Cheryl A. Esplin
Ikaduhang Magtatambag sa Kinatibuk-ang Kapangulohan sa Primary
Si Cheryl Asay Esplin, ikaduhang magtatambag sa kinatibuk-ang kapangulohan sa Primary, wala makahinumdom og higayon nga siya wala nagtuo sa Langitnong Amahan ug ni Jesukristo. “Gitudloan ako sa bata pa nga edad sa pag-ampo,” siya miingon. “Nakahinumdom ako nga nag-ampo aron sa pagpangayo og tabang sa dili pa ako mobuhat og bisan unsa nga butang, ug kanunay akong makadawat og mga tubag sa akong mga pag-ampo.”
Natawo niadtong Oktubre 1944 ngadto kang Orson ug Mildred Asay, si Sister Esplin nagtubo sa usa ka umahan nga walo ka milya (13 km) sa silangan sa Lovell, Wyoming, USA. Isip ikaduha sa siyam ka mga bata, siya kanunay sugoon sa pagbantay sa mga bata. Samtang gitugyanan sa iyang manghod nga mga lalaki ug mga babaye, si Sister Esplin nakahinumdom nga nag-ampo alang sa kaluwasan sa iyang pamilya samtang wala pa ang iyang ginikanan.
Si Sister Esplin migradwar sa bachelor’s degree in elementary education gikan sa Brigham Young University. Samtang nag-eskwela, iyang nahimamat ang iyang bana, si Max Esplin, ug nakigminyo kaniya sa Templo sa St. George Utah niadtong Septyembre 1, 1967. Human sa paggradwar, si Brother Esplin gitawag sa pagkasundalo, ug si Sister Esplin mitudlo sa ikalima nga ang-ang sulod sa duha ka tuig duol sa iyang pamilya sa Byron, Wyoming.
Siya nangalagad sa Relief Society, Young Women, ug mga auxiliary sa Primary. Ang iyang labing bag-o nga calling anaa sa Primary general board. Siya mialagad usab uban sa iyang bana sa dihang ang iyang bana mao ang presidente sa North Carolina Raleigh Mission.
Ang mga Esplin adunay lima ka anak. Si Sister Esplin ganahan sa paggahin og panahon uban sa iyang mga apo, sila magluto og mga pancake ug waffle, magdula nga mag-ilis og sinina, mag-hike, ug mag-uban og basa og mga istorya.
Si Sister Esplin ganahan kaayo sa mensahe sa iyang paborito nga kasulatan, sa Doktrina ug mga Pakigsaad 84:88: “Ug kinsa kadto nga modawat kaninyo, didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo.” Siya naglaum nga ang mga bata makahinumdom nga ang Langitnong Amahan anaa kanunay alang kanila pinaagi sa pag-ampo.