Ang mga Miyembro sa Haiti Nagpadayon sa Unahan, Nalig-on sa Ebanghelyo
Sa dihang ang linog miigo sa Haiti niadtong Enero 2010, si Jean-Elie René midali-dali sa pag-uli sa balay aron sa pagsiguro nga ang iyang pamilya luwas. Sa iyang pag-abut, iyang nakit-an ang usa sa iyang tulo ka anak nga naghilak diha sa dalan, ug siya nakadungog sa mga syagit sa iyang usa pa ka anak gikan sa ubos sa mga linumpag asa ang balay sa pamilya nagtindog.
Ang 32 anyos nga amahan misunod sa hilak ug mikalot sa mga linumpag hangtud iyang nakit-an ang iyang lima ka tuig nga anak nga lalaki ug ang lawas sa iyang mabdos nga asawa, nagpadayon sa pagprotekta sa iyang siyam ka bulan nga bata gikan sa nalumpag nga atup sa ilang balay.
Si Brother René nag-alagad isip ward clerk sa Leogane Ward, Port-au-Prince Haiti Stake. Bisan tuod namatay ang iyang asawa, iyang bata nga wala matawo, ug nawala ang iyang balay, siya wala moreklamo o masuko kabahin sa iyang sitwasyon. Kadaghanan sa mga adlaw human sa linog, si Brother René makita sa meetinghouse, uban sa bata nga anaa sa iyang paa ug ang iyang duha ka anak nga mga lalaki sa iyang kilid, nagtabang sa bishop sa pagpahimutang og tabang ngadto sa mga miyembro sa ward ug kadtong nagpuyo sa meetinghouse isip temporary nga balay.
Ang istorya ni Brother René makapatandog, apan kini may kapareha. Ang mga miyembro sa Simbahan sa tibuok Haiti hilabihang miantus sa makaguba nga 7.0 nga gikusgon sa linog, apan ang kalamidad nakapamatuod sa kalig-on sa nagtubo nga gidaghanon sa mga miyembro sa Haiti. Sama ni Brother René, daghang mga miyembro—karaan ug unang henerasyon nga mga miyembro—nakabuntog sa mga hagit ug nakakaplag og kalinaw ug kahupay sa pagkamatinud-anon ug pagkamasulundon.
Napamatud-an diha sa Pagsulay
Sa ilang tibuok nga mga pagsulay, ang mga miyembro sa Simbahan sa Haiti nagpabiling lig-on diha sa ebanghelyo samtang sila nagpadayon sa pag-amuma ug paglig-on sa usag-usa ug kadtong anaa sa ilang mga komunidad.
“Tinuod nga ang tanan namong gipanag-iya, gani ang among materyal nga gipanag-iya ug among pamilya, nawala. Apan ang among hugot nga pagtuo ni Jesukristo nagpabilin,” miingon si Yves Pierre-Louis, bishop sa Leogane Ward. “Kadto usa ka nindot nga oportunidad alang kanamo sa pagtimbang-timbang sa among mga kaugalingon isip nga disipulo ni Kristo.”
Ang lokal nga mga priesthood lider sa piho gyud mao ang nindot kaayo nga ehemplo sa hugot nga pagtuo ug pagpamatuod samtang sila nagbuntog sa hagit, nagkat-on sa pagtuman sa ilang mga calling sa lisud nga mga panahon ug pagtabang sa uban nga nanginahanglan miingon si Elder Francisco J. Viñas sa Seventy, Area President sa Caribbean.
“Ilang gigamit ang ilang mga yawe sa priesthood sa pagpanalangin sa mga kinabuhi sa mga miyembro ug dili mga miyembro,” siya miingon. “Sila nagtrabaho nga konseho ug nagdawat og paggiya gikan sa Espiritu sa pag-atubang sa lisud nga mga hagit matag adlaw.”
Ang resulta sa pagkagun-ob sa linog nakamugna og usa ka hagit, ilabi na sa mga bishop sa Haiti, miingon si Prosner Colin, presidente sa Port-au-Prince Haiti Stake. Mga bishop ug ubang mga lider sa Simbahan maoy responsable sa pag-amuma ug pagtabang sa mga miyembro sa ward, ingon man ang ilang kaugalingong mga pamilya.
“[Ang mga bishop] nagpadayon sa pagtabang,” miingon si Presidente Colin. “Sila nakasabut nga sila nawalaan og daghang butang, apan anaa kanila ang ebanghelyo. Sila nag-awhag [sa mga miyembro] sa pagpadayon sa pagpuyo sa takus nga paagi.”
Si Bishop Pierre-Louis nahimong lider sa komunidad human sa linog. Sa tibuok mga semana ug mga bulan human sa pagkalaglag sa Haiti, iyang gipahinungod ang iyang kinabuhi sa pagserbisyo sa mga miyembro ug dili mga miyembro sa Leogane—pag-atiman sa mga panginahanglan sa mga gatusan.
“Siya mao ang labing talagsaon, mapainubsanon nga sulugoon nga inyong mahimamat,” miingon si Chad Peterson, usa ka doktor gikan sa Arizona kinsa migahin og panahon uban ni Bishop Pierre-Louis isip boluntaryo pagkahuman sa linog.
Hugot nga Pagtuo alang sa Karon ug sa Umaabot
Daghang mga istorya ang napakigbahin sa mga miyembro sa tibuok Haiti kansang pagka mapahiangayon ug hugot nga pagtuo diha sa Ginoo midala kanila sa ilang mga pagsulay.
“Bisan kon ang matinud-anon nga taga-Haiti nga mga Santos nag-antus sa hilabihan, sila puno og paglaum alang sa umaabot,” miingon si Elder Wilford W. Anderson sa Seventy sa iyang pamulong sa kinatibuk-ang komperensya sa Abril 2010. “Sama sa unang mga pioneer niadtong 1846, ang ilang mga kasingkasing masulub-on apan ang ilang mga espiritu lig-on. Sila usab nagtudlo kanato nga ang paglaum ug kalipay ug hingpit nga kalipay dili mga produkto sa kahimtang kondili sa hugot nga pagtuo diha sa Ginoo.”
Usa ka pagpakita sa sama nga pagkamasulundon ug hugot nga pagtuo makita sa dihang, diha-diha dayon human sa linog, ang mga miting sa Simbahan nagpadayon nga walay pagkabalda.
Dili igsapayan ang pagkagun-ob sa ilang nasud, ang mga miyembro sa Haiti miabut sa simbahan nga nagsul-ob sa ilang Sunday best, adunay mga pahiyum sa ilang mga nawong. Ang ebanghelyo mao ang suporta nga ang kadaghanan nagsalig sa pagbitad kanila gikan sa ilang kaguol ug kasubo.
“Bisan pa sa pagkawala sa ilang mga balay, mga trabaho, ug mga sakop sa pamilya, ang mga tawo mahigugmaon, masaligon, ug maayo og batasan. Sila adunay talagsaon nga hugot nga pagtuo,” miingon si Brother Peterson.
Karon, ang Simbahan nagpadayon sa pagdaghan sa Haiti. Ang gidaghanon sa motambong sa miting sa sakrament misaka, miingon si Presidente Colin, ug ang mga tawo sa Haiti nagpadayon sa pagtrabaho sa pagtukod og balik sa ilang mga komunidad.
“Ang mga miyembro maayo kaayo sa ilang pagserbisyo sa uban,” siya miingon. “Sila nagbisita kanila; sila nangita og mga oportunidad sa pagtrabaho alang sa ilang kaugalingon ug alang sa uban.”
Si Berthony Theodor, usa ka lumad nga taga-Haiti ug direktor sa welfare sa Simbahan sa Haiti, miingon nga siya ug ang ubang mga lider sa karon ug sa umaabot sa Simbahan sa Haiti nakaangkon og bililhong kasinatian isip resulta sa katalagman.
“Kita adunay kahigayunan sa pagserbisyo sa uban, sa pagpakita nila pag-usab kon unsa nato sila kahigugma,” siya miingon. “Kita nakakat-on pag-usab nga kita wala mag-inusara dinhi sa kalibutan, nga kita mga sakop sa katawhan sa Ginoo.”
Si Brother Theodor miingon nga ang linog—o ang bisan unsa nga katalagman—dili makapawala sa kalinaw o hingpit nga kalipay sa mga miyembro sa Haiti.
“Kini mao ang akong pagpamatuod nga ang Ginoo dili makalimot sa Iyang mga anak,” siya miingon. “Siya nasayud kon asa ako, akong sitwasyon. Siya dili mobiya kanako nga ako mag-inusara.”