Ayaw, Ayaw, Ayaw Gayud Pag-undang!

Sa miaging Agosto among gidala ang pipila sa among mga apo didto sa Timpanogos Cave National Monument, usa sa labing inila nga mga adtoanan sa Utah. Kinahanglan kang maglakaw og 2.4 km sa lisud kaayo nga agianan aron makaabut sa langub apan igo gayud kaayo ang paningkamot aron masaksihan ang maanindot nga langub, galikos nga mga porma. Sigurado ako nga ang siyam ka tuig nga si Ruthie maglisud og diyutay, apan akong gihunahuna kon ang unom ka tuig nga si Caroline aduna bay kalig-on ug kusog sa pagbuhat niini sa tibuok biyahe.

Kaming tanan naghinam-hinam kaayo sa pagsugod og lakaw ug, sa sinugdanan, paspas kaayo ang among paglakaw subay sa sementadong agianan. Dali kaayo namong nalakaw ang ikaupat nga bahin sa among adtoan, apan mas dugay namong naabut ang tunga-tunga nga bahin. Ang kadasig ni Caroline misugod na sa pagkawala. Si Ruthie maayo ra ug midasig ni Caroline sa pagpadayon. Naghinayhinay mi aron makaapas si Caroline. Dayon daw ang tanan dili maayo ang nahitabo. Miabut ang kusog nga hangin ug ang abog gumikan sa hangin nakapalisud nga makita ang agianan. Medyo makalilisang ug daw dili pa kadto igo, nakaagi kami og usa ka dapit nga may sulat sa pahimangno nga mabasa, “Puy-anan sa Bitin. Ayaw pagtipas sa Agianan. Pabilin nga Luwas.”

Hinay-hinay kami nga naglakaw, sa ikatulo nga bahin sa among tumong, apan may katkatunon pa gihapon kami nga pinakatungasong bahin sa bukid. Gikapoy, nahadlok ug nagduha-duha sa iyang mga abilidad, si Caroline milingkod ug miingon nga naghilak, “Undang na ko! Dili na ko makapadayon!”

Nanglingkod kami, ug gihisgutan namo kon unsay kinahanglan namong buhaton. Mihimo kami og plano. Mihukom kami sa pag-ihap sa among mga lakang ug tan-awon kon unsay among bation human sa 100 ka lakang. Si Ruthie ug ako misiguro kang Caroline nga siya among tabangan. Mangita kami og usa ka butang sa agianan nga makalipay kanamo ug ipakigbahin ang among mga nadiskobrihan. Gani kami nanganta og pipila ka mga kanta sa Primary.

Ang tanan nausab. Si Caroline mipili sa pagsunod sa plano. Ang usa ka gatos ka lakang mihimo sa usa ka imposible nga tahas nga ingon og posible. Nasayud si Caroline nga motabang kami kaniya, ug samtang nangita kami og maayong mga butang sa among palibut ug nanganta, kami mibati nga mas malipayon.

Kamo nahadlok na ba ug nawad-an og kadasig samtang kamo miatubang og hagit nga daw lisud kay sa inyong makaya? Nasulayan ba ninyo nga kamo gusto nang moundang?

Hunahunaa kon unsa kaha ang gibati ni Josue, ang umaabut nga puli sa halangdong propeta nga si Moises, sa pagkasayud nga siya ang modala sa mga anak sa Israel ngadto sa gisaad nga yuta. Dunay mga higayon, sigurado ako nga siya gusto nang moundang. Apan ang Ginoo mihupay kaniya pinaagi sa pagpahinumdom kaniya sa makatulo ka higayon nga magmakusganon ug magmaisugon (tan-awa sa Josue 1:6–9). Uban sa hugot nga pagtuo nga ang Dios mag-uban kanila, ang mga anak sa Israel mipasalig, “Ang tanan nga imong gisugo … among pagabuhaton” (Josue 1:16).

Ang mga kasulatan puno sa mga asoy sa mga lalaki ug mga babaye kinsa mipakita og dakong kaisug sa pagbuhat bisan unsa ang gisugo sa Ginoo, bisan gani og ang mga tahas daw imposible, bisan gani og sila unta gusto na nga moundang.

Unsa man ang gusto sa Ginoo nga inyong buhaton? Gusto Siya nga kamo magmaisugon ug magmahiyason nga anak nga babaye sa Dios, masaligon sa pagpakabuhi matag adlaw aron kamo mahimong takus sa pagdawat sa mga panalangin sa templo ug makabalik ngadto Kaniya. Sa kalibutan karon ang ingon niana nagkinahanglan og kaisug. Anaa kaninyo ang plano sa kaluwasan, nga naghimong posible nga mahimo kini. Ang matarung nga kabubut-on, ang abilidad sa pagpili, mao ang mahinungdanon nga bahin niini nga plano. Nakahimo na kamo og pipila ka maayo nga mga pagpili. Sa wala pa kamo matawo, mipili kamo nga moanhi sa yuta aron sa pagdawat og lawas ug sa pagsulay sa inyong kaugalingon. Mipili kamo sa pagpabunyag, nga mao ang unang gikinahanglan nga ordinansa ngadto sa dalan sa kinabuhing dayon. Karon kamo nagsinati na sa mortal nga kinabuhi, diin kamo nagpadayon sa paghimo og mga pagpili, sa pagkat-on, ug sa paglambo. Ang paghimo og sagradong mga pakigsaad ug pagdawat sa mga ordinansa sa templo mao ang laing importante nga lakang diha sa plano.

Samtang kamo nagkatigulang, batan-ong mga babaye, ang dalan nahimong mas tungason, ug tingali gusto na kamo nga moundang. Ang kinabuhi mas mahagiton, puno sa mga desisyon ug mga tintasyon sa matag higayon. Si Satanas mopahuros og hangin sa kalibug aron makapangutana kamo kon kini mao ba ang dalan nga gusto ninyong subayon. Mahimong matintal kamo sa pagsubay og lain nga dalan, bisan kon adunay mga gibutang nga pahimangno sa kakuyaw. Mahimong magduha-duha kamo sa inyong mga abilidad ug mahimong maglibug kamo sama sa usa ka batan-ong babaye, “Posible ba gayud nga magpabiling mahiyason sa kalibutan karon?” Ang tubag, akong batan-ong mga higala, mao ang “Oo!” Ug ang akong tambag kaninyo susama niadtong gihatag ni Winston Churchill atol sa Ikaduhang Gubat sa Kalibutan: ayaw, ayaw, ayaw gayud pag-undang! (tan-awa sa “Never Give In” [pakigpulong, Harrow School, London, England, Okt. 29, 1941]).

Magkinahanglan kini og dakong kaisug, apan anaa kaninyo ang Iyang plano! Unsa man ang makatabang kaninyo sa pagsunod sa plano ug mahimong maisugon ug mahiyason nga anak nga babaye sa Dios? Una, pagbaton og hugot nga pagpamatuod, pagtulun-an human sa pagtulun-an. Ikaduha, tinguhaa ang panabang sa Langitnong Amahan, ni Jesukristo, sa inyong pamilya ug sa uban kinsa mosuporta kaninyo sa inyong desisyon sa pagsunod sa plano. Ug sa katapusan, pagpuyo nga takus sa pakig-uban sa Espiritu Santo.

Mahitungod sa kaimportante sa pagbaton og lig-on nga pagpamatuod, si Presidente Thomas S. Monson misaad sa batan-ong mga babaye, “Ang inyong pagpamatuod, kon kanunayng giamumahan, mopabilin kaninyo nga luwas” (“Unta Kamo Adunay Kaisug,” Liahona, Mayo 2009, 126).

Ang inyong pagpamatuod gipalig-on “inanay nga motubo pinaagi sa inyong mga kasinatian. Walay usa nga dihadiha dayon makadawat og hingpit nga pagpamatuod” (Matinud-anon sa Tinuhoan: Usa ka Pakisayran sa Ebanghelyo [2004], 165). Inyong mahinumduman nga aron makakatkat sa labing tungason nga bahin sa bukid, kita mohimo niini pinaagi sa usa ka lakang sa usa ka higayon. Sa pagbaton og usa ka pagpamatuod, kamo kinahanglan nga moamuma niini pinaagi sa pagtulun-an human sa pagtulun-an. “[Ang inyong pagpamatuod] molambo samtang kamo mohimo og mga desisyon sa paghupot sa mga sugo. Samtang kamo nagbayaw og naglig-on sa uban, inyong makita nga ang inyong pagpamatuod nagpadayon sa paglambo.” Samtang kamo moestablisar og personal nga mga kinaiya sa pag-ampo, pagtuon sa kasulatan, pagkamasulundon sa mga kasugoan, ug pagserbisyo sa uban, “kamo mapanalanginan uban sa mga kahigayunan sa pagdasig nga [molig-on] sa inyong pagpamatuod” (tan-awa sa Matinud-anon sa Tinuhoan, 165–66).

Ang Personal nga Kauswagan naghatag og talagsaon nga paagi alang kaninyo aron sa pag-amuma sa inyong pagpamatuod pagtulun-an human sa pagtulun-an. Ang mithianon nga mga kasinatian ug mga proyekto mao ang ginagmayng mga lakang nga moamuma sa inyong pagpamatuod mahitungod kang Jesukristo samtang kamo magkat-on sa Iyang mga pagtulun-an ug sa kasagaran mogamit niini sa inyong kinabuhi. Kini nga mapadayunon nga pag-amuma mopabilin kaninyo nga luwas diha sa dalan.

Ikaduha, tinguhaa ang panabang sa uban sa paghatag kaninyo og dugang kusog ug suporta. Dangup og una sa inyong Langitnong Amahan pinaagi sa pag-ampo. Kamo Iyang anak. Siya nakaila kaninyo ug nahigugma kaninyo. Siya nakadungog ug motubag sa inyong mga pag-ampo. Gitudloan kita sa makadaghang higayon diha sa mga kasulatan sa “pag-ampo sa kanunay” (tan-awa, pananglitan, sa D&P 90:24). Samtang kamo mag-ampo, ang Ginoo mag-uban kaninyo maingon nga ang Ginoo nag-uban kang Josue.

Kita sa matag usa nagkinahanglan sa panabang sa Manluluwas sa pagsunod sa plano ug pagbalik ngadto sa atong Amahan sa Langit. Tingali kamo mihimo og pipila ka mga sayop o misugod sa lain nga dalan. “Tungod kay ang Manluluwas nahigugma kaninyo ug mihatag sa Iyang kinabuhi para kaninyo, kamo mahimong maghinulsol.… Ang maulaong sakripisyo sa Manluluwas nakahimo niini nga posible alang kaninyo nga mapasaylo sa inyong mga sala” (Personal nga Kauswagan sa Young Women [booklet, 2009], 71). “Kon kamo maghinulsol sa labing madali, dali ninyong mahibaloan ang mga panalangin nga moabut gikan sa kapasayloan” (Alang sa Kalig-on sa mga Kabatan-onan, [pamphlet, 2001], 30).

Hunahunaa karon nga mobuhat sa unsay gikinahanglan sa paghinulsol. “Moambit sa sakrament sa takus nga paagi matag semana ug pun-a ang inyong kinabuhi uban sa mahiyason nga mga kalihokan nga magdala og espiritwal nga gahum. Samtang kamo naghimo niini, kamo motubo nga mas lig-on sa inyong abilidad sa pagbatok sa pagtintal, paghupot sa mga sugo, ug mahimong mas sama kang Jesukristo” (Personal nga Kauswagan sa Young Women, 71).

Ang mga propeta sa ulahing mga adlaw anaa sa yuta aron sa pagtabang usab kaninyo. Ang mga propeta namulong karong panahona. Hangupa ang ilang mga pulong. Sila mohatag kaninyo sa mga pahimangno nga mopasidaan kaninyo sa kakuyaw ug mopabilin kaninyo nga luwas diha sa dalan. Ang mga sulat sa pahimangno nga piho alang kaninyo makita sa Alang sa Kalig-on sa mga Kabatan-onan. “Sunda ang propeta; siya nasayud sa dalan” (Children’s Songbook, “Follow the Prophet,” 110–11).

Usa sa dagkong mga panalangin sa plano mao nga kita gi-organisar ngadto sa mga pamilya. Kamo adunay mga ginikanan kansang mas dakong kaalam ug kasinatian motabang kaninyo sa pagkab-ot sa inyong balaanong potensyal. Salig kanila. Gusto nila ang labing maayo alang kaninyo.

Magkat-on gikan sa inyong inahan, sa inyong apohang babaye, ug sa ubang matarung nga mga babaye nga adunay lig-on nga mga pagpamatuod. Ang papel sa usa ka inahan diha sa plano mao ang tigmatuto. Mga inahan, walay lain nga nahigugma sa inyong anak nga babaye sama sa inyong nabuhat. Kamo ang ilang labing maayo nga lider, magtutudlo, ug ehemplo. Kami manghinaut nga kamo modawat sa pagdapit nga magtrabaho sa Personal nga Kauswagan uban ang inyong anak nga babaye. Sa akong nakat-unan sa pagtrabaho sa mithianon nga hiyas uban sa akong inahan , ang inyong relasyon molig-on ug kamong duha mapanalanginan pinaagi sa inyong gugma, suporta, ug pagdasig sa usag usa.

Mga kabatan-onan, pilia ang maayo nga mga higala kinsa mosuporta kaninyo sa inyong matarung nga desisyon sa pagsunod sa plano. Sama ni Ruthie, kinsa mihatag og pagdasig ngadto kang Caroline, kami nasayud nga daghan kaninyo ang makahimo og dako sa paglig-on sa usag usa. Human ninyo madawat ang inyong Pahalipay sa Batan-ong Pagkababaye, inyo na usab nga higayon nga mahimong “magulang nga igsoong babaye.” Ang pag-angkon sa inyong Honor Bee mohatag kaninyo og mga oportunidad sa paglig-on sa laing batan-ong babaye uban sa inyong matarung nga ehemplo ug pagpamatuod samtang kamo magtudlo kaniya sa iyang Personal nga Kauswagan.

Sa katapusan, pagpuyo nga takus sa pakig-uban sa Espiritu Santo. Sa dihang kami mitabang ni Caroline, mitan-aw sa maayong mga butang sa among palibut, ug gani nanganta sa mga kanta sa Primary, kami midapit sa Espiritu. Mibati kami og gugma, kalipay ug kalinaw, nga mao ang mga bunga sa Espiritu (tan-awa sa Mga Taga-Galacia 5:22). Kamo magkinahanglan nianang kalinaw ug kasigurohan kon si Satanas mosulay sa paglibug kaninyo gamit ang hangin sa pagduha-duha, kon kamo gitintal sa pagsunod sa laing dalan, o kon ang uban dili makiangayon o motamay kaninyo sa inyong gituohan.

Ipakigbahin nako kaninyo ang kasinatian ni Julie, usa ka batan-ong babaye kinsa nakahimo sa pag-atubang og usa ka hagit pinaagi sa pagsunod sa mga pag-aghat sa Espiritu Santo. Siya nagtuon sa Daang Tugon usa ka adlaw, ug adunay misantup sa iyang hunahuna, “Basaha ang Mateo 5. Basaha ang Mateo 5.” Siya naghunahuna, “Nganong misantup man sa akong hunahuna ang pagbasa sa Bag-ong Tugon?” Siya mibuhat niana nga pag-aghat ug mibasa sa Mateo, “Higugmaa ninyo ang inyong mga kaaway ug pag-ampo kamo alang sa mga magalutos kaninyo” (Mateo 5:44).

Pagkasunod adlaw siya adunay pipila ka mga kalisdanan sa iyang mga higala kinsa dili makiangayon ug mibudhi kaniya. Sa sinugdanan siya nahiubos kaayo, ug dayon siya naghunahuna, “Naandam na ako alang niini. Ang Espiritu miaghat kanako sa pagbasa sa Mateo, ug kinahanglan gayud akong mohigugma ug mopasaylo sa akong mga higala.” Ang gamay nga lakang sa pagbasa sa mga kasulatan miandam kaniya sa pagtubag sa usa ka Kristohanon nga paagi. Gikan niana nga kasinatian, siya nakabaton og kasigurohan nga ang Ginoo nakaila kaniya, ug pinaagi sa pag-aghat sa Espiritu Santo, siya nasayud kon unsay iyang buhaton.

Akong hinigugmang batan-ong mga babaye, ako nakahimamat og daghan kaninyo kinsa, sama ni Julie, wala gayud moundang sa dihang miatubang sa lisud nga mga kahimtang apan mipili sa pagsunod sa plano. Ako nag-ampo nga pinaagi sa pagtulun-an human sa pagtulun-an kamo mopadayon sa paglig-on sa inyong pagpamatuod. Pangitaa ang panabang sa atong Langitnong Amahan, ni Jesukristo, sa mga propeta, ug sa uban kinsa mosuporta kaninyo sa inyong desisyon sa pagsunod sa plano. Pagpuyo og mahiyason nga kinabuhi aron kamo adunay pakig-uban sa Espiritu Santo aron sa paggiya kaninyo sa luwas nga paagi. Ako nagpamatuod nga kon kamo mobuhat niining mga butanga, ang Ginoo mag-uban kaninyo ug kamo makahimo sa pagpabilin diha sa dalan nga nagpaingon ngadto sa templo ug ngadto sa kinabuhing dayon. “Magmakusganon ka ug magmaisug” (Josue1:9) ug ayaw, ayaw, ayaw gayud pag-undang! Sa pangalan ni Jesukristo, amen.