Paghimo sa Komperensya nga Kabahin sa Atong Kinabuhi

Ang tanan makaapil sa buhat sa family history! Si Elder Russell M. Nelson misugyot nga ang mga bata makadrowing og family tree (pahina 91). Ang mga ginikanan makatabang nila sa pagdugang og mga pangalan sa ilang mga katigulangan.

Basaha ug isulti og usab ang istorya ni Elder Quentin L. Cook mahitungod sa mga bata nga Samoan nga midagan gikan sa tsunami (pahina 83). Hangyoa ang mga miyembro sa pamilya nga magpakaaron-ingnon nga dunay baha nga misulod sa balay ug awhaga sila sa pagpangita og “taas nga lugar” sama sa higdaanan o lingkuranan. Hisguti ang mga lugar nga atong makaplagan ang mas taas nga espirituhanong lugar diha sa baha sa kadautan nga atong masinati karon.

Si Elder D. Todd Christofferson naghisgot mahitungod ni William Tyndale, kinsa mihubad sa Biblia ngadto sa Iningles (pahina 32). Hangyoa ang mas dagko nga mga bata sa pagbasa og usa ka bersikulo sa kasulatan sa usa ka pinulongan nga dili sila kamao. Kon sila moingon nga dili sila makahimo, dapita sila sa pagbasa niini sa inyong lumad nga pinulongan. Paghisgot sa kaimportante nga adunay kasulatan sa inyong lumad nga pinulongan.

Uban sa inyong pamilya, ribyuha ang usa sa daghang mga pakigpulong sa kinatibuk-ang komperensya mahitungod ni Jesukristo. Kantaha ang “Suginli Ko sa mga Istorya ni Jesus [Tell Me the Stories of Jesus]” (Children’s Songbook, 57). Paghatag og papel ug mga lapis o mga krayola. Dapita ang inyong mga bata sa pagdrowing sa usa ka paborito nga istorya ni Jesus. Basaha ang istorya gikan sa kasulatan pagdungan.

Ribyuha ang pakigpulong ni Presidente Dieter F. Uchtdorf mahitungod sa pailub (pahina 56). Unsa ang pipila ka mga baruganan sa ebanghelyo ug mga gipangbuhat nga makatudlo nato og pailub? Hunahunaa, pananglit, ang pagpuasa o dili makig-date hangtud sa edad nga 16. Sa unsa nga paagi nga nakabenepisyo kamo ug ang mga miyembro sa inyong pamilya sa pagpakita og pailub sa pagsunod niini ug sa ubang mga baruganan?

Sila si Elder M. Russell Ballard, Elder Bradley D. Foster, Sister Julie B. Beck, ug Sister Elaine S. Dalton naghisgot tanan mahitungod sa balaan nga kinaiya sa mga babaye (mga pahina 18, 10, 98, ug 120). Kon kamo usa ka babaye, sa unsa nga paagi nakaapekto ang ilang mga pakigpulong kon unsa ang inyong gibati mahitungod sa inyong kaugalingon? Unsay inyong nakat-unan mahitungod sa inyong katuyoan ug mga gasa? Kon kamo lalaki, sa unsa nga paagi nga kini nga mga mensahe nakaimpluwensya sa inyong panabut sa inyong inahan, igsoong mga babaye, mga higala, ug sa ubang mga babaye ug sa batan-ong mga babaye sa inyong kinabuhi?

Si Elder Jeffrey R. Holland mitudlo: “Kon ang salida sa TV dili maayo, palonga kini. Kon ang salida salikwaut, palayo. Kon ang dili husto nga pakigrekasyon naglambo, putla kini. Daghan niini nga mga impluwensya . . makahugaw kini sa atong paghukom, makaluya sa espiritwalidad, ug modala kanato ngadto sa butang nga dautan.” (pahina 44). Isip usa ka pamilya, hisguti unsay inyong mahimo sa paghimo sa inyong panimalay nga usa ka dapit diin mopuyo ang Espiritu. Susiha ang art, musika, mga libro, mga dula sa video, ug ang ubang mga kalingawan nga anaa kaninyo ug ilabay ang bisan unsa nga dili angay.

Uban sa inyong pamilya, ribyuha ang istorya ni Presidente Thomas S. Monson nga gipakigbahin mahitungod sa batan-ong lalaki nga ginganlan og Jason ug sa iyang pamilya (pahina 87). Hisguti kon sa unsa nga paagi ang kahibalo sa plano sa kaluwasan makapanalangin kanato.

Si Elder L. Tom Perry mipakigbahin sa unsa nga paagi ang iyang inahan mitudlo sa iyang mga anak ginamit ang sama nga materyal nga iyang gigamit sa pagtudlo sa Relief Society (pahina 29). Unsa ang pipila ka mga paagi nga inyong ikalambigit ang inyong pag-alagad sa Simbahan uban sa inyong responsibilidad sa pamilya?

Si Elder Robert D. Hales mipasabut sa kaimportante sa pagpakigsulti ug sa pagpaminaw sa mga bata ug mga batan-on pahina. Unsa nga mga oportunidad ang inyong mamugna sa pagpakigsulti sa inyong mga anak? Unsay inyong nakat-unan samtang kamo naminaw kanila? Unsaon ninyo sa pagpakita sa inyong pagkaandam sa pagpaminaw? Sa unsa nga mga paagi nga kamo makakita og oportunidad sa pagpamatuod dayon ngadto sa mga bata ug mga batan-on? Sama pananglit, tan-awa ang pakigpulong ni Elder David A. Bednar (pahina 40).

Daghan sa mga mamulong naghisgot sa kaimportante sa Katungdanan ngadto sa Dios ug sa Personal nga Kauswagan (tan-awa sa mga pahina 22, 54, 60, 95, ug 117). Unsay inyong mahimo sa pagtabang sa kabatan-onan sa inyong kinabuhi nga makabenepisyo niini nga mga programa?