Welcome sa Komperensya

Unsa ka nindot, akong minahal nga kaigsoonan, nga magkahimamat na usab kitang tanan. Kini nga komperensya nagtimaan sa ika-180 ka tuig sukad ang Simbahan natukod. Mapasalamaton kaayo kita ni Propeta Joseph Smith, kinsa nangita sa kamatuoran, kinsa nakakaplag niini, ug kinsa, ubos sa pagdumala sa Ginoo, mipahiuli sa ebanghelyo ug mitukod sa Simbahan.

Ang Simbahan padayon nga mitubo sukad nianang adlawa sa 1830. Nagpadayon kini sa pag-usab sa mga kinabuhi sa nagkadugang nga mga tawo matag tuig ug sa pagkatap sa tibuok kalibutan samtang ang atong misyonaryo nga pundok nagsiksik niadtong nangita sa kamatuoran. Sa makausa pa kami nanawagan sa mga miyembro sa Simbahan sa pagduol ngadto sa bag-ong mga kinabig o niadtong gusto nga mobalik sa Simbahan, higugmaon sila ug tabangan silang mobati nga giabi-abi.

Salamat kaninyo, akong mga kaigsoonan, tungod sa inyong hugot nga pagtuo ug pagkamaunungon sa ebanghelyo ni Jesukristo. Salamat sa tanan ninyong nabuhat sa inyong mga ward ug mga branch, sa inyong mga stake ug mga district. Mauyunon ug maayo kaayo ang inyong pagserbisyo ug nakahimo og daghang kaayohan. Unta ang Ginoo mopanalangin kaninyo samtang kamo naningkamot sa pagsunod Kaniya ug sa pagtuman sa Iyang mga sugo.

Sukad sa katapusan natong pagkita, ang Simbahan nagpadayon sa paghatag sa gikinahanglan kaayo nga tawhanong hinabang sa nagkalainlaing mga dapit sa tibuok kalibutan. Sa milabay lang nga tulo ka bulan, ang tawhanong hinabang nahatag sa French Polynesia, Mongolia, Bolivia, Peru, Arizona, Mexico, Portugal ug Uganda, tali sa ubang mga dapit. Bag-ohay pa lang, nakatabang kita sa Haiti ug Chile human sa malaglagon nga mga linog ug mga tsunami nianang dapita. Kami nagpahayag sa among gugma ngadto sa mga miyembro sa Simbahan kinsa nag-antus niini nga mga katalagman. Kamo nalakip sa among mga pag-ampo. Hilabihan ang among pagpasalamat kaninyo tungod sa inyong kamauyunon sa pagtabang sa atong tawhanon nga mga paningkamot pinaagi sa pagpakigbahin sa inyong mga kapanguhaan ug, kasagaran, sa inyong panahon, inyong mga talento, ug sa inyong kahanas.

Kining tuiga ang nagtimaan sa ika-25 ka tuig sukad ang humanitarian nga programa nahimong kabahin sa atong paningkamot sa welfare. Ang gidaghanon sa mga indibidwal nga natabangan pinaagi niini nga programa dili gayud masukod. Kita kanunay nga maningkamot nga mahimong una nga moabut diha sa nahitaboan, bisan asa kini mahitabo.

Ang Simbahan nagpadayon sa pagtubo ug sa pag-irog. Ang pagtukod og mga templo usa ka timaan sa ingon nga pagtubo. Bag-ohay pa lang among gipahibalo ang bag-o nga templo nga pagatukuron sa Payson, Utah. Amo usab nga gipahibalo ang dakong kausaban nga pagahimoon sa Templo sa Ogden Utah. Sulod sa sunod nga tulo ka bulan mopahinungod kami og bag-o nga mga templo sa Vancouver, British Columbia; sa Gila Valley, Arizona; ug sa Siyudad sa Cebu sa Philippines. Sa mosunod nga tuig ubang mga templo ipahinungod o ipahinungod pag-usab. Kita magpadayon sa pagtukod og mga templo sa tibuok kalibutan samtang ang atong mga miyembro magtubo. Sa matag tuig minilyon ka mga ordinansa ang gipahigayon didto sa mga templo alang sa atong namatay nga mga minahal. Unta kita magpadayon nga magmatinud-anon sa pagpahigayon sa ingon nga mga ordinansa alang niadtong kinsa dili makahimo alang sa ilang mga kaugalingon.

Daghan kaninyo ang nakabantay nga wala magdugay human sa komperensya sa Oktubre, ang akong minahal nga asawang si Frances miantus sa pagkadagma nga miresulta sa pagkabuak sa bat-ang ug abaga. Human sa duha ka malampuson nga mga pag-opera ug pipila ka mga semana nga pagka-ospital, nakapauli ra siya. Maayo ra siya ug nagpadayon sa pag-uswag ngadto sa hingpit nga pagkaayo. Nakahimo siya sa pagtambong sa kinatibuk-ang miting sa Young Women sa miaging Sabado ug nagplano sa pagtambong og usa o duha ka sesyon niining katapusan sa semana. Sa pagkatinuod, sa katapusang mga gutlo siya miingon, “motambong ko karon!” Ug ania siya! Miapil siya kanako sa pagpahayag og lawum nga pagpasalamat sa atong Langitnong Amahan ug kaninyo tungod sa inyong mga pag-ampo ug sa inyong pagpanghinaut sa iyang katungod.

Karon, mga kaigsoonan ania kita aron matudloan ug madasig. Among gi-welcome kadtong uban kaninyo kinsa bag-o pa sa Simbahan. Ang uban kaninyo nakigbisog sa mga problema, uban sa mga hagit, sa mga kasagmuyo, sa mga pagkawala. Kami nahigugma kaninyo ug kami nag-ampo alang kaninyo. Daghang mga mensahe, nga naglakip sa daghang mga hilisgutan sa ebanghelyo, ang mahatag atol sa mosunod nga duha ka adlaw. Kadtong mga lalaki ug mga babaye nga makigsulti kaninyo nangayo og tabang sa langit kalabut sa mga mensahe nga ilang ihatag.

Ako kini nga pag-ampo nga unta kita mapuno sa Iyang Espiritu samtang kita naminaw ug nagkat-on. Nga kini mahimo mao, ang akong pag-ampo sa pangalan ni Jesukristo, ang atong Ginoo ug Manluluwas, amen.