Siya Buhi! Tanang Himaya ngadto sa Iyang Pangalan!

Kini buntag sa Pasko sa Pagkabanbaw, kanang balaan nga adlaw nga gitakda sa tibuok Kristohanong kalibutan sa pagsaulog sa kalampusan ni Jesukristo batok sa kamatayon. Ang Iyang Pagkabanhaw mibugto sa giingon nianang puntoha nga mao ang dili matarug nga mga kadena sa kamatayon. Iyang giablihan ang agianan diin ang matag usa sa mga anak sa Langitnong Amahan nga natawo dinhi sa yuta makabaton og oportunidad sa pagbangon gikan sa kamatayon aron mabuhi pag-usab.

Unsa ka dako ang pagmaya sa atong Langitnong Amahan nianang sagrado nga adlaw sa dihang ang iyang hilabihan ka masulundon, hingpit sa katakus nga Anak mibugto sa mga kadena sa kamatayon. Unsa ang mahangturong katuyoan sa plano sa kalipay sa atong Amahan gawas kon kini pagahimoong epektibo pinaagi sa walay kinutuban ug walay katapusan nga Pag-ula sa Iyang mahimayaon nga masulundong Anak? Unsa ang mahangturong katuyoan nga maggikan sa Paglalang sa yuta, diin ang mga espiritu hatagan og lawas, kon ang kamatayon mao lamang ang katapusan niini ug walay bisan usa nga mabanhaw? Unsa ka mahimayaon kana nga buntag alang sa tanan nga nakasabut sa kamahinungdanon niini.

Ang Pasko sa Pagkabanhaw mao ang sagrado nga panahon dihang ang kasingkasing sa matag deboto nga Kristiyano mopadangat og mapaubsanong pasalamat ngadto sa minahal nga Manluluwas. Usa kini ka panahon nga kinahanglang magdala og kalinaw ug hingpit nga kalipay sa tanan nga nahigugma Kaniya ug mopakita niini pinaagi sa pagsunod sa Iyang mga sugo. Ang Pasko sa Pagkabanhaw nagdala og mga hunahuna mahitungod kang Jesus, sa Iyang kinabuhi, sa Iyang Pag-ula, sa Iyang Pagkabanhaw, sa Iyang gugma. Mibangon siya gikan sa patay “uban sa pagpang-ayo diha sa iyang mga pako” (Malaquias 4:2; 3 Nephi 25:2). O, unsa nato ka kinahanglan kanang pag-ayo nga mahatag sa Manunubos. Ang akong mensahe mao ang mahitungod sa paglaum base sa mga baruganan nga makita diha sa mga pagtulun-an sa Bantugan nga Magtutudlo, si Jesukristo.

Ang mga miyembro sa Ang Simbahan ni Jesukristo sa mga Santos sa Ulahing mga Adlaw makasabut sa mas hingpit nga paagi sa gilapdon ug giladmon sa pag-ayo nga mahatag pinaagi sa Iyang Pag-ula tungod kay anaa kanato ang kahingpitan sa Iyang doktrina. Nakaamgo kita nga ang Iyang kaandam sa pagbuhat uban sa hilabihan nga pag-antus ug pagsakripisyo dili lamang makaapekto kanato dinhi niining kinabuhia apan sa tibuok kahangturan.

Karon nga Pasko sa Pagkabanhaw, samtang kamo naghinumdom sa Pagkabanhaw ug sa bugti nga iyang gibayad ug sa gasa nga gihatag pinaagi sa Pag-ula, pamalandonga kon unsay gitudlo sa mga kasulatan mahitungod niadtong sagrado nga mga panghitabo. Ang inyong personal nga pagsaksi mahitungod sa katinuod niini malig-on. Kinahanglan nga kini mas labaw pa kay sa mga baruganan nga inyong gimemorya. Kinahanglan kining mahimong bahin na sa inyong pagkatawo isip usa ka gamhanang panalipod batok sa nagkadaghan nga kadautan nga nakaapekto sa atong kalibutan.

Si propeta Lehi namahayag og usa ka tulukibon nga kamaturoan sa dihang siya namahayag: “Busa, ang katubsanan moabut pinaagi sa atong Balaan nga Mesiyas; kay siya puno sa grasya ug kamatuoran. Tan-awa, siya mihalad sa iyang kaugalingon sa usa ka sakripisyo alang sa sala, sa pagtuman sa katuyoan sa balaod, sa tanan niadto kinsa adunay usa ka masulub-on nga kasingkasing ug usa ka mahinulsulon nga espiritu; ug nga wala nay lain nga ang katuyoan sa balaod mahimo nga matuman” (2 Nephi 2:6–7). Kana nga kasulatan nagpasabut nga alang sa mga mapahitas-on ug sa mga arogante, kini ingon og daw wala gayuy nahitabo nga Pag-ula.

Si Jesukristo buhi. Siya ang atong Manluluwas, ang atong Manunubos. Siya usa ka mahimayaon, nabanhaw nga nilalang. Siya adunay kapasidad nga mopadangat og gugma nga hilabihan ka gamhanan, hilabihan ka makapadasig ingon nga molabaw sa kapasidad sa mapadayag sa dila sa tawo sa hustong paagi. Iyang gihatag ang Iyang kinabuhi aron sa pagbugto sa mga higot sa kamatayon. Ang Iyang Pag-ula hingpit nga mipalihok sa plano sa kalipay sa Iyang Amahan sa Langit.

Si Jesus nangalagad sa tunga-tunga tali sa kaangayan ug kalooy pinasikad sa atong kamasulundon sa Iyang ebanghelyo. Siya ang kahayag alang sa tanang katawhan. Siya ang tuburan sa tanang kamatuoran. Siya nagtuman sa tanan Niyang mga saad. Ang tanan nga nagsunod sa Iyang mga sugo makaangkon sa labing mahimayaon nga mga panalangin nga maabut sa hunahuna.

Kon wala ang Pag-ula, ang plano sa kalipay sa Amahan sa Langit dili unta hingpit nga magamit. Ang pag-ula naghatag sa tanan og oportunidad sa pagbuntog sa mga sangputanan sa mga sayop nga nahimo sa kinabuhi. Kon motuman kita og balaod, makadawat kita og panalangin. Kon mosupak kita og balaod, wala nay sobra gikan sa ninglabay nga kamasulundon aron sa pagtagbaw sa mga gipangayo sa kaangayan alang nianang nasupak nga balaod. Ang Pag-ula sa Manluluwas nagtugot kanato sa paghinulsol sa bisan unsa nga pagsupak ug sa ingon makalikay sa mga silot nga mapahamtang unta sa hustisya.

Ang akong balaang pagtahud ug pasalamat alang sa Pag-ula sa Balaan sa Israel, sa Prinsipe sa Pakigdait ug sa atong Manunubos, padayon nga milambo samtang naningkamot ako nga makasabut og dugang pa kalabut niini. Nakaamgo ako nga walay mortal nga hunahuna nga makasabut sa igong paagi, gani walay tukmang mapadayag sa dila sa tawo, sa hingpit nga kahulugan sa tanan nga nabuhat ni Jesukristo alang sa mga anak sa atong Langitnong Amahan pinaagi sa Iyang Pag-ula. Apan mahinungdanon nga matag usa kanato makat-on kutob sa atong mahimo kalabut niini. Ang Pag-ula mao kanang mahinungdanong lamas sa plano sa kalipay sa atong Amahan sa Langit diin kon wala kini kana nga plano wala unta magamit. Ang inyong panabut sa Pag-ula ug sa hunahuna nga mahatag niini sa inyong kinabuhi makapalambo kaayo sa inyong mapuslanon nga paggamit sa tanang kahibalo, kasinatian, ug sa kahanas nga inyong naangkon sa mortal nga kinabuhi.

Nagtuo ako nga kini nagtudlo sa pagsulay sa paghunahuna kon unsay gikinahanglan sa Pag-ula gikan sa Amahan ug sa Iyang andam nga Anak. Tulo sa mga hagit nga giatubang sa Manluluwas mao:

Una, usa ka hilabihan ka dako nga responsibilidad, kay nakaamgo Siya nga gawas kon kini hingpit nga mabuhat, walay usa sa mga anak sa Iyang Amahan ang makabalik Kaniya. Hangtud sa hangtud na sila nga mawala gikan sa Iyang presensya kay wala man gayuy paagi sa paghinulsol alang sa gisupak nga mga balaod ug walay mahugaw nga butang nga makaadto sa presensya sa Dios. Ang plano sa Iyang Amahan mapakyas unta, ug ang matag espiritu nga anak mapaubos unta sa mahangturong pagkontrolar ug paghasol ni Satanas.

Ikaduha, diha sa Iyang hingpit nga kaputli sa hunahuna ug kasingkasing, Siya kinahanglan nga personal nga mobati sa mga sangputanan sa tanang masugatan sa katawhan, bisan sa labing dautan, makauulaw nga mga sala.

Ikatulo, Siya kinahanglang molahutay sa makalilisang nga pangataki sa mga pundok ni Satanas samtang giduot gayud ngadto sa limitasyon kon asa Siya kutob. Dayon, sa mga rason nga wala pa hingpit nato masayri, samtang anaa sa kinatumyan sa Iyang kapasidad, atol sa panahon nga ang Manluluwas nagkinahanglan kaayo og tabang, ang Iyang Amahan mitugot Kaniya nga mopas-an sa bug-at nga responsibilidad gamit ang Iyang kaugalingon lamang nga kusog ug kapasidad.

Gisulayan nako sa paghunahuna ang hilabihan ka makatandog nga gutlo alang sa atong Amahan sa Langit sa dihang ang Manluluwas mituaw didto sa krus, “Dios ko, Dios ko, nganong gitalikdan mo ako?” (Mateo 27:46; Marcos 15:34). Dili ko motuo nga ang Amahan sa Langit mitalikod sa Iyang Anak didto sa krus. Ako nagtuo nga ang pagtuaw nahimo sa dihang ang Anak mibati nga nawad-an sa mapaluyuhong suporta nga kanunay Niyang natagamtaman gikan sa Iyang Amahan. Ang Iyang Amahan nasayud nga ang Manluluwas kinahanglan nga mohuman sa Pag-ula sa bug-os ug sa hingpit nga paagi nga Siya ra, nga walay suporta sa gawas. Ang Amahan wala mobiya sa Iyang Anak. Mihimo Siya niini nga posible alang sa Iyang perpekto nga Anak sa pagdaug sa mahangturong mga bunga sa Pag-ula.

Walay usa kanato nga igo gayud nga makapasalamat dinhi sa mortalidad sa hingpit nga makaayo nga mga sangputanan sa Pag-ula.

Adunay labihan ka importante nga panginahanglan alang sa matag usa kanato sa paglig-on sa atong panabut sa kamahinungdanon sa Pag-ula ni Jesukristo nga mahimo kining dili matarug nga pundasyon kon asa nato tukuron ang atong mga kinabuhi. Samtang ang kalibutan nawad-an og dugang pa nga sukaranang mga sumbanan ug samtang ang dungog, hiyas, ug kaputli gianam-anam og salikway aron sa pagpangita og pisikal o emosyonal nga mga tinguha, ang atong panabut ug hugot nga pagtuo sa Pag-ula ni Jesukristo makahatag og kalig-on ug kapasidad nga gikinahanglan alang sa usa ka malampuson nga kinabuhi. Makadala usab kini og pagsalig sa mga panahon sa pagsulay ug kalinaw sa mga gutlo sa kagubot.

Madasigon akong moawhag kaninyo sa pag-establisar og personal nga plano sa pagtuon aron mas makasabut ug makapasalamat sa walay ikatandi, mahangturon, walay kinutuban nga mga sangputanan sa hingpit nga pagtuman ni Jesukristo sa Iyang balaanong gitakda nga tawag isip atong Manluluwas ug Manunubos. Ang mas lawom nga personal nga pagpamalandong sa kasulatan inubanan sa pagsiksik, kinasingkasing nga pag-ampo molig-on sa inyong panabut ug pasalamat alang sa Iyang bililhon nga Pag-ula. Laing gamhanang paagi sa pagkat-on mahitungod kang Jesukristo ug sa Iyang pag-ula mao ang kanunay nga pagtambong sa templo.

Unta ang matag usa kanato mobag-o sa atong determinasyon sa pagtudlo og tinuod nga mga baruganan sulod sa kasagrado sa atong mga panimalay. Sa atong pagbuhat niana, mahatag nato ang labing dako nga oportunidad sa kalipay alang sa espiritu nga mga anak nga gisalig nga atong atimanon. Gamita ang Simbahan isip usa ka matarung nga himan sa paglig-on sa panimalay, apan ilha nga isip mga ginikanan kita adunay nag-unang responsibilidad ug pribilehiyo nga magiyahan sa Ginoo sa pagpadako sa espiritung mga anak nga Iyang gisalig sa atong pag-atiman.

Ang pinakaimportante sa pagtudlo sa kamatuoran diha sa panimalay mao ang mag-una. Ang Simbahan importante, apan diha sa panimalay ang mga ginikanan mohatag sa gikinahanglan nga panabut ug direksyon alang sa mga anak. Sa tinuod ginaingon, nga ang labing importante nga mga calling sa karon ug sa kahangturan mao kadtong sa amahan ug sa inahan. Moabut ang panahon nga ma-release kita gikan sa tanang mga buluhaton nga atong madawat, apan dili sa pagka-amahan ug sa pagka-inahan.

Samtang mamalandong kamo—dili lamang kay mobasa, apan mohunahuna ug mamalandong—sa mga tudling sa kasulatan, ang gahum sa Espiritu Santo modala sa mga kamatuoran diha sa inyong hunahuna ug kasingkasing isip sigurado nga pundasyon dinhi niining walay kasiguroan nga panahon diin kita nagpuyo. Isip mga ginikanan, andama ang inyong mga anak alang sa mga hagit nga ilang sagubangon. Tudloi sila sa kamatuoran, awhaga sila sa pagtuman niini, ug mamaayo ra sila bisan unsa pa man ka grabe ang pagtay-og sa kalibutan.

Niining Pasko sa Pagkabanhaw, desisyuni ang paghimo ni Ginoong Jesukristo nga sentro sa pagpuyo diha sa inyong panimalay. Siguroha nga ang matag desisyon nga inyong himoon, ma-espirituhanon man kini o ma-pisikal, magiyahan sa hunahuna nga “Unsa may gusto ni Ginoong Jesukristo nga akong buhaton?” Kon ang Manluluwas mao ang sentro diha sa inyong panimalay, mapuno kini sa kalinaw ug kahilum. Adunay diwa sa hilum nga kasiguroan nga mopuno sa panimalay nga parehong mabati sa mga anak ug sa mga hamtong.

Ang pinakamaayo nga paagi sa paghimo og permanente nga kausaban alang sa maayo mao ang paghimo ni Jesukristo nga inyong modelo ug sa Iyang mga pagtulun-an nga giya sa inyong kinabuhi.

Kon kamo nahimong masinupakon sa Iyang mga sugo ug mibati nga dili angayan hunahunaa nga mao kini kon nganong ang Ginoo, si Jesus ang Kristo, mitugyan sa Iyang kinabuhi. Pinaagi sa Iyang Pag-ula Iyang giablihan hangtud sa hangtud ang oportunidad sa pagbuntog sa ingon nga mga sayop, sa paghinulsol sa dili husto nga mga pagpili, ug sa pagbuntog sa negatibong mga epekto sa usa ka kinabuhi nga sukwahi sa Iyang mga pagtulun-an.

Ang Manluluwas nahigugma sa matag usa kanato ug mohimong posible nga ang atong matag panginahanglan matubag samtang kita makasarang pinaagi sa pagsunod alang sa tanang mga panalangin nga Iyang gusto nga atong maangkon dinhi sa yuta. Ako naghigugma ug nagdayeg Kaniya. Isip may katungod Niya nga sulugoon ako kinasingkasing mga mopamatuod sa matag kapasidad sa akong pagkatawo nga Siya buhi, sa pangalan ni Jesukristo, amen.