Ang Bag-ong Programa sa Katungdanan Ngadto sa Dios Gipahibalo

Sama sa gipahibalo panahon sa kinatibuk-ang komperensya, usa ka bag-o nga programa sa Katungdanan ngadto sa Dios napalambo ubos sa direksyon sa buhi nga mga propeta sa pagtabang sa batan-ong mga lalaki sa pagtukod og espiritwal nga kalig-on ug sa pagtuman sa ilang mga buluhaton sa priesthood.

“[Ang bag-ong programa sa Katungdanan ngadto sa Dios] usa ka gamhanan nga himan,” miingon si Presidente Henry B. Eyring, Unang Magtatambag sa Unang Kapangulohan, panahon sa sesyon sa Sabado sa buntag. “Molig-on kini sa mga pagpamatuod sa batan-on nga mga lalaki ug sa ilang relasyon sa Dios. Motabang kini kanila nga makat-on ug ganahan nga motuman sa ilang mga katungdanan sa priesthood. Molig-on kini sa ilang mga relasyon uban sa ilang mga ginikanan, diha sa mga sakop sa korum, ug uban sa ilang mga lider.”

Ang bag-ong programa sa Katungdanan ngadto sa Dios gipayano ug gipokusan. Ang mga kinahanglanon alang sa tanang tulo ka grupo sa kaedad, uban sa mga instruksyon alang sa ilang mga ginikanan ug mga lider, anaa na sa usa ka basahon. Ang libro ug ang kaubang mga materyal anaa sa 27 ka pinulongan sa tunga-tunga sa Hunyo ug Agosto 2010. Dugang mga paghubad sa materyal magpadayon nga maanaa sa tibuok tuig.

Ang mga kalihokan gihan-ay aron sa pagtugot sa batan-ong mga lalaki sa pagkat-on kabahin sa usa ka baruganan sa ebanghelyo o buluhaton sa priesthood, pagbuhat unsa ang nakat-unan ug dayon sa pagpakigbahin sa ilang mga hunahuna ug mga pagbati uban sa mga ginikanan, mga lider sa Simbahan, o sa ilang korum.

“Isip usa ka deacon, teacher, ug priest, moapil kamo sa mga kalihokan nga makatabang kaninyo sa pagtukod og espirituhanong kalig-on ug makat-on ug makatuman sa inyong mga katungdanan sa priesthood,” miingon si David L. Beck, kinatibuk-ang presidente sa Young Men, atol sa sesyon sa priesthood sa kinatibuk-ang komperensya. “Ang bag-ong programa sa Katungdanan ngadto sa Dios mogiya kaninyo sa inyong panaw sa pagtuman sa inyong katungdanan ngadto sa Dios ug makadiskubre sa katalagsaon sa Aaronic Priesthood.”

Ang programa gidesinyo sa pag-awhag sa batan-ong mga lalaki pagbaton og responsibilidad alang sa inyong kaugalingong pagtubo, apan kini usab naghatag og mga oportunidad sa paglig-on sa mga relasyon tali sa batan-ong mga lalaki ug ilang mga ginikanan, mga lider, ug mga miyembro sa korum. Daghan sa mga kalihokan mahimong mahiusa sa family home evening ug mga miting sa korum ug mga kalihokan.

“Ang mga ginikanan, mga lider, ug mga miyembro sa korum adunay importante nga bahin [role] diha sa programa sa Katungdanan ngadto sa Dios,” miingon si Brother Beck ngadto sa mga magasin sa Simbahan. “Ang mga miting sa korum ma-Dominggo makahatag og regular nga mga kahigayunan sa pagkat-on, sa pagbuhat, ug sa pagpakigbahin.”

Ang batan-ong mga lalaki giawhag sa pagpadayon og trabaho sa programa nga anaa karon hangtud nga ang bag-ong programa iimplementar sa inyong ward o branch. Kon ang bag-ong programa maimplementar, ang matag batan-ong lalaki kinahanglan magsugod sa pagtrabaho sa seksyon nga angay sa katungdanan sa priesthood nga anaa niya karon. Kon siya hapit na mahuman sa pagkompleto sa mga gikinahanglan alang sa sertipiko o medalyon nga angay sa iyang katungdanan ubos sa karaang programa, mahimo niyang kompletohon kadtong mga gikinahanglan samtang magsugod sa pagtrabaho sa bag-ong programa.

“Matag kalihokan sa Pagtuman sa Akong Katungdanan ngadto sa Dios nagsunod og usa ka sumbanan nga makatabang kaninyo nga mahimong usa ka tighupot sa priesthood nga ang Ginoo gusto nga kamo mamahimo,” miingon si Brother Beck.

Dugang nga impormasyon ug mga materyal ang maanaa online sa DutyToGod.lds.org.