Ang Balaan nga Tawag sa usa ka Misyonaryo

Maayong gabii, minahal kong mga kaigsoonan sa priesthood. Karong gahiona gusto ko nga mamulong kabahin sa misyonaryo nga pag-alagad. Akong idirekta ang akong mga komentaryo sa dakong grupo sa batan-ong mga lalaki kinsa naghupot sa Aaronic Priesthood nga nagkatigum sa tibuok kalibutan ug sa ilang mga amahan, mga apohang lalaki, ug mga lider sa priesthood nga nagbantay kanila.

Ang misyonaryo nga buhat usa ka hilisgutan nga duol sa akong kasingkasing, nga mao usab ngadto sa matag miyembro sa ika-walo nga Korum sa Seventy kinsa gitudlo sa Ginoo sa paglakaw “una kaniya ngadto sa matag siyudad ug dapit nga iyang pagaadtoon.”¹ Ang misyonaryo nga buhat mao ang kinabuhi sa Simbahan ug ang makaluwas sa kinabuhi nga panalangin ngadto sa tanan kinsa modawat sa mensahe niini.

Dihang ang Magtutudlo nangalagad sa mga tawo, Siya mitawag og mga mangingisda sa Galilea sa pagbilin sa ilang mga pukot ug mosunod Kaniya, nga namahayag: “Himoon ko kamong mangingisdag tawo.”² Ang Ginoo mipaabut sa maong tawag ngadto sa mapainubsanong mga tawo aron pinaagi kanila ang uban makabati sa kamatuoran, ug moduol ngadto Kaniya.

Niadtong Hunyo 1837, si Propeta Joseph Smith mitawag kang Heber C. Kimball, nga Apostol, sa pag-adto sa misyon sa England. Ang tawag ni Elder Kimball miabut samtang ang duha nanglingkod sa Kirtland Temple ug si Joseph namulong nga may balaan nga awtoridad: “Brother Heber, ang Espiritu sa Ginoo mihunghong diri kanako: ‘Himoa nga ang akong alagad nga si Heber moadto sa England ug magsangyaw sa akong ebanghelyo ug moabli sa pultahan sa kaluwasan niana nga nasud.’”³

Kana nga paghunghong sa Espiritu usa ka ehemplo kon sa unsang paagi ang tawag moabot ngadto sa mga alagad sa Ginoo aron magpadala og mga misyonaryo ngadto sa ilang madestinohan.

Karon ang mga misyonaryo molakaw nga magtinagurha subay sa gimando sa Ginoo, nagdala nianang sama nga mensahe, nga may samang balaan nga tawag sa pag-alagad gikan sa propeta sa Dios. Ang atong propeta, si Presidente Thomas S. Monson, nag-ingon niadtong gitawag sa pag-alagad: “Ang misyonaryo nga kahigayunan sa tibuok kinabuhi inyoha. Ang mga panalangin sa kahangturan naghulat kaninyo. Ang inyoha mao ang prebilihiyo nga mahimong dili mga tumatan-aw apan mga partisipante sa entablado sa priesthood nga pangalagad.”⁴

Ang kahigayunan inyo, minahal kong mga Aaronic Priesthood. Andam na ba kamo ug mahinamon sa pagbuhat sa inyong bahin? Ang Ginoo nagkinahanglan sa matag takus nga batan-on sa pagpangandam ug pagpasalig pag-usab, sugod karong gabhiona, nga mahimong takus sa tawag gikan sa propeta sa Dios sa pag-alagad og misyon.

Mainiton nakong nahinumduman ang dako namong kalipay sa tibuok pamilya dihang ang duha sa among mga anak nakadawat sa ilang mga tawag sa pag-alagad isip mga full-time nga misyonaryo. Ang kahinam ug pagdahum mipuno sa among mga kasingkasing samtang giablihan nila ang espesyal nga sulat gikan sa propeta sa Dios. Ang among anak nga babaye si Jenessa gitawag ngadto sa Michigan Detroit Mission, ug ang among anak nga lalaki si Christian, gitawag ngadto sa Russia Moscow South Mission. Unsa ka maanindot ug kulbahinam nga mga kasinatian, tanan sa samang higayon!

Samtang si Sister Rasband ug ako nakaangkon og higayon sa pagpangulo sa New York New York North Mission pipila ka tuig na ang milabay, ako nahingangha samtang nangabut ang mga misyonaryo sa Siyudad sa New York.

Sa dihang ako nag-interbyu kanila sa una nilang adlaw sa misyon, nakabaton ako og halawom nga pagbati sa pagpasalamat sa matag usa ka misyonaryo. Akong gibati nga ang ilang tawag sa among misyon balaan nga gipaangay alang kanila ug alang kanako isip ilang mission president.

Human matapos ang among pagkadestino sa misyon, gitawag ako ni Presidente Gordon B. Hinckley sa pag-alagad isip usa ka Seventy sa Simbahan. Kabahin sa akong una nga pagbansay isip bag-ong General Authority naglakip og kahigayunan sa paglingkod uban sa mga sakop sa Napulog Duha samtang sila mopili og mga misyonaryo sa pag-alagad sa usa sa kapin sa 300 ka mga misyon niining bantugan nga Simbahan.

Uban sa pagdasig ug pagtugot ni Presidente Henry B. Eyring, gusto ko nga moasoy og usa ka kasinatian, espesyal kaayo kanako, nga akong nasinati uban kaniya pipila na ka tuig ang milabay dihang siya sakop pa sa Korum sa Napulog Duha. Ang matag Apostol nagkupot sa mga yawe sa gingharian ug mobuhat niini sa direksyon ug pagtudlo sa Presidente sa Simbahan. Si Elder Eyring nag-assign og mga misyonaryo ngadto sa ilang madestinohan ug isip kabahin sa akong pagbansay, gidapit ako sa pag-obserbar.

Miuban ako ni Elder Eyring sa usa ka sayo nga buntag sa usa ka lawak diin ubay-ubay ka mga dagkong computer screen ang giandam alang sa sesyon. Dihay kawani usab gikan sa Missionary Department kinsa gi-assign sa pag-abag kanamo nianang adlawa.

Una, nangluhod kami sa pag-ampo. Nahinumdom ako ni Elder Eyring nga migamit og sinsero kaayo nga mga pulong, nga nangayo sa Ginoo sa pagpanalangin kaniya aron masayud “sa hingpit” asa angay i-destino ang mga misyonaryo. Ang pulong nga “sa hingpit” may dako nga bahin mahitungod sa hugot nga pagtuo nga gipakita ni Elder Eyring nianang adlawa.

Dihang gisugdan ang proseso, usa ka hulagway sa misyonaryo nga i-destino mogawas sa usa sa mga computer screen. Sa pagtungha sa matag hulagway, para nako ingon og ang misyonaryo anaa sa lawak uban kanamo. Dayon si Elder Eyring motimbaya sa misyonaryo uban sa iyang buotan ug mapanggaon nga tingog: “Maayong buntag Elder Reier o Sister Yang. Kumusta ka na karon?”

Siya misulti kanako nga sa iyang kaugalingong hunahuna gusto siyang maghunahuna kon asa ang mga misyonaryo mohuman sa ilang misyon. Kini motabang kaniya aron mahibaw-an asa sila i-destino. Si Elder Eyring dayon motuon sa mga komento gikan sa mga bishop ug sa mga stake president, mga sulat medikal, ug ubang mga isyu nga may kalambigitan sa matag misyonaryo.

Dayon siya mibalhin sa laing screen nga mipakita sa mga dapit ug mga misyon sa tibuok kalibutan. Sa katapusan, sa pag-aghat sa Espiritu kaniya, siya mo-assign sa misyonaryo ngadto sa iyang misyon.

Gikan sa uban sa Napulog Duha, akong nasayran nga kining kinatibuk-ang pamaagi makita sa matag semana sa higayon nga ang mga apostoles sa Ginoo mo-assign og daghang mga misyonaryo nga moalagad sa tibuok kalibutan.

Nga nakaalagad isip usa ka misyonaryo sa kaugalingon nakong nasud sa Eastern States Mission daghang katuigan na ang milabay, ako natandog kaayo niini nga kasinatian. Usab, sa pag-alagad isip mission president, mapasalamaton ako sa dugang nga saksi sa akong kasingkasing nga ang mga misyonaryo nga akong gidawat sa Siyudad sa New York gipadala kanako pinaagi sa pagpadayag.

Human sa pag-assign og pipila ka mga misyonaryo, si Elder Eyring miatubang kanako samtang iyang gihinuktukan ang usa ka partikular nga misyonaryo ug miingon, “Unya, Brother Rasband, asa sa imong hunahuna kining misyonaryo kinahanglan nga moadto?” Nakugang ko! Ako hilom nga miingon kang ni Elder Eyring nga wala ako mahibalo ug wala ako masayud nga ako makahibalo! Siya direkta nga mitan-aw nako ug yanong miingon, “Brother Rasband, paminaw og maayo ug ikaw usab makahibalo!” Niana, akong gibira ang akong lingkuranan paduol ni Elder Eyring ug sa computer screen, ug ako naminaw og maayo!

Duha ka laing higayon samtang nagpadayon ang proseso, si Elder Eyring moatubang kanako ug moingon, “Nan, Brother Rasband, asa ang gibati nimo nga kini nga misyonaryo kinahanglan nga moadto?” ako mongalan og usa ka partikular nga misyon, ug si Elder Eyring mahunahunaon nga motan-aw kanako ug moingon, “Dili, dili kana!” Dayon siya mopadayon sa pag-assign sa mga misyonaryo diin gibati niya ang pag-aghat.

Samtang nagkaduol na kami sa paghuman niana nga miting sa pagpang-assign, usa ka hulagway sa misyonaryo migawas sa screen. Diha koy pinakakusog nga pag-aghat, ang pinakakusog nianang buntaga, nga ang misyonaryo nga among gitan-aw i-destino ngadto sa Japan. Wala ko mahibalo nga si Elder Eyring mangutana nako niini, apan kahibulongan siya nangutana. Dili piho ug mapainubsanon ako nga misulti kaniya, “Japan?” si Elder Eyring mitubag dayon, “Oo, moadto kita didto.” Ug didto sa computer screen ang mga misyon sa Japan nakita. Nahibaloan dayon nako nga ang misyonaryo i-destino ngadto sa Japan Sapporo Mission.

Si Elder Eyring wala mangutana kanako sa tukma nga ngalan sa misyon, apan iyang gi-destino kana nga misyonaryo ngadto sa Japan Sapporo Mission.

Sa tago sa akong kasingkasing natandog kaayo ako ug sinsero nga mapasalamaton sa Ginoo sa pagtugot kanako nga masinati ang pag-aghat aron masayud asa kana nga misyonaryo moadto.

Sa katapusan sa miting si Elder Eyring mihatag sa iyang pagsaksi diri kanako sa gugma sa Manluluwas, nga anaa Kaniya alang sa matag misyonaryo nga gi-destino sa pag-adto sa kalibutan ug magsangyaw sa gipahiuli nga ebanghelyo. Siya miingon nga kini pinaagi sa dakong gugma sa Manluluwas nga ang Iyang mga alagad mahibalo asa kining talagsaon nga nga batan-ong mga lalaki ug mga babaye, senior nga mga misyonaryo, ug senior nga mga magtiayon nga misyonaryo moalagad. Ako adunay dugang nga pagsaksi niana nga buntag nga ang matag misyonaryo nga gitawag niini nga Simbahan, ug i-destino o i-destino pag-usab ngadto sa usa ka partikular nga misyon, gitawag pinaagi sa pagpadayag gikan sa Ginoong Dios nga Labawng Makagagahum pinaagi sa usa niini, nga Iyang mga alagad.

Ako motapos uban sa mga pulong sa Ginoo ngadto sa managsuong Whitmer, kinsa adunay mahinungdanon nga papel sa unang mga adlaw sa Pagpahiuli. Sila mga saksi sa bulawan nga mga palid ug ang ilang pinirmahan nga mga pagpamatuod gilakip diha sa atubangan sa matag kopya sa Basahon ni Mormon. Nalakip sila sa unang pundok sa mga misyonaryo nga gitawag sa propeta sa Dios niadtong 1829 aron sa pagsangyaw sa ebanghelyo ni Ginoong Jesukristo.

Diha sa pasiuna sa seksyon 14 sa Doktrina ug mga Pakigsaad, kini nag-ingon, “Tulo sa anak nga mga lalaki ni Whitmer, ang matag usa nakadawat og pagpamatuod ingon sa pagkatinuod sa buhat, may dakong kahingawa sa butang kalabut sa ilang tagsa-tagsa nga katungdanan.”

Ngadto ni John ug Peter Whitmer, Jr. ang Ginoo miingon niini: “Kay sa daghan nga mga higayon ikaw nagtinguha kanako nga masayud kon asa niana ang labing bililhon nganha kanimo.”⁵

Ako nagtuo nga daghan kaninyo mga kabatan-unan nakapangutana sa inyong kaugalingon nianang sama nga pangutana. Ania ang tubag sa Ginoo: “Ug karon tan-awa, Ako moingon nganha kanimo, nga ang butang nga labing bililhon nganha kanimo mao ang pagpahayag og paghinulsol ngadto niini nga mga katawhan, nga ikaw unta makadala og mga kalag ngari kanako, nga ikaw unta makapahulay uban kanila sa gingharian sa akong Amahan.”⁶

Niini nga panahon sa inyong kinabuhi, ang usa ka tawag sa misyon gikan sa Ginoo, akong batan-on nga mga higala, mao ang labing importante nga buhat nga inyong mahimo. Pangandam karon, pagpuyo nga matarung, pagkat-on gikan sa inyong pamilya ug sa mga lider sa Simbahan, ug dali apil kanamo sa pagtukod sa gingharian sa Dios dinhi sa yuta—dawata ang inyong balaan nga pagkatudlo sa usa ka “hilabihan ka mahinungdanon nga katuyoan.”⁷ Kini ang mapainubsanon nakong pag-ampo sa pangalan ni Jesukristo, amen.