya adunay plano sa pagbuhat diha sa kakugi. Molingkod siya matag Dominggo kon makaadto siya sa simbahan adto duol sa pultahan diin kadaghanan sa mga tawo moagi alang sa sakrament miting. Mosayo siya didto aron sa pagsiguro nga bakante pa ang lingkuranan. Ang matag tawo nga moabut makakita sa iyang mahigugmaon ug maabi-abihong panagway, sama sa ilang nakita kaniadto kon siya molingkod sa atubangan isip ilang bishop. Ang iyang impluwensya mipainit ug midasig kanamo tungod kay nasayud kami sa bugti nga iyang gibayad sa pag-alagad. Ang iyang buluhaton isip usa ka bishop nahuman na; ang iyang priesthood nga pangalagad wala pa mahuman.

Nakakita kamo og susama nga mga ehemplo sa mga bantugan nga mga sulugoon sa priesthood. Karong gabhiona, maningkamot ako sa pagsulti kaninyo mahitungod sa unsay akong nakat-unan mahitungod kanila. Nagsugod kini sa ilang pagkat-on sa pagkasayud kon kinsa ang ilang gialagaran ug alang sa unsa nga katuyoan. Kon kana motuhop sa ilang mga kasingkasing, makahimo kini og dakong kalainan.

Una, mamulong ko og direkta ngadto sa batan-ong mga lalaki sa Aaronic Priesthood. Kamo mahimong mas kugihan samtang inyong mabati ang gidak-on sa pagsalig nga gihatag sa Dios nganha kaninyo. Adunay usa ka mensahe gikan sa Unang Kapangulohan alang kaninyo diha nianang gamayng basahon nga Katungdanan ngadto sa Dios. “Ang Langitnong Amahan adunay dako nga pagsalig ug paglaum diha kanimo ug adunay usa ka importante nga misyon alang kanimo nga pagatumanon. Motabang Siya kanimo samtang ikaw moduol ngadto Kaniya diha sa pag-ampo, pamati sa mga pag-aghat sa Espiritu, sunda ang mga kasugoan ug hupti ang mga pakigsaad nga imong nahimo.”³

Si Juan Bautista mibalik nganhi sa yuta aron sa pagpahiuli sa priesthood nga gihuptan ninyo mga kabatan-onan. Siya ang naghupot sa mga yawe sa Aaronic Priesthood. Si Juan kadto kinsa maoy giduol ni Jesus aron magpabunyag. Si Juan nasayud kon kinsa ang mitawag kaniya. Miingon siya sa Ginoo, “Ako mao ang may kinahanglan nga imong pagabautismohan.”⁴

Si Juan nasayud nga ang priesthood ni “Aaron nga naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala” sa dihang ang Ginoo mipadala kaniya aron ordinahan sila si Joseph Smith ug Oliver Cowdery niadtong Mayo 15, 1829.⁵ Nasayud siya kon kinsa ang mitawag kaniya ug alang sa unsa nga mahimayaon nga katuyoan siya gipadala.

Ang inyong priesthood nagtugot kaninyo sa pagtanyag sa sakrament sa Panihapon sa Ginoo ngadto sa mga miyembro sa Iyang Simbahan karon. Mao kana ang sama nga kahigayunan nga gihatag sa Manluluwas ngadto sa Napulog Duha ka mga Apostoles sa Iyang mortal nga pagpangalagad. Gihimo Niya kini pag-usab sa dihang mitawag Siya og napulog duha ka mga disipulo human sa Iyang Pagkabanhaw sa pagpangulo sa Iyang Simbahan.

Ang Ginoo Mismo, sama sa gihulagway diha sa Basahon ni Mormon, ang mihatag sa simbolo sa Iyang walay kinutuban nga sakripisyo ug mialagad niini ngadto sa mga katawhan. Hunahunaa Siya ug kon unsa ka dako sa Iyang pagtahud kaninyo kon kamo mohimo sa inyong priesthood nga pangalagad. Samtang hinumduman ninyo Siya, mahimo kamong determinado sa paghimo niana nga sagradong pagpangalagad, nga ingon ka sama sa Iyang gihimo kutob sa inyong mahimo, ug ingon ka maayo ug kamatinud-anon sa Iyang gihimo.⁶

Kana mahimong usa ka sundanan sa inyong kinabuhi nga mopalambo sa inyong gahum nga magmakugihon sa matag priesthood nga pangalagad alang sa butang diin ang Ginoo miandam kaninyo ug ngadto sa butang diin Siya motawag kaninyo. Kana nga determinasyon makatabang kaninyo sa pagpangandam sa pagdawat sa Melchizedek Priesthood, nga gitawag kaniadto og “ang Balaan nga Pagkapari, sunod sa Kapunongan sa Anak sa Dios.”⁷

Karon, gusto ko nga mamulong ngadto niadtong kinsa gitawag ug gipasidunggan sa pagserbisyo diha sa Melchizedek Priesthood. Sama sa Aaronic Priesthood, ang Melchizedek Priesthood mas labaw pa kay sa usa ka pagsalig sa pagbuhat sa unsay buhaton sa Ginoo. Kini usa ka pagdapit nga mahimong sama Kaniya. Ania ang Iyang saad:

“Kay kinsa kadto nga matinud-anon ngadto sa pagbaton niining duha ka mga pagkapari diin Ako nga gipamulong, ug sa pagpalambo sa ilang balaan nga tawag, pagabalaanon pinaagi sa Espiritu ngadto sa pagbag-o sa ilang mga lawas.

“Sila mahimo nga anak nga mga lalaki ni Moises ug ni Aaron ug ang binhi ni Abraham, ug sa simbahan ug gingharian, ug ang pinili sa Dios.

“Ug usab silang tanan kinsa modawat niini nga pagkapari modawat kanako, miingon ang Ginoo;

“Kay siya nga modawat sa akong mga sulugoon modawat kanako;

“Ug siya nga modawat kanako modawat sa akong Amahan;

“Ug siya nga modawat sa akong Amahan makadawat sa gingharian sa akong Amahan; busa ang tanan nga iya sa akong Amahan ihatag ngadto kaniya.”⁸

Adunay usa ka sundanan diin ang tanang mga naghupot sa priesthood gidasig ngadto nianang mahimayaong panalangin. Usa ka dapit sa kasulatan diin ang Ginoo naghatag og sundanan alang kanato anaa sa ika-107 nga seksyon sa Doktrina ug mga Pakigsaad:

“Busa, karon himoa ang matag tawo nga makakat-on sa iyang katungdanan, ug pagbuhat sa buhatan diin siya natudlo, diha sa tanan nga kakugi.

“Siya nga tapulan, dili takus nga iphon nga mobarug, ug siya nga dili makakat-on sa iyang katungdanan ug magpakita sa iyang kaugalingon nga dili angay dili pagaiphon nga takus nga mobarug. Bisan pa niana. Amen.”⁹

Kinahanglan kita nga makat-on sa atong katungdanan gikan sa Ginoo, ug dayon kinahanglan nga atong buhaton diha sa tanan nga kakugi, dili gayud magtinapulan. Ang sundanan simple apan dili sayon nga sundon. Dali kaayo kita nga mabalda. Ang pagbasa sa matag adlaw nga mga balita mahimong makita nga mas makapaikag kay sa manwal sa leksyon sa priesthood. Ang paglingkod aron mopahulay mas makapadani kay sa paggahin og panahon aron sa pagbisita niadtong kinsa nanginahanglan sa atong priesthood nga pangalagad.

Kon akong mabantayan ang akong kaugalingon napalayo gikan sa akong mga katungdanan sa priesthood tungod sa laing mga butang nga gustong buhaton ug kon ang akong lawas nagtinguha sa pagpahulay, akong dasigon ang akong kaugalingon niini nga mga pulong: “Hinumdumi Siya.” Ang Ginoo mao ang atong hingpit nga ehemplo sa kakugi diha sa priesthood nga pangalagad. Siya ang atong lider. Kita Iyang gitawag. Siya mag-una og lakaw kanato. Kita Iyang gipili sa pagsunod Kaniya ug sa pagdala og lain pa uban kanato.

Niining gabhiona Siya akong nahinumduman ug kini nagtandog sa akong kasingkasing. Kini ang gabii sa Sabado sa dili pa ang Dominggo sa Pagkabanhaw, nga atong hinumduman ang Iyang Pagkabanhaw. Akong nahinumduman ang Iyang ehemplo sa mga adlaw sa wala pa ang Iyang kamatayon.

Tungod sa gugma alang sa Iyang Amahan ug kanato, Siya mitugot sa Iyang kaugalingon nga mag-antus lapas pa sa kapasidad sa mortal nga tawo. Siya misulti kanato sa pipila nianang walay kinutuban nga sakripisyo nga gikinahanglan gikan Kaniya. Nahinumduman ninyo ang mga pulong:

“Kay tan-awa, Ako, ang Dios, nag-antus niini nga mga butang alang sa tanan, nga sila unta dili mag-antus kon sila maghinulsol;

“Apan kon dili sila maghinulsol sila kinahanglan gayud nga mag-antus sama kanako;

“Kansang pag-antus nakapahimo sa akong kaugalingon, gani ang Dios, ang labing halangdon sa tanan sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antus sa lawas ug sa espiritu—ug buot nga Ako unta dili moinom sa mapait nga kopa, ug mobiya—

“Bisan pa niana, himaya ngadto sa Amahan, ug Ako nakaambit ug nakahuman sa akong mga pagpangandam alang sa mga katawhan.”¹⁰

Gikan sa krus didto sa Kalbaryo, ang Manluluwas namahayag, “Tapus na.”¹¹ Dayon ang Iyang espiritu mibiya sa Iyang lawas, ug ang Iyang patay nga lawas gibutang sa usa ka lubnganan. Siya mitudlo kanato og usa ka leksyon sa unsay Iyang gihimo sa tulo ka adlaw didto sa kalibutan sa mga espiritu, sa wala pa ang Iyang Pagkabanhaw, nga akong hinumduman sa higayon nga matintal ko nga mobati nga nakahuman na ako sa pipila ka lisud nga mga buluhaton sa pagserbisyo Kaniya ug angayan lang nga mopahulay.

Ang ehemplo sa Manluluwas naghatag kanako og kadasig sa pagpadayon. Ang iyang mga paghago sa pagkamortal natapus na, apan misulod Siya sa kalibutan sa mga espiritu nga determinadong ipadayon ang Iyang mahimayaon nga buhat aron sa pagluwas sa mga kalag. Iyang giorganisar ang buluhaton sa matinud-anon nga mga espiritu aron sa pagluwas niadtong kinsa makaambit pa sa kalooy nga nahimong posible tungod sa Iyang maulaon nga sakripisyo. Hinumdumi ang mga pulong gikan sa ika-138 nga seksyon sa Doktrina ug mga Pakigsaad:

“Apan tan-awa, taliwala diha sa mga matarung siya mihan-ay sa iyang pundok ug mitudlo og mga sinugo, sinul-uban uban sa gahum ug pagtugot, ug gitugyan kanila ang paglakaw ngadto ug pagdala sa kahayag sa ebanghelyo ngadto kanila nga anaa diha sa kangitngit, bisan ngadto sa tanan nga mga espiritu sa mga tawo; ug sa ingon ang ebanghelyo nasangyaw ngadto sa mga patay.

“Ug pinili nga mga sinugo miadto ngadto sa pagpahayag sa adlaw nga ikahimuot sa Ginoo ug gipadayag ang kalingkawasan sa mga binilanggo kinsa ginapos, bisan ngadto kinsa maghinulsol sa ilang mga sala ug modawat sa ebanghelyo.”¹²

Sa higayon nga kita makahinumdom Kaniya, mas mahimong sayon ang pagbuntog sa tintasyon nga mangandoy sa pagpahulay gikan sa atong mga priesthood nga paghago. Kinahanglan gayud nga Siya atong hinumduman karon, ug mao nga kita ania karon aron sa pagkat-on sa atong mga katungdanan, determinado sa pagbuhat sa unsay atong gipakigsaad nga buhaton, diha sa tanang kakugi. Ug tungod sa Iyang ehemplo kita molahutay hangtud sa katapusan sa mga buluhaton nga Iyang gihatag kanato niining kinabuhia ug mapasaligon sa pagbuhat sa kabubut-on sa Iyang Amahan hangtud sa kahangturan, ingon nga Siya mapasaligon kaniadto ug hangtud karon.

Mao kini ang Simbahan sa Ginoo. Siya mitawag kanato ug misalig kanato bisan pa man sa mga kahuyang nga Iyang nasayran nga kita aduna. Nasayud siya sa mga pagsulay nga atong atubangon. Pinaagi sa matinud-anon nga pag-alagad ug pinaagi sa Iyang Pag-ula, kita makakat-on sa unsay Iyang gusto ug mahimo kon unsay angay nga kita mahimo aron sa pagpanalangin niadtong atong gialagaran alang Kaniya. Samtang kita mag-alagad Kaniya sa igo nga gidugayon ug uban sa kakugi, kita mausab. Kita mahimo gayud nga mas sama Kaniya.

Akong nakita ang ebidensya niana nga milagro diha sa mga kinabuhi sa Iyang mga sulugoon. Nakita ko kini pipila na ka semana ang milabay didto sa lawak nga higdaanan sa usa ka matinud-anon nga naghupot sa priesthood.

Nakaila ko kaniya isip usa ka deacon, usa ka amahan, usa ka bishop, ug usa ka sakop sa stake presidency. Naobserbahan nako sulod sa mga dekada ang iyang kakugi sa pagserbisyo sa mga anak sa Dios gamit ang iyang priesthood.

Ang iyang pamilya mialirong kaniya diha sa iyang lawak nga higdaanan. Nagpahiyum siya, nagsul-ob og puti nga sinina, terno, ug necktie. Nasurprisa ako, tungod kay miadto ako didto kay gisultihan man ako nga anaa siya taliwala sa sakit kaayo nga medikal nga mga pagtambal nga wala pa gayud moayo kaniya.

Gani gitimbaya niya ako sama gayud sa iyang pagtimbaya sa gatusan nga uban pa nga mga bisita sulod sa tibuok kinabuhi nga priesthood nga pagpangalagad, nga mapahiyumon. Miadto ko aron sa pagtabang kaniya sa mga pagsulay nga iyang giatubang, apan ingon sa kanunay nga nahitabo sa priesthood nga pagpangalagad, ako ang natabangan ug ako ang nakakat-on.

Nanglingkod kami ug malipayon nga nag-istoryahanay. Gisultihan ko niya kon giunsa sa pag-atiman sa iyang amahan ang akong inahan samtang nagkaduol na ang iyang kamatayon. Wala ako masayud niana. Naamguhan dayon nako nga siya nakakat-on isip usa ka batang lalaki gikan sa iyang kugihan nga priesthood nga amahan kon unsaon sa pagtabang. Kana nga hunahuna nakapahimo nakong mapasalamaton sa mga panahon nga akong gidala ang akong gagmay nga mga anak nga lalaki kuyog kanako sa mga pagbisita sa priesthood aron sa paghupay ug pagpanalangin sa uban.

Human sa pipila ka minuto, hinay siya nga mihangyo kanako, “Maayo ba kaha kon mohangyo ko nga mahatagan ko nimo og panalangin?” Ang iyang kanhi stake president, kinsa kauban niyang nagserbisyo sulod sa mga katuigan, midihog sa iyang ulo og lana nga gipahinungod pinaagi sa gahum sa Melchizedek Priesthood.

Samtang akong gisilyo ang panalangin, natudloan ako sa Espiritu Santo bisan man lang og tipik sa unsay nahimo na sa Ginoo alang niining matinud-anon nga naghupot sa priesthood. Limpyo siya, ang iyang mga sala nalimpyohan na. Ang iyang kinaiya nausab ngadto sa pagkagusto sa unsay gusto sa Manluluwas. Wala na siyay kahadlok sa kamatayon. Ang tinguha sa iyang kasingkasing mao ang mabuhi aron sa paghatag og serbisyo sa iyang pamilya ug sa uban pa nga mga anak sa Langitnong Amahan nga nanginahanglan kaniya.

Milakaw ako ngadto sa kagabhion nga mapasalamaton nga nakasaksi sa kamaayo sa Ginoo ngadto sa Iyang masaligon nga kugihan nga mga sulugoon sa priesthood. Iyang giusab ang ilang mga kasingkasing ngadto sa pagkagusto sa unsay Iyang gusto ug sa pagbuhat sama sa Iyang buhaton.

Karon akong tapuson kini nga tambag ngadto sa mga sulugoon nga priesthood sa Ginoo. Pamalandong og maayo ug sa makugihon nga paagi diha sa mga kasulatan ug diha sa mga pulong sa buhing mga propeta. Padayon sa pag-ampo aron ang Espiritu Santo mopadayag kaninyo sa kinaiyahan sa Dios nga Amahan ug sa Iyang Pinalangga nga Anak. Pangaliyupo nga ang Espiritu mopakita kaninyo kon unsay gusto sa Ginoo nga ipabuhat kaninyo. Planoha ang paghimo niini. Saari Siya nga motuman kamo. Buhata uban sa determinasyon hangtud inyong mabuhat ang Iyang ipabuhat. Ug dayon pag-ampo aron sa paghatag og pasalamat alang sa oportunidad sa pagserbisyo ug sa kasayuran kon unsay sunod ninyong angay nga buhaton.

Ako mopamatuod nga ang atong Langitnong Amahan ug si Jesukristo buhi. Sila nabanhaw ug nahimaya nga mga binuhat kinsa nahigugma ug nagbantay kanato. Ang mga yawe sa priesthood gipahiuli pinaagi sa langitnong mga mensahero ngadto ni Propeta Joseph Smith. Kini gipasa diha sa walay pagkaputol nga linya ngadto ni Presidente Thomas S. Monson. Kadto nga mga yawe gihuptan sa matag buhi nga mga Apostoles.

Akong ibilin kaninyo ang akong panalangin nga unta inyong mabati pinaagi sa Espiritu ang gidak-on sa pagsalig ug sa mga saad nga inyong nadawat isip gi-ordinahan nga mga sulugoon sa priesthood diha sa tinuod nga Simbahan sa Ginoo, sa sagradong pangalan ni Jesukristo, amen.