Mga Butang Kabahin sa Pagkamatarung

Gisultihan kita diha sa Doktrina ug mga Pakigsaad nga human sa pagpamatuod sa mga sulugoon sa Dios, ang pagpamatuod sa mga linog ug ang pagpamatuod sa ubang mga panghitabo mosunod. “Ug ang tanan nga mga butang magkaguliyang; ug sa pagkatinuod, ang mga kasingkasing sa mga tawo mopakyas kanila; kay ang kahadlok moabut diha sa tanan nga mga katawhan” (D&P 88:91; tan-awa usab sa mga bersikulo 88–90).

Isip sakop sa Caribbean Area Presidency, usa ako ka personal nga saksi sa matinud-anon nga mga Santos nga gipulihan ang kahadlok og hugot nga pagtuo. Ang mga leksyon nga nakat-unan sa Haiti mahimong mahisama sa mga paghulagway sa Basahon ni Mormon.

Ang panumduman nianang terible nga kalaglagan midala sa akong hunahuna sa mga pulong diha sa ika-28 nga kapitulo sa Alma: “Kini mao ang panahon nga dihay dako nga pagbangutan ug kagul-anan nga nadungog sa tibuok yuta” (Alma 28:4).

Kwarenta y dos ka mga miyembro usab ang nakabsan sa ilang kinabuhi. Samtang ang ilang mga pamilya ug mga higala “nagbangutan tungod sa pagkamatay sa ilang mga kaliwatan, apan sila nalipay ug naghimaya sa paglaum, ug gani nasayud, sumala sa mga saad sa Ginoo, nga sila pagabanhawon aron mopuyo diha sa tuo nga kamot sa Dios, sa usa ka kahimtang sa walay katapusan nga kalipay” (Alma 28:12).

Dinaliang tabang ang gipadala sa Simbahan ngadto sa mga miyembro ug mga dili miyembro ug gipang-apud-apod ubos sa direksyon sa lokal nga mga lider sa priesthood ug Relief Society. Wala lamang sila makadawat og medikal nga panabang, pagkaon, tubig, ug ubang nag-unang mga suplay, apan nakadawat usab sila og tambag, giya, ug kahupayan gikan sa ilang lokal nga mga lider. Duna silay suporta sa mga miyembro sa Simbahan sa tibuok kalibutan nga “nagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan” (Mosiah 18:9).

Lainlaing mga propeta sa lainlaing mga panahon ang mipasidaan kanato sa laing trahedya nga dili kaayo mabantayan apan dili minus ang kamahinungdanon, ug mao kini ang “makalilisang nga kamatayon [nga] modangat diha sa mga dautan; kay sila mamatay ingon sa mga butang kabahin sa mga butang sa pagkamatarung; kay sila mga mahugaw, ug walay mahugaw nga butang nga makapanunod sa gingharian sa Dios” (Alma 40:26).

Si Nephi nagtudlo niini nga baruganan ngadto sa iyang mga igsoong lalaki, nga nag-ingon ngadto kanila nga kadtong kinsa “mamatay diha sa ilang pagkadautan … kinahanglan gayud nga isalikway usab, ingon sa mga butang nga espirituhanon, diin may kalabutan sa pagkamatarung” (1 Nephi 15:33).

Si Samuel ang Lamanite nga propeta mitudlo nga “si kinsa kadto nga dili maghinulsol siya isalikway ug itambug sa kalayo; ug adunay moabut kanila usab nga usa ka espirituhanon nga kamatayon, oo, ang ikaduha nga kamatayon, kay sila gisalikway pag-usab sa mga butang mahitungod sa pagkamatarung” (Helaman 14:18).

Ang trahedya sa pagkamatay ngadto sa mga butang nga espirituhanon adunay mas dako nga epekto alang niadtong kinsa “human malamdagan pinaagi sa Espiritu sa Dios, ug makaangkon og dako nga kahibalo sa mga butang kabahin sa pagkamatarung, ug unya mahisalaag ngadto sa pagpakasala ug paglapas[;] sila mahimo nga labaw pa nga magahi, ug sa ingon ang ilang kahimtang mahimo nga labaw ka dautan kay sa wala pa sila masayud niini nga mga butang” (Alma 24:30).

Isip mga ginikanan ug mga lider kinahanglan natong bantayan ang atong mga miyembro ug mga pamilya, magtabang kanila nga mapalayo niadtong mga butang nga makadala kanila ngadto sa espirituhanong kamatayon. Magtinguha usab kita sa pagluwas niadtong kinsa patay na karon ngadto sa mga butang nga espirituhanon ug motabang kanila nga “matawo pag-usab; oo, matawo sa Dios, mausab gikan sa ilang kalibutanon ug napukan nga kahimtang, ngadto sa usa ka kahimtang sa pagkamatarung, ingon nga natubos sa Dios, nahimo nga iyang anak nga mga lalaki ug anak nga mga babaye” (Mosiah 27:25).

Ang espirituhanong pagkaayo niadtong kinsa namatay ngadto sa mga butang kabahin sa pagkamatarung moabut pinaagi sa gahum sa Pag-ula, sa pagkakabig sa kamatuoran, ug sa pagsunod sa mga baruganan sa pagkamatarung.

Ang pagtudlo sa atong mga miyembro ug mga pamilya mahitungod sa mga butang kabahin sa pagkamatarung mahinungdanon diha sa proseso sa pagkab-ot og malungtarong pagkakabig kay mahimong modala kini kanila ngadto sa pagbaton og husto nga kahibalo sa mga sugo sa Ginoo, sa mga baruganan ug mga doktrina sa ebanghelyo ug sa mga gikinahanglan ug sa mga ordinansa nga kinahanglan gayud natong buhaton aron makab-ot ang kaluwasan sa gingharian sa Ginoo.

Adunay daghang mga ehemplo diha sa mga kasulatan nga nagpamatuod sa kamahinungdanon sa pagtudlo sa “mga butang kabahin sa pagkamatarung” aron pagtabang nga makab-ot ang usa ka malungtaron nga pagkakabig. Diha sa asoy nga gihatag mahitungod nila ni Ammon ug sa iyang kaigsoonan nga nagsangyaw sa ebanghelyo taliwala sa mga Lamanite, atong mabasa: “Ug si Ammon misangyaw ngadto sa mga katawhan ni haring Lamoni; ug nahinabo nga siya mitudlo kanila sa tanan nga mga butang mahitungod sa mga butang kabahin sa pagkamatarung” (Alma 21:23).

Atong makita ang mga resulta sa makugihong pagtudlo sa tanang mga butang kabahin sa pagkamatarung samtang nagpadayon kita sa pagbasa sa asoy diha sa kapitulo 23, diin nag-ingon kini, “Ingon ka tinuod ang gidaghanon sa mituo, o kutob sa nadala ngadto sa kahibalo sa kamatuoran … nakabig ngadto sa Ginoo, [ug] wala gayud mobiya” (Alma 23:6).

Sa dihang si Alma nga Tigulang mi-establisar sa Simbahan, mipahinungod siya og takus nga mga lalaki isip ilang mga priest ug mga teacher kinsa “mibantay ibabaw sa ilang mga katawhan, ug nag-amuma kanila sa mga butang kabahin sa pagkamatarung” (Mosiah 23:18).

Ang mga ginikanan adunay mahinungdanon nga tahas sa pagtabang sa ilang mga anak nga makasabut sa mga butang kabahin sa pagkamatarung. Diha sa Basahon ni Mormon atong makita nga si Alma nga Batan-on, naguol kaayo tungod sa kadautan, sa mga gubat, ug mga panagbingkil nga anaa ug nahasol tungod sa kagahi sa kasingkasing sa iyang katawhan, “misugo nga ang iyang anak nga mga lalaki kinahanglan magkapundok, nga unta siya makahatag ngadto kanila matag usa sa iyang katungdanan sa tinagsa-tagsa, mahitungod sa mga butang kabahin ngadto sa pagkamatarung” (Alma 35:16; emphasis gidugang).

Makapaikag nga hunahunaon nga siya mitudlo ug mihatag sa iyang mga anak sa ilang katungdanan sa tinagsa-tagsa, mipahiangay sa iyang mga panudlo ngadto sa matag usa ka anak nga lalaki, sumala sa mga panginahanglan niana nga anak. Mihatag siya og pagpamatuod ug mitudlo kanila sa doktrina ug mga baruganan, nag-andam kanila sa pagsangyaw niadtong sama nga mga baruganan ngadto sa uban.

Sa panahon nga ang pamilya atakihon sa mga pwersa sa dautan ug kon ang mga kahimtang diin kita nagpuyo dili kaayo lahi niadtong nasinati ni Alma, ang Unang Kapangulohan ug ang Korum sa Napulog Duha mipahimutang diha sa “Ang Pamilya: Usa ka Pamahayag ngadto sa Kalibutan” nga ang “mga ginikanan adunay sagrado nga katungdanan sa pag-amuma sa ilang mga anak sa paghigugma ug pagkamatarung” (Liahona, Okt. 2004, 49).

Naglakip kini sa pag-amuma, pagsuporta, ug pagtudlo sa mga anak sa tanang mga butang kabahin sa pagkamatarung aron magpabilin sila nga lig-on, nga ang ilang “bat-ang gibaksan uban sa kamatuoran, nga adunay gisul-ob nga taming sa pagkamatarung, ug ang [ilang] mga tiil hinapinan uban sa pagpangandam sa ebanghelyo sa kalinaw” (D&P 27:16).

Sama usab sa panahon ni Alma, ang atong mga lider nagbantay usab sa mga miyembro sa Simbahan ug nag-amuma kanila sa mga butang kabahin sa pagkamatarung. Kadto nga mga butang makatabang kanato nga makab-ot ang malungtaron nga pagkakabig. Diha sa dokumento nga “Leadership Training Emphasis,” gibag-o pagka Disyembre 10, 2009, ang Unang Kapangulohan ug ang Korum sa Napulog Duha mihangyo nga ang mga lider sa priesthood ug sa auxiliary “moawhag sa matag sakop sa pamilya, mga ginikanan ug mga anak, sa pagtuon sa mga kasulatan, mag-ampo kanunay, ug magsunod sa ebanghelyo ni Jesukristo” (Sulat sa Unang Kapangulohan, Dis. 15, 2009).

Ang pagtuon sa mga kasulatan, pag-ampo kanunay, ug pagsunod sa ebanghelyo ni Jesukristo mao ang mga buhat sa pagkamatarung, ug ang Ginoo mipadayag niining talagsaon nga saad: “Siya kinsa nagbuhat og mga buluhaton sa pagkamatarung makadawat sa iyang ganti, gani ang kalinaw niini nga kalibutan, ug kinabuhi nga dayon diha sa kalibutan nga umaabut” (D&P 59:23).

Aron mas epektibo nga matudlo ang mga butang kabahin sa pagkamatarung, importante nga masabtan nga, agig dugang ngadto sa pagpaambit og kasayuran, kinahanglan gayud nga kita mopasayon sa pinadayag. Niining paagiha, ang tawo nga gitudloan mahimong mobati sa tinguha nga masayud niini nga mga baruganan alang sa iyang kaugalingon.

Ang Ginoo mipadayag ngadto kang Hyrum Smith pinaagi sa iyang igsoong lalaki nga si Propeta Joseph Smith:

“Ako mohatag nganha kanimo sa akong Espiritu, nga mohatag og kahayag sa imong hunahuna, nga mopuno sa imong kalag uban sa hingpit nga kalipay;

“Ug unya ikaw masayud … sa tanan nga bisan unsa nga mga butang nga ikaw nagtinguha kanako, diin kalabut ngadto sa mga butang sa pagkamatarung, diha sa hugot nga pagtuo nagtuo ngari kanako nga ikaw makadawat” (D&P 11:13–14).

Sa pagtapus, ang mga kasulatan mipasidaan kanato mahitungod sa kakuyaw sa pagkamatay ngadto sa mga butang kabahin sa mga butang sa pagkamatarung ug sa malisud nga mga sangputanan nga anaa niini alang niadtong kinsa, human nalamdagan sa Espiritu sa Dios, nakasala ug nakalapas.

Ang pagtudlo sa mga butang kabahin sa pagkamatarung usa ka importante nga elemento sa pagtabang sa mga tawo nga mahibalo sa kamatuoran, makabig, ug magpabilin nga lig-on diha sa pagtuo kang Kristo hangtud sa katapusan.

Ang mga ginikanan adunay sagrado nga katungdanan sa pagtudlo sa ilang mga anak mahitungod sa mga butang kabahin sa pagkamatarung. Ang mga lider ug mga magtutudlo makahimo sa pagbantay ug pag-amuma sa mga miyembro nga ubos sa ilang pag-atiman, makugihong magtudlo kanila sa tanang mga butang kabahin sa pagkamatarung.

Mahimo kining makab-ot sa mas epektibo nga paagi kon ang pinadayag napasayon atol sa proseso sa pagtudlo, sa ingon magmugna og tinguha diha sa mga tawo nga malamdagan sa Espiritu sa Dios. Dayon samtang sila mopakita og hugot nga pagtuo, ang Espiritu makapahibalo kanila sa mga butang kabahin ngadto sa pagkamatarung. Niini nga mga butang ako nagpamatuod sa pangalan ni Jesukristo, amen.