Ang Conference Center Nakakompleto sa Unang Dekada sa Pagserbisyo

Ang komperensya sa Abril mao ang sinugdanan sa ikaduhang dekada sa pagserbisyo sa Conference Center. Sa unang 10 ka tuig niini, minilyon ang nakasinati sa walay samang kalidad sa talagsaong building panahon sa labaw sa 100 ka mga sesyon sa kinatibuk-ang komperensya ug 4,500 ka mga hitabo, ingon man usab kaubang mga sibya niini.

Mipahigayon ang Conference Center sa unang sesyon sa kinatibuk-ang komperensya niadtong Abril 1, 2000. Dinhi si Presidente Gordon B. Hinckley (1910–2008) miingon: “[Ang Conference Center] dugang nga makapanindot niining siyudad. Dili lamang ang atong kinatibuk-ang mga komperensya ang ipahigayon dinhi, ug uban pang relihiyoso nga mga miting, apan kini magsilbi usab nga cultural center alang sa labing mabulukon nga mga pasundayag. Kita naglaum nga kinsa kadtong dili miyembro sa simbahan moanhi, mosinati sa palibut niining matahum nga lugar, ug mobati nga mapasalamaton sa pagkaanaa niini” (“To All the World in Testimony,” Liahona, Hulyo 2000, 4; Ensign, Mayo 2000, 4).

Paglabay sa unom ka bulan, niadtong Oktubre 8, si Presidente Hinckley mipahinungod sa building.

Sukad niadto, dul-an sa pito ka milyon nga mga bisita ang nakasulod sa Conference Center aron sa pagtambong sa 4,577 ka mga kalihokan. Mga 4.8 milyon ka mga bisita ang naka-tour sa building, ug ang center nagdumala sa labaw sa 5,500 ka halangdon nga mga tawo. Ang mga kalihokan nga gihimo sa auditorium ug sumpay sa Conference Center Theater naglakip sa kinatibuk-ang komperensya, 10 ka kinatibuk-ang mga miting sa Young Women, 10 ka kinatibuk-ang mga miting sa Relief Society, tulo ka memoryal nga mga kalihokan (apil ang lubong ni Presidente Hinckley), ug 125 ka pasundayag sa musika, walay apil sa Musika ug ang Gipamulong nga Pulong, sa Tabernacle Choir nga gihimo sa Conference Center mga 186 ka higayon.

Kadtong mga numero nagsugod sa pagsugyot sa katumanan sa mga pulong ni Presidente Hinckley.

Si Brent Roberts, direktor sa mga pasilidad sa punoang buhatan, nakahimamat og daghang mga tawo kinsa mipakita sa ilang pasalamat kabahin sa ilang gibati didto. “Sila mosulod nga may mga luha sa ilang mga mata ug ang Espiritu diha sa ilang kasingkasing,”siya miingon. “Dili lamang tungod sa building, tinuod—sa Ginoo, sa Iyang buhat, ug sa Iyang Espiritu.”

Ang center gipahibalo ni Presidente Hinckley sa buntag sa Pasko sa Pagkabanhaw atol sa kinatibuk-ang komperensya sa Abril 1996.

Usa ka paghulagway sa mga hagit nga nabuntog atol sa pagtukod sa Conference Center nagtabang sa pagmatuod sa talagsaong kahimtang sa building. Ang 21,000-ka mga lingkuranan sa auditorium kinahanglang itukod sa bakilid nga yuta tunga-tunga sa Main Street sa Siyudad sa Salt Lake ug sa West Temple Street. Tulo ka dagkong mga kompanya sa konstruksyon ang miapil sa trabaho. Walay mga haligi sa auditorium, sa pagsigurado nga ang tanan makatan-aw nga walay nag-ali, busa ang mga tigtukod kinahanglang mogamit sa 290-ka pye-nga gitas-on (88 m) nga mga steel trusses aron makasuporta sa gibug-aton nga 250 ug 525 ka libras matag kwadrado pulgadas (17–37 kg matag sentimetro kwadrado). Kini nga desinyo mopahiangay usab sa mga plano sa landscaping alang sa atup. Sa bisan unsa nga adlaw panahon sa pagtukod, mga 1,000 ka trabahador ang anaa sa dapit.

Panahon sa pagtukod, ang building nakalahutay sa mapintas kaayo nga unos niadtong 1999 sa Siyudad sa Salt Lake, ug bisan tuod ang poste nga nagsuporta sa dako nga crane naguba, ang trabaho nagpadayon.

Ang estraktura nakompleto sa hustong panahon, ug ang mga bisita nakatagamtam sa hilabihang kanindot nga ekipo ug mga pasilidad. Sa telebisyon, ang Conference Center adunay usa ka digital, high-definition nga signal. Ang nag-unang live high-definition nga sibya sa Utah nagagikan sa Conference Center panahon sa pagsaulog sa ika-90 nga adlawng natawhan ni Presidente Hinckley niadtong Hunyo 2000.

Ang mga enhinyero mihimo sa sound system sa auditorium aron sa paghatag sa pinakanindot nga acoustic—bisan kon ang mga bisita nagpaminaw ba sa mamumulong o nagtambong og usa ka pasundayag sa musika—mabinantayong mibanabana sa pagsigurado sa mga materyal sa mga bong-bong ug kisame, ang gidaghanon sa mga tawo nga maigo sa sulod, ug sa pagbutang sa karpet ug kutson.

Si Presidente Hinckley miingon nga ang building nagpakita usab og ka-elegante. Ang ka-elegante makita samtang ang mga bisita maglakaw-lakaw diha sa pasilyo, diin usa ka eskultura sa Manluluwas ug mga panagway sa mga Presidente sa Simbahan ang makita; maglakaw sa mga tanaman sa atup, diha sa kakahoyan, sa kabulakan, mga mugbong tanom, ug mga waterfall; hangad sa siyam ka hayag sa langit diha sa ibabaw sa building, nga mahimong tabunan alang sa mga pasundayag; ug malingaw sa mga painting sa tibuok building, kadaghanan niini pamilyar ngadto sa mga miyembro sa Simbahan ug hapit kining tanan mga orihinal.

Ang dako kaayo nga building nagpakita og taas nga makapahimuot nga estatistiko. Kini naglukop sa 10 ka acre (4 ha), o usa ka eskina sa siyudad. Adunay paigong wiring sa kuryente sulod sa center sa pagliyok sa kalibutan og kaduha. Labaw sa 5,900 ka gallon (22,330 ka litro) sa tubig ang gi-recycle ngadto sa mga fountain ug gipanindot nga mga agianan sa tubig kada minuto.

Apan, ang labing nindot nga ikapakita sa center dili mao ang wiring ni ang gibug-aton nga madala sa atup, ni ang bisan unsa nga estatistiko.

“Kini dili usa ka piraso sa museyo, bisan tuod ang arkitektura hilabihang kanindot,” miingon si Presidente Hinckley. “Kini usa ka dapit nga gamiton sa pagpahinungod sa Labawng Makagagahum ug sa pagtuman sa Iyang mahangturong mga katuyoan” (“This Great Millennial Year,” Liahona, Ene. 2001, 80; Ensign, Nob. 2000, 67).