Usa ka Pulong sa Pagtapos

Kini nahimong usa ka talagsaong panapos nga sesyon. Talagsa ra ako makadungog og ingon niana ka nindot nga mga pakigpulong nga gitudlo diha sa mubo ra kaayo nga mga pulong sama sa atong nasinati karon. Kitang tanan ania dinhi tungod kay nahigugma kita sa Ginoo. Gusto kita nga moserbisyo Kaniya. Ang atong Langitnong Amahan naghunahuna kanato. Niana ako mopamatuod. Akong giila ang Iyang mga kamot diha sa tanang mga butang.

Usa ka mubo nga kasulatan:

“Sumalig ka sa Ginoo sa bug-os mong kasingkasing; ug ayaw pagsalig sa imong kaugalingong salabutan.

“Sa tanan nimong mga dalan ilha siya, ug siya magamando sa imong mga alagianan.”¹

Mao kana ang nahimong istorya sa akong kinabuhi.

Minahal kong mga kaigsoonan, matapos na kita karon sa labing makabayaw ug makadasig nga komperensya. Human makapaminaw sa tambag ug mga pagpamatuod niadtong mga namulong kanato, nagtuo ko nga napanalanginan kita sa hilabihan ug ang tanan determinado sa pagsunod sa mga baruganan sa ebanghelyo ni Jesukristo. Maayo nga kita mianhi dinhi. Pasalamatan nato ang tanan nga namulong kanato, ingon man usab niadtong mihalad sa mga pag-ampo.

Ang musika nindot gayud kaayo. Ako napahinumduman sa kasulatan nga makita diha sa Doktrina ug mga Pakigsaad: “Kay ang akong kalag mahimuot sa awit sa kasingkasing; oo, ang awit sa mga matarung mao ang usa ka pag-ampo ngari kanako, ug pagatubagon uban sa usa ka panalangin diha sa ilang mga ulo.”²

Hinumdumi nga ang mga mensahe nga atong nadunggan niining komperensya i-imprinta sa Mayo nga mga isyu sa mga magasin sa Ensign ug Liahona. Awhagon namo kamo sa pagtuon sa mga mensahe ug sa pagpamalandong sa mga pagtulun-an niini, ug sa paggamit niini diha sa inyong mga kinabuhi.

Nasayud ako nga moapil mo nako sa pagpasalamat niadtong mga kaigsoonan nga na-release niini nga komperensya. Nakaserbisyo sila og maayo ug nakahatag og talagsaong kontribusyon sa buhat sa Ginoo. Ang ilang pagpahinungod nahingpit na. Pasalamatan nato sila gikan sa kinahiladman sa atong mga kasingkasing.

Karon, gipaluyohan usab nato, pinaagi sa pagpataas sa mga kamot, ang mga kaigsoonan nga gitawag sa bag-ong mga posisyon niini nga komperensya. Gusto nato nga ipahibalo nila nga naghinam-hinam kita nga makig-uban og trabaho nila sa kawsa sa Ginoo.

Akong mga kaigsoonan, karon, kon motan-aw kita sa kalibutan libut kanato, nag-atubang kita og mga problema nga grabe kaayo ug gikabalak-an nato pag-ayo. Ang kalibutan ingon og mipahilayo gikan sa kahilwasan ug mipalayo gikan sa kalinaw.

Ang pagkamatuguton, imoralidad, pornograpiya, pagkadili matinuoron, ug ubang daghan pa nga mga kadautan maoy nakaingon nga ang daghan nakasala ug nawad-an sa mga kahigayunan, nawad-an sa mga panalangin, ug naguba ang mga damgo.

Ang akong tambag alang natong tanan mao ang pagtan-aw sa parola sa Ginoo. Walay gabon nga ingon ka baga, walay gabii nga ingon ka ngitngit, walay unos nga ingon ka kusog, walay marinero nga ingon ka nawala nga dili maluwas sa nagdan-ag nga kahayag. Kini nagtawag diha sa mga unos sa kinabuhi. Ang parola sa Ginoo nagpadala og signal nga dali mailhan ug dili gayud mapakyas.

Gusto ko sa mga pulong nga makita diha sa mga Salmo: “Ang Ginoo mao ang akong bato, ug akong kuta, ug ang akong manluluwas; Dios ko, akong bato nga kanimo modangup ako; … Magtawag ako sa Ginoo … busa maluwas [ako] gikan sa akong mga kaaway.³

Nahigugma ang Ginoo kanato, akong mga kaigsoonan, ug mopanalangin nato kon kita motawag Kaniya.

Pagkamapasalamaton nato tungod sa gipahiuli nga ebanghelyo ni Jesukristo ug alang sa tanang kaayohan nga nahatag niini sa atong mga kinabuhi. Ang Ginoo mibu-bu sa Iyang mga panalangin ngari kanato isip katawhan. Ako mopamatuod kaninyo nga kini nga buhat tinuod, nga ang atong Manluluwas buhi, ug nga Siya naggiya ug naghatag og direksyon sa Iyang Simbahan dinhi sa yuta.

Karon, sa atong pag-abut sa katapusang mga gutlo niini nga komperensya, ang akong kasingkasing puno ug nindot ang akong gibati. Akong ipahayag ang akong gugma ug pasalamat kaninyo. Salamat sa inyong mga pag-ampo alang kanako ug alang sa tanang mga General Authority sa Simbahan. Ang Ginoo motubag sa inyong mga pag-ampo ug mopanalangin kanato ug mogiya kanato sa mga kalihokan sa Iyang gingharian dinhi sa yuta. Tungod niini mapasalamaton kita kaayo.

Sa atong pagbiya niini nga komperensya, akong ihatag kaninyo ang mga panalangin sa langit nganha sa matag usa kaninyo. Sa inyong pagbalik sa inyong mga panimalay sa tibuok kalibutan, ako nag-ampo nga ang atong Langitnong Amahan mopanalangin kaninyo ug sa inyong mga pamilya. Hinaut nga ang mga mensahe ug diwa niini nga komperensya magamit diha sa tanan ninyong pagabuhaton—sa inyong mga panimalay, sa inyong trabahoan, sa inyong mga miting, ug sa tanan ninyong mga kalihokan.

Gimahal ko kamo. Ako nag-ampo alang kaninyo. Hinaut nga ang Dios mopanalangin kaninyo. Hinaut nga ang Iyang gisaad nga kalinaw magauban kaninyo karon ug sa kanunay, sa pangalan ni Jesukristo, Amen.