Namulong Sila sa Kabatan-onan

Kita gitugyanan sa paghupot sa priesthood ug sa pagbuhat pinaagi sa ngalan sa Dios. Kita ang mga nagpakadawat sa usa ka sagrado nga pagsalig. Dako kaayo ang gipaabot gikan kanato.…Hunahunaon nato ang atong mga calling, hinuktukan nato ang atong mga responsibilidad, ug sundon nato si Jesukristo, atong Ginoo.

Presidente Thomas S. Monson, “Pagpangandam Nagdala og Panalangin,” 64.

Pipila pa lamang ka mga semana ang milabay, nakakita ako og usa ka bag-ong deacon nga nagsugod niana nga dalan sa kakugi. Ang iyang amahan mipakita kanako og usa ka diagram nga gihimo sa iyang anak nga lalaki nga nagpakita sa matag linya sa lingkuranan sa ilang chapel, sa gidaghanon sa matag deacon nga sangunan sa pagpaambit sa sakrament, ug sa ilang agianan diha sa chapel sa pagpangalagad sa sakrament ngadto sa mga miyembro. Ang amahan ug ako mipahiyum nga naghunahuna nga ang usa ka bata, nga wala sugoa sa paghimo niini, naghimo og usa ka plano aron masiguro nga magmalampuson siya sa iyang priesthood nga pangalagad.

Akong nakita diha sa iyang kakugi ang sundanan gikan sa bag-o nga gamayng basahon nga Katungdanan ngadto sa Dios. Kini mao ang pagkat-on sa unsay gilauman sa Ginoo kaninyo, paghimo og plano aron sa pagbuhat niini, pagbuhat sa inyong giplano uban sa kakugi, ug dayon ipakigbahin sa uban kon sa unsang paagi nga ang inyong kasinatian nakapausab kaninyo ug nakapanalangin sa uban.

Presidente Henry B. Eyring, Unang Magtatambag sa Unang Kapangulohan. “Pagbuhat diha sa Tanan nga Kakugi, 60.

Ang hingkod nga mga miyembro sa Simbahan kinahanglang makasabut nga ang mga gikinahanglan sa Personal nga Kauswagan ug Katungdanan ngadto sa Dios dili lamang tag-as nga mga lista sa mga butang nga tsekan. Kini personal nga mga tumong nga gihan-ay sa matag batan-ong lalaki ug batan-ong babaye aron sa pagtabang kanila nga mahimong takus nga modawat sa mga ordinansa sa templo, moserbisyo og mga misyon, mosulod ngadto sa mahangturon nga kaminyoon, ug motagamtam sa kahimayaan. Apan tugoti nga masabtan kini: ngadto sa batan-ong mga lalaki ug batan-ong mga babaye nga mosulay sa paghuman niini nga mga tumong nga mag- inusara mamahimo nga usa ka dakong kapildihan ug trahedya!

Mga amahan, mga inahan, ug mga lider sa mga kabatan-onan, kami moawhag kaninyo sa pagsalmot sa Personal nga Kauswagan ug sa Katungdanan ngadto sa Dios kauban sa inyong mga anak ug sa mga kabatan-onan. Dili lamang sila motubo, kamo usab motubo. Ug sama usab ka importante, kamo manag-uban nga motubo diha sa panagbugkos sa hugot nga pagtuo ug panaghigalaay nga motugot kaninyo sa paglig-on sa usag usa ug sa pagpabilin diha sa dalan sa ebanghelyo sa kahangturan.

Elder Robert D. Hales, sa Korum sa Napulog Duha ka mga Apostoles, “Ang Atong Katungdanan ngadto sa Dios: Ang Misyon sa mga Ginikanan ug mga Lider ngadto sa Bag-o nga Kaliwatan,” 95.

Ang kahigayunan inyo, minahal kong mga Aaronic Priesthood. Andam na ba kamo ug mahinamon sa pagbuhat sa inyong bahin? Ang Ginoo nagkinahanglan sa matag takus nga batan-on sa pagpangandam ug pagpasalig pag-usab, sugod karong gabhiona, nga mahimong takus sa tawag gikan sa propeta sa Dios sa pag-alagad og misyon.

Elder Ronald A. Rasband sa Seventy, “Ang Balaan nga Tawag sa usa ka Misyonaryo,” 51.

Isip usa ka deacon, teacher, ug priest, moapil kamo sa mga kalihokan nga makatabang kaninyo sa pagtukod og espirituhanong kalig-on ug makat-on ug makatuman sa inyong mga katungdanan sa priesthood. Ang matag kalihokan nagsubay niining yano nga sundanan:

Una kamo makat-on kabahin sa baruganan sa ebanghelyo o sa katungdanan sa priesthood. Makadiskubre kamo kon unsay gusto sa Langitnong Amahan nga inyong buhaton, ug kamo maningkamot sa pagbaton og espirituhanon nga pagpamatuod kon nganong importante kini.

Pagkasunod paghimo kamo og mga plano sa “pagbuhat” sa inyong nakat-unan. Gidasig kamo sa pagbase sa inyong mga plano diha sa kaugalingon ninyong mga panginahanglan, mga kahimtang, ug mga kahigayunan aron sa pagserbisyo sa uban. Usa kini ka maanindot nga kahigayunan sa pagbaton og responsibilidad alang sa inyong kaugalingong pagtubo ug sa pagpalambo og usa ka espirituhanong paningkamot sa kaugalingon.

Dayon ipakigbahin ang inyong nakat-unan ug kasinatian ngadto sa uban. Sa inyong paghimo, mapalig-on ninyo ang inyong pagpamatuod ug makaugmad og hugot nga pagtuo niadtong naglibut kaninyo. Kamo makapalambo sa inyong abilidad sa pagpakigbahin sa ebanghelyo ngadto sa uban.…

… Ako nagpamatuod nga ang inyong matinud-anong pagserbisyo diha sa Aaronic Priesthood makausab sa mga kinabuhi niadtong inyong gisilbihan. Adunay mga tawo kinsa nagkinahanglan sa inyong priesthood nga pagserbisyo. Ang inyong pamilya nagkinahanglan kaninyo. Ang inyong korum nagkinahanglan kaninyo. Ang Simbahan nagkinahanglan kaninyo. Ang kalibutan nagkinahanglan kaninyo.

David L. Beck, kinatibuk-ang presidente sa Young Men, “Ang Talagsaon nga Aaronic Priesthood,” 54.

Impormasyon mahitungod sa bag-ong programa sa Katungdanan ngadto sa Dios anaa sa daghang mga pinulongan sa DutyToGod.lds.org.

Sa unang pahina sa inyong basahon nga Personal nga Kauswagan sa Young Women, makita ninyo kini nga mga pulong: “Ikaw usa ka pinalanggang anak nga babaye sa Langitnong Amahan, giandam sa pag-anhi sa yuta niining maong panahon alang sa usa ka sagrado ug mahimayaon nga katuyoan.”

Mga sister, kadto nga mga pulong matuod! Wala kadto buhata nga usa ka sugilanon! Dili ba talagsaon kini nga masayud nga ang atong Langitnong Amahan nakaila kaninyo, naminaw kaninyo, nagbantay kaninyo, ug nahigugma kaninyo uban sa walay katapusan nga gugma? Gani, ang Iyang gugma alang kaninyo hilabihan gayud kaayo nga Siya mihatag kaninyo niining yutan-on nga kinabuhi isip usa ka bililhon nga gasa sa “usa ka panahon kaniadto,” nga kompletohon sa kaugalingon ninyong istorya sa pagpanimpalad, pagsulay, ug mga kahigayunan alang sa kahalangdon, kabantugan, kaisug, ug paghigugma. Ug, pinakamahimayaon sa tanan, nagtanyag Siya kaninyo og usa ka gasa nga dili kabugtian ug dili matugkad. Ang Langitnong Amahan nagtanyag kaninyo sa pinakamahinungdanong gasa sa tanan— kinabuhing dayon—ug sa kahigayunan ug sa walay katapusan nga panalangin sa kaugalingon ninyong “pagkamalipayon human sa tanan.”

Presidente Dieter F. Uchtdorf, Ikaduhang Magtatambag sa Unang Kapangulohan, “Ang Inyong Pagkamalipayon Human sa Tanan,” 124.

Batan-ong mga babaye sa Ang Simbahan ni Jesukristo sa mga Santos sa Ulahing mga Adlaw, hinumdumi kon kinsa kamo! Kamo mga pinili. Kamo mga anak nga babaye sa Dios. Kamo dili mahimo nga usa ka henerasyon sa batan-on nga mga babaye kinsa kontento na lamang nga mohaum sa panahon. Kinahanglan gayud nga kamo adunay kaisug sa pagpaila, sa “pagbarug ug pagpakita, aron ang inyong kahayag mao ang usa ka sukaranan alang sa tanan nga mga nasud” (D&P 115:5). Ang kalibutan buot nga magpatuo kaninyo nga kamo dili mahinungdanon—nga kamo wala sa uso ug walay pakabana sa kalibutan. Ang kalibutan nagtawag kaninyo sa mabangis, alingugngog nga mga tingog aron “maglingaw-lingaw,” “mosulay sa tanang butang,” “mag-eksperimento ug maglipay.” Sa pikas nga bahin, ang Espiritu Santo naghunghong ug ang Ginoo nagdapit kaninyo nga “maglakaw sa mga agianan nga maligdong,” “pagsalikway sa mga butang niini nga kalibutan,” “ug maghupot sa [inyong] mga pakigsaad” (D&P 25:2, 10, 13).

Elaine S. Dalton, kinatibuk-ang presidente sa Young Women, “Hinumdumi Kon Kinsa Kamo!” 120.

Ang Personal nga Kauswagan naghatag og talagsaon nga paagi alang kaninyo aron sa pag-amuma sa inyong pagpamatuod pagtulun-an human sa pagtulun-an. Ang mithianon nga mga kasinatian ug mga proyekto mao ang ginagmayng mga lakang nga moamuma sa inyong pagpamatuod mahitungod kang Jesukristo samtang kamo magkat-on sa Iyang mga pagtulun-an ug sa kasagaran mogamit niini sa inyong kinabuhi. Kini nga mapadayunon nga pag-amuma mopabilin kaninyo nga luwas diha sa dalan.

Mary N. Cook, unang magtatambag sa kinatibuk-ang kapangulohan sa Young Women, “Ayaw, Ayaw, Ayaw Gayud Pag-undang!” 117.

Ang Ginoo anaa kanunay alang kanato ug dili gayud kita biyaan nga mag-inusara. Gitudloan kita nga ang Langitnong Amahan nakaila ug nahigugma sa matag usa sa Iyang mga anak. Isip usa sa Iyang bililhon nga mga anak nga babaye, makadawat kamo sa Iyang kasigurohan ug paggiya pinaagi sa gahum sa pag-ampo.

Ann M. Dibb, ikaduhang magtatambag sa kinatibuk-ang kapangulohan sa Young Women, “Magmaisug” 114.

Alang sa dugang nga impormasyon sa Personal nga Kauswagan, adto sa PersonalProgress.lds.org.