Elder Juan A. Uceda

Sa dihang si Elder Juan Alberto Uceda Andrade misugod sa pagpangoyab ni Maria Isabel Bendezú—ang babaye nga sa kaulahian iyang naminyoan—siya nasayud kini nga babaye usa ka tawo nga espesyal. Silang duha nakabig sa Simbahan isip mga batan-on, ug silang duha nag-alagad og misyon sa ilang lumad nga nasud, sa Peru.

Apan ang konbiksyon ni Sister Uceda nga magminyo sa templo maoy nakahimo sa kalainan. Nianang higayona, ang labing duol nga templo anaa sa São Paulo, Brazil. “Miabut og pito ka adlaw aron makaadto didto, naggamit sa tanang paagi sa transportasyon nga anaa,” mipasabut si Elder Uceda. “Kami nagbiyahe pinaagi sa bus, awto, barko, tartanilya, tren, trak, ug bisan gani eroplano. Sa dihang kami miabut sa templo, among gihikap ang mga bong-bong aron sa pagsigurado gayud nga kini dili usa ka damgo. Kadto usa ka makapalig-on nga kasinatian alang kanamong duha.”

Ang magtiayon naminyo sa Templo sa São Paulo Brazil niadtong Abril 13, 1979. Sila ginikanan sa lima ka mga anak.

Si Elder Uceda natawo niadtong Hulyo 1953 sa Lima, Peru, ngadto kang Juan Jose Uceda Perez ug Ines Andrade Uceda. Human nga namiyembro sa Simbahan niadtong 1972, si Elder Uceda nagtuon og accounting ug public relations sa Jose Carlos Mariátegui Institute sa Lima. Siya usab nagtuon og business administration sa Centro Andino de G.E. Institute ug nakaangkon og bachelor’s degree in public relations gikan sa San Luis Gonzaga University.

Si Elder Uceda nakatrabaho sa Church Educational System isip area director sa Peru ug Bolivia. Niadtong 2003 siya mibalhin gikan sa Peru ngadto sa New Jersey, USA, aron sa pagtabang sa iyang amahan sa pagpalambo og usa ka negosyo sa pag-edukar ug pagbansay sa pinulongan.

Dugang sa iyang pagpanglagad isip misyonaryo, si Elder Uceda nangalagad isip high councilor, bishop, stake president, presidente sa Lima Peru North Mission, ug Area Seventy. Siya karon nangalagad sa Unang Korum sa Seventy.

“Aduna akoy lig-ong pagpamatuod sa gahum sa personal nga pagpadayag gikan sa Espiritu Santo,” miingon si Elder Uceda. “Kana nga pagpamatuod padayon nga gipamatud-an pinaagi sa mga panalangin nga nagagikan sa pagkamasulundon.”