Aron ang Atong mga Anak Makakita Unta sa Nawong sa Manluluwas

Pipila ka tuig na ang milabay nagtudlo ko sa usa ka grupo sa mga lider sa nursery kon unsaon sa paghatag og usa ka mubo nga leksyon sa ebanghelyo ngadto sa gagmayng mga bata. Ang usa sa mga lider misabak sa iyang gamayng anak nga lalaki. Naggunit ako og usa ka hulagway sa Manluluwas ug, mipakita kon unsaon sa pagpamulong ngadto sa gagmayng mga bata, misugod sa pag-istorya kabahin ni Jesus. Ang gamayng batang lalaki midailos gikan sa sabakan sa iyang inahan, milakaw padulong kanako, mitan-aw og maayo sa hulagway, ug mihikap sa nawong. Nianang puntoha sa leksyon, ako nangutana, “Kinsa man kini?” Nga may pahiyum sa iyang nawong, ang bata mitubag, “si Jesus.”

Kining bataa dili pa ingon ka dako nga maglisud pa gani og litok sa iyang kaugalingong pangalan, apan nakaila siya sa panagway ug nahibalo sa pangalan sa Manluluwas. Samtang nagtan-aw ako niining maanindot nga tubag, naghunahuna ako sa mga pulong sa Manluluwas sa dihang miingon Siya, “Pangitaa ang nawong sa Ginoo sa kanunay, nga sa pagpailub kamo makabaton sa inyong mga kalag, ug kamo makaangkon sa kinabuhi nga dayon” (D&P 101:38).

Unsa man ang gipasabut sa pagpangita sa nawong sa Manluluwas? Sigurado gayud nga kini nagpasabut nga labaw pa sa pag-ila sa Iyang hulagway. Ang pagdapit ni Kristo sa pagpangita Kaniya usa ka pagdapit sa pag-ila kon si kinsa Siya, unsa ang Iyang gihimo alang kanato, ug unsa ang gihangyo Niya nga atong buhaton. Ang pagduol ngadto kang Kristo, ug sa katapusan makakita sa Iyang nawong, moabut lamang kon kita mopaduol Kaniya pinaagi sa atong hugot nga pagtuo ug sa atong mga binuhatan. Moabut kini pinaagi sa tibuok kinabuhi nga paningkamot. Busa sa unsang paagi man kita mangita Kaniya dinhi niining kinabuhia aron kita makakita sa Iyang nawong sa sunod nga kinabuhi?

Kita adunay asoy diha sa 3 Nephi kabahin sa mga tawo nga aktwal gayud nga nakakita sa nawong sa Manluluwas niining kinabuhia. Ug samtang kita tingali dili makakita Kaniya karon, tingali kita makakat-on gikan sa ilang kasinatian. Human sa kamatayon sa Manluluwas, Siya mipakita ngadto niini nga mga tawo, mitudlo kanila, ug mipanalangin kanila. Ug dayon “nahinabo nga siya misugo nga ang ilang gagmay nga mga bata kinahanglan dad-on ngadto kaniya” (3 Nephi 17:11).

Atong sagrado nga responsibilidad isip mga ginikanan ug mga lider niining bag-o nga henerasyon sa mga bata ang pagdala kanila ngadto sa Manluluwas aron makakita sila sa Iyang panagway ug ingon man usab sa panagway sa atong Amahan sa Langit. Sa pagbuhat nato sa ingon, gidala usab nato ang atong kaugalingon.

Usab ang pangutana, unsaon man nato sa pagbuhat niini, ilabi na sa usa ka kalibutan nga puno sa mga babag? Sa 3 Nephi, ang mga ginikanan nahigugma sa Ginoo. Sila mga tumutuo. Aduna silay hugot nga pagtuo sa mga milagro nga gipanghimo ni Jesus. Ilang gihigugma ang ilang mga anak. Sila mitapok kanila aron maminaw sa mga pulong sa Ginoo ug misunod sa Iyang sugo nga dad-on ang mga anak ngadto Kaniya.

Human madala ang mga bata ngadto Kaniya, si Kristo mihangyo sa mga ginikanan sa pagpangluhod. Dayon Iyang gibuhat ngadto kanila kana nga Iyang gibuhat alang kanatong tanan. Siya nag-ampo alang kanila ngadto sa Amahan, ug samtang gibuhat Niya kini, ang Iyang pag-ampo ginaingon nga “labihan ka mahinungdanon ug kahibulongan” nga ang mga pulong dili makahulagway niini (3 Nephi 17:16). Pinaagi sa pagduol ngadto sa Manluluwas ug sa pagdawat sa Iyang Pag-ula, kini nga mga ginikanan nalig-on sa pagbuhat sa tanan nga gikinahanglan sa “pagdala” sa ilang mga anak.

Ang lain nga mga butang nga gihangyo ni Kristo nga buhaton niini nga mga ginikanan makita diha sa 3 Nephi 22:13: “Ang tanan ninyo nga mga anak pagatudloan mahitungod sa Ginoo; ug hilabihan ang kalinaw sa inyong mga anak.”

Ug busa, human sa ilang kaugalingon nga mga kasinatian uban sa Manluluwas, kini nga mga ginikanan nga mga Nephite mitudlo sa ilang mga anak mahitungod Kaniya. Sila mitudlo kanila sa paghigugma sa Ginoo. Sila mitudlo kanila sa Iyang ebanghelyo. Sila mitudlo kanila kon unsaon sa pagsunod niini. Sila mitudlo gayud kanila nga adunay pagkamatarung ug kalinaw sa yuta sulod sa 200 ka tuig (tan-awa sa 4 Nephi 1:1–22).

Karon, hangyoon ko kamo sa pagtan-aw sa inyong palibut niadtong inyong gihigugma. Mao kini ang labing mahinungdanon—ang atong mga pamilya. Sigurado ako nga labaw pa kay sa bisan unsa nga butang, gusto kamo nga kini nga pamilya mainyo sa kahangturan. Ang asoy sa 3 Nephi makatabang kanato sa pagdala sa atong mga anak ngadto Kaniya tungod kay naghatag kini kanato og sundanan nga angayang sundon. Una, kinahanglan gayud natong higugmaon ang Ginoo sa tibuok natong kasingkasing, ug kinahanglan gayud nga atong higugmaon ang atong mga anak. Ikaduha, kinahanglan gayud nga kita mahimong usa ka takus nga ehemplo ngadto kanila pinaagi sa padayon nga pagpangita sa Ginoo ug pagpaningkamot sa pagsunod sa ebanghelyo. Ikatulo, kinahanglan gayud nga atong tudloan ang atong mga anak sa ebanghelyo ug kon unsaon pagsunod sa mga pagtulun-an niini.

Ang pagsunod niini nga sundanan sa pagdala sa atong mga anak ngadto sa Manluluwas usa ka proseso. Tan-awon nato ang sundanan pag-usab. Una, kita kinahanglan gayud nga makat-on kon unsaon sa paghigugma sa Ginoo ug sa atong mga pamilya. Nagkinahanglan kini og panahon, kasinatian, ug hugot nga pagtuo. Nagkinahangln kini sa dili hinakog nga pagserbisyo. Dayon samtang napuno kita sa gugma sa Ginoo, makahigugma kita. Tingali Siya mobakho sa unsay atong gibuhat, apan nahigugma Siya kanato ug anaa kanunay aron sa pagtabang kanato. Mao kana ang kinahanglan natong makat-unan sa paghigugma sa atong mga anak.

Ikaduha, kinahanglan gayud nga kita mahimong takus nga mga ehemplo. Kini usa usab ka proseso. Kon gusto kita nga ang atong mga anak moduol ngadto ni Kristo aron sila makakita unta sa Iyang nawong, mahinungdanon kini nga kita magtinguha nga makakita usab niini. Kinahanglan nga kita masayud sa dalan aron mapakita kini ngadto kanila. Kinahanglan nga atong han-ayon ang atong kaugalingong kinabuhi aron ang mga anak makatan-aw kanato ug mosunod. Tingali makapangutana kita, “Unsa man ang makita sa akong mga anak kon motan-aw sila sa akong nawong? Makita ba nila ang hitsura sa Manluluwas diha sa akong panagway tungod sa kon giunsa nako pagpuyo sa akong kinabuhi?”

Karon hinumdumi, walay usa kanato ang mahimong perpekto nga ehemplo alang sa atong mga anak, apan kitang tanan mahimong takus nga mga ginikanan ug mga lider. Ang atong pagpaningkamot nga mahimong takus usa mismo ka ehemplo. Mahimong mobati kita nga daw usahay pakyas kita, apan makapadayon kita sa pagpaningkamot. Uban sa Ginoo ug pinaagi Kaniya, mahimo kita nga malig-on aron mahimong usa ka tawo nga kita angay nga mahimo. Makahimo kita sa unsay atong kinahanglan nga buhaton.

Ug ikatulo, kita adunay proseso sa pagdala sa atong mga anak ngadto sa Manluluwas pinaagi sa pagtudlo kanila sa mga kamatuoran sa ebanghelyo gikan sa mga kasulatan ug sa mga propeta ug sa pagtabang kanila nga mobati ug moila sa Espiritu. Bisan ang gagmay nga mga bata makasabut ug makadawat sa mga butang nga adunay mahangturon nga kinaiya. Nahigugma sila sa mga kasulatan ug nahigugma sila sa propeta. Sila sa kasagaran gusto nga mahimong buotan. Anaa ra kanato ang pagtabang kanila nga magpabiling abli niana nga koneksyon ngadto sa langit. Anaa ra kanato ang pagpanalipod kanila gikan sa mga impluwensya nga makapalayo gikan sa Espiritu. Makakita kita og panabang ug paggiya diha sa mga kasulatan. Dayon makatudlo kita sa atong mga anak sa pagpangita sa ilang kaugalingon nga mga tubag diha. Makatudlo kita kanila sa husto nga mga baruganan ug makatabang kanila sa paggamit niini sa ilang kinabuhi. Makagiya kita kanila ngadto sa Espiritu aron makadawat sila sa ilang kaugalingon nga pagpamatuod sa mga kamatuoran nga ilang nakat-unan. Makatabang kita kanila sa pagkaplag sa hingpit nga kalipay sa pagsunod sa ebanghelyo. Makatukod kini og usa ka lig-on nga pundasyon sa hugot nga pagtuo ug pagkamasulundon diha sa ilang kinabuhi nga makapalig-on kanila.

Karon, kining tanan dili sayon. Ang asoy mahitungod sa mga Nephite nag-ingon nga kadtong mga pamilya adunay 200 ka tuig sa kalinaw. Apan sigurado nga nagkinahanglan kadto og hilabihan nga paningkamot. Nagkinahanglan kini og dakong kakugi ug pailub ug hugot nga pagtuo, apan walay butang nga mas mahinungdanon o mas magantihon. Ug ang Ginoo motabang kanato, kay Siya nahigugma niining mga bataa gani labaw pa sa atong paghigugma. Siya nahigugma kanila, ug Siya mopanalangin kanila.

Inyong mahinumduman nga Iyang gipanalanginan ang Nephite nga mga bata tagsa-tagsa ug nag-ampo alang kanila (tan-awa sa 3 Nephi 17:14–17, 21). Dayon; “siya namulong ngadto sa pundok sa mga katawhan, ug miingon ngadto kanila: Tan-awa ang inyong gagmay nga mga bata.

“Ug samtang sila mipunting sa ilang mga mata paingon sa langit, ug sila nakakita sa langit nga naabli ug sila nakakita sa mga anghel nga nanaog gikan sa langit nga ingon og diha sa taliwala sa kalayo; ug sila nanaog ug gialirongan kadtong gagmay nga mga bata, ug sila gialirongan sa kalayo; ug ang mga anghel nangalagad ngadto kanila” (3 Nephi l7:23–24).

Sa unsang paagi nga ang atong mga anak makasinati og mga panalangin nga sama niini karon? Si Elder M. Russell Ballard nag-ingon, “Dayag lang, kadtong uban kanato nga gisaligan og bililhon nga mga anak gihatagan og usa ka sagrado, halangdon nga pagkatinugyanan, kay kita mao ang mga tawo nga gitudlo sa Dios sa paggakus sa mga bata karon uban sa gugma ug kalayo sa hugot nga pagtuo ug pagsabut kon kinsa sila” (“Behold Your Little Ones,” Tambuli, Okt. 1994, 40).

Mga kaigsoonan, kita mao ang mga anghel nga gipadala sa Langitnong Amahan karon aron sa pagpanalangin sa mga bata, ug makatabang kita kanila nga usa ka adlaw makita nila ang nawong sa Manluluwas samtang nagtudlo kita sa mga baruganan sa ebanghelyo ug nagpuno sa atong mga panimalay og hingpit nga kalipay sa pagsunod niini. Kita manag-uban nga makaila Kaniya. Makabatyag kita sa Iyang gugma ug sa Iyang mga panalangin. Ug pinaagi Kaniya makabalik kita ngadto sa presensya sa Amahan. Mahimo nato kini kon kita andam nga mahimong masulundon, matinud-anon, ug kugihan sa pagsunod sa Iyang mga pagtulun-an.

“Sa pagkatinuod, sa ingon miingon ang Ginoo: Kini mahinabo nga ang matag kalag kinsa mobiya sa iyang mga sala ug moduol ngari kanako, ug motawag sa akong ngalan, ug mosunod sa akong tingog, ug mohupot sa akong mga sugo, makakita sa akong panagway ug masayud nga Ako mao” (D&P 93:1).

Mga kaigsoonan, ako nasayud nga ang Dios buhi, si Jesukristo mao ang Iyang Anak, ang atong Manluluwas ug Manunubos. Siya midapit kanato sa pagduol ngadto Kaniya ug misugo kanato sa pagdala sa atong mga anak nga kita, manag-uban nga makakita sa Iyang nawong ug mopuyo sa kahangturan uban Kaniya ug sa atong Langitnong Amahan. Mao kini ang akong pag-ampo nga kitang tanan unta molihok aron madawat kini nga panalangin sa pangalan ni Jesukristo, amen.