Magmaisug

Daghang mga higayon, samtang ang mga General Authority namulong sa mga kaigsoonan sa priesthood atol sa kinatibuk-ang komperensya, mosugod sila pinaagi sa pagsulti nga ilang gibati nga ingon og namulong sila sa usa ka “lig-on nga mga kasundalohan” sa gamhanan nga mga lider sa priesthood. Karong gabhiona, akong gibati nga ingon og nagbarug ako atubangan sa usa ka “lig-on nga mga kasundalohan” sa pinili nga mga anak nga babaye sa Dios. Gipili kamo aron mopadayon sa unahan, mobarug tupad niadtong maisugon nga mga naghupot sa priesthood, diha sa pagkamatarung niining ulahing mga adlaw. Madanihon kamo ug maanindot tan-awon.

Gusto nakong sugdan kining gabhiona pinaagi sa daklit nga pagribyu sa makasaysayanon nga panglantaw sa atong tema, Josue 1:9: “Magmakusganon ka ug magmaisug; ayaw pagkahadlok, ug dili ka magmaluya: kay ang Ginoo nga imong Dios magauban kanimo bisan asa ikaw paingon.”

Si Moises usa ka bantugan nga propeta kinsa nangulo sa mga anak sa Israel gikan sa yuta sa Ehipto, diin nahimo sila nga mga ulipon ug naimpluwensyahan sa pagsimba sa mga dios-dios. Human sa 40 ka tuig sa kalisdanan didto sa kamingawan, duol na gayud kaayo sila ngadto sa ilang bag-ong panimalay, diin mahimo na silang gawasnon sa pagsimba sa tinuod ug buhi nga Dios. Sa kamatayon ni Moises, si Josue gitawag sa Dios aron mahimong propeta kinsa maoy mokompleto niining milagroso nga panaw.

Si Josue usa ka impluwensyal nga lider. Ang Giya ngadto sa mga Kasulatan mitawag kaniya nga “dungganang panig-ingnan sa usa ka mainampoon nga manggugubat” ug nangahulugan og ang iyang pangalan nagpasabut nga “Ang Dios nagtabang” (Ang Giya ngadto sa mga Kasulatan, “Josue,” 106). Ang iyang dinasig nga pagpangulo gikinahanglan gayud kaayo tungod kay daghan pa kaayo nga mga sapa nga pagalabngon ug gubat nga pagadaugon sa dili pa ang tanang gisaad sa Ginoo ngadto sa mga anak sa Israel matuman ug maangkon.

Ang Ginoo nasayud nga ang propeta nga si Josue ug ang mga anak sa Israel manginahanglan og dakong kaisug atol niining panahona. Diha sa unang kapitulo sa basahon ni Josue, ang Ginoo misulti kaniya sa daghang higayon nga “magmakusganon ug magmaisug.” Ang pulong nga kaisug gipasabut isip “mental o moral nga kalig-on sa … pagpadayon ug pagsugakod sa kakuyaw, kahadlok, o kalisud” (Merriam-Webster’s Collegiate Dictionary, 11th ed. [2003], “courage”; empasis gidugang). Pinaagi sa ilang kaisug ug pagkamasulundon, si Josue ug ang mga anak sa Israel nakasulod didto sa yuta nga saad ug nakakaplag og kalipay diha sa mga panalangin sa Ginoo.

Si Josue ug ang mga anak sa Israel nagpuyo dugay na kaayong panahon. Apan sa atong panahon naningkamot usab kita nga makasulod ngadto sa usa ka “yuta nga saad.” Ang atong labing mahinungdanon nga tumong mao ang pagbaton og kinabuhing dayon uban sa atong Langitnong Amahan. Diha sa unang kapitulo sa basahon ni Josue, atong makita ang upat ka siguradong mga giya aron sa pagtabang kanato nga mabuntog ang atong mga babag, makompleto ang atong panaw, ug matagamtam ang mga panalangin sa Ginoo diha sa atong “yuta nga saad.”

Una, diha sa bersikulo 5 ang Ginoo nagsaad kang Josue, “Ikaw dili ko kawangon, ni biyaan ko ikaw.” Atong makaplagan ang kaisug ug kalig-on dinhi niini nga saad nga ang Ginoo anaa kanunay alang kanato ug dili gayud kita biyaan nga mag-inusara. Gitudloan kita nga ang Langitnong Amahan nakaila ug nahigugma sa matag usa sa Iyang mga anak. Isip usa sa Iyang bililhon nga mga anak nga babaye, makadawat kamo sa Iyang kasigurohan ug paggiya pinaagi sa gahum sa pag-ampo. Diha sa Doktrina ug mga Pakigsaad atong mabasa, “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo” (D&P 112:10).

Ako nagtuo niining mga pulonga ug nagsaad kaninyo nga ang Langitnong Amahan maminaw ug modungog sa atong mga pag-ampo. Apan kasagaran ang pailub gikinahanglan kon kita “[mag]hulat sa Ginoo” (Isaias 40:31). Sa atong paghulat, mahimong mosugod kita sa paghunahuna nga nakalimtan na kita o ang atong pag-ampo wala dungga o tingali dili kita takus nga kini tubagon. Dili kini tinuod. Ganahan ko sa makapahupay nga mga pulong ni Haring David: “Naghulat ako nga mapailubon gayud sa Ginoo; ug siya mikiling kanako, ug nagpatalinghug sa akong pagtuaw” (Salmo 40:1).

Bisan unsa pa man ang mahimo ninyong atubangon sa inyong kaugalingon nga panaw, ang unang giya nga makita diha sa Josue nagpahinumdom kanato nga mag-ampo, magmapailubon, ug hinumduman ang saad sa Dios: “Ikaw dili ko kawangon, ni biyaan ko ikaw” (Josue 1:5).

Ang ikaduhang giya makita diha sa bersikulo 7, sa dihang ang Ginoo nagsulti ni Josue, “Pag-atiman sa pagbuhat sumala sa tanang balaod … : ayaw pagtipas ngadto sa tuo ni ngadto sa wala gikan niana, aron magmauswagon ka bisan asa ka paingon.” Ang Ginoo nagpahimangno ni Josue nga higpit nga magmasulundon ngadto sa mga sugo, ug dili gayud motipas gikan sa dalan sa Ginoo. Si Presidente Howard W. Hunter mitudlo: “Si Josue nasayud nga ang iyang pagkamasulundon magdala og kalampusan, ug bisan wala siya hingpit nga nasayud kon unsaon niya sa paglampus, siya niining higayuna aduna nay pagsalig sa resulta.… Sa pagkatinuod ang mga kasinatian sa bantugan nga mga propeta [makita sa mga kasulatan] girekord [ug gipreserbar] aron sa pagtabang kanato nga makasabut sa kaimportante sa pagpili sa dalan sa higpit nga pagkamasulundon” (“Commitment to God,” Ensign, Nob. 1982, 57, 58).

Usa ka bulan na ang milabay mibisita ako sa usa ka grupo sa batan-ong mga babaye. Akong gipangutana ang mas edaran na nga mga babaye kon unsa ang ilang ikatambag sa bag-o nga Beehive aron sa pagtabang kaniya nga magpabiling matinud-anon ug mahiyason sa matag kahimtang nga iyang mahimong masugatan. Usa ka batan-on nga babaye miingon, “Kon maglakaw ka sa agianan sa imong eskwelahan, tingali, aduna kay masiplatan, makakita ka og usa ka butang nga makakuha sa imong pagtagad, usa ka butang nga daw dili sakto. Mahimong makuryuso ka ug gustong motan-aw. Ang akong tambag mao kini: Ayaw og tan-aw. Mosaad ko kanimo nga mahayan nimo kini kon motan-aw ka. Tuohi ko; diretso lang og tan-aw sa unahan.”

Samtang naminaw ako niining batan-ong babaye, nasayud ko nga nagpaminaw ko sa tambag sa Ginoo ngadto ni Josue, “Ayaw pagtipas ngadto sa tuo ni ngadto sa wala gikan niana” (Josue 1:7), nga gigamit sa inadlaw-adlaw nga kahimtang niining ulahing mga adlaw. Batan-ong mga babaye, likayi ang mga tintasyon nga naglibut kaninyo pinaagi sa higpit nga pagsunod sa mga sugo. Diretso lang og tan-aw sa unahan sa inyong mahangturon nga tumong. Ang ikaduhang giya nagpahinumdom kanato nga sa pagbuhat niini kamo panalipdan ug “magmauswagon kamo bisan asa kamo paingon” (Josue 1:7).

Diha sa bersikulo 8 atong makita ang atong ikatulong giya. Dinhi ang Ginoo nagpasabut ngadto sa usa ka “basahon sa kasugoan” ug nagsulti kang Josue nga “magpalandong ka niana sa adlaw ug sa gabii, aron himatngonan mo sa pagbuhat sumala sa tanan nga gisulat dinha:… ug unya makab-ot mo ang kauswagan.” Ang Ginoo nagpahimangno ni Josue, ug kanatong tanan sa pagbasa sa mga kasulatan. Ang matag adlaw nga pagtuon sa kasulatan, ilabi na sa Basahon ni Mormon, nag-establisar og usa ka lig-on nga pundasyon alang sa inyong naglambo nga pagpamatuod ni Jesukristo ug sa Iyang ebanghelyo. Nagdapit kini sa Espiritu nganha sa inyong kinabuhi. Si Presidente Harold B. Lee mitambag, “Kon kita wala magbasa sa mga kasulatan matag adlaw, ang atong mga pagpamatuod mag-anam og kakunhod, [ug] ang atong espiritwalidad dili mouswag ang kalig-on” (Teachings of Presidents of the Church: Harold B. Lee [2000], 66).

Sulod sa mga pahina sa mga kasulatan mao ang dili maihap nga mga paggiya, mga saad, mga kasulbaran, ug mga pahinumdom nga motabang kanato sa atong panaw ngadto sa “yuta nga saad.” Ang ikatulong giya nagmando kanato sa pagbasa ug pagpamalandong sa mga kasulatan matag adlaw aron atong makaplagan ang kauswagan ug kalampusan.

Human sa pakigsulti sa Ginoo ngadto ni Josue, si Josue namulong sa mga anak sa Israel. Sa panapos sa iyang pagpamulong, diha sa bersikulo 16, ang mga anak sa Israel mitubag ngadto sa iyang mga pulong ug naghatag kanato sa atong ikaupat nga giya. Sila nagaingon, “Ang tanan nga imong gisugo kanamo among pagabuhaton, ug bisan asa kami nimo sugoa, kami moadto.”

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita adunay oportunidad sa paghimo niining sama nga pasalig nga mosunod sa atong propeta, si Presidente Thomas S. Monson, kinsa kauban nato karong gabhiona. Pinaagi sa pag-ampo ug pamatuod sa Espiritu, matag usa kanato makabaton sa atong kaugalingong pagpamatuod kabahin sa buhi nga propeta. Kini nga pagpamatuod motubo samtang kita maminaw, mosunod, ug magmaisug sa paggamit sa iyang mga pagtulun-an diha sa atong inadlaw-adlaw nga kinabuhi.

Ang pagpaminaw ug pagsunod sa tambag sa atong propeta nagtugot kanato nga makadawat sa espesyal nga mga panalangin. Paminaw ngadto sa pipila ka propetikanhong mga saad nga gipadangat ni Presidente Monson kanato sa atong katapusan nga kinatibuk-ang komperensya: “Hinaut nga ang Dios mopanalangin kaninyo. Hinaut nga ang Iyang saad sa kalinaw magauban kaninyo karon ug sa kanunay” (“Panapos nga Pakigpulong,” Liahona, Nob. 2009, 110). “Daghan nga mga saad ang nagpaabut kanato kon kita matinuoron ug matinud-anon” (“Disiplinaha ang Imong mga Pagbati, O Akong Igsoon,” Liahona, Nob. 2009, 69). “Akong ihatag ang mga panalangin sa langit diha sa matag usa kaninyo” (Liahona, Nob. 2009, 110).

Sunod semana sa kinatibuk-ang komperensya, ako modapit kaninyo sa pagpaminaw ngadto sa mga panudlo ug mga saad nga ihatag pinaagi sa atong propeta ug sa mga apostoles. Dayon, gamiton ang ikaupat nga giya pinaagi sa pagpasalig nga mosunod sa tambag sa propeta ug moingon usab nga “tanan nga [iyang] gisugo kanamo among pagabuhaton, ug bisan asa [niya] kami sugoa, kami moadto.”

Usahay, kining upat ka mga giya—pag-ampo, pagkamasulundon ngadto sa sugo sa Dios, matag adlaw nga pagtuon sa kasulatan, ug usa ka pasalig nga mosunod sa buhi nga propeta—daw gagmay ug yano nga mga butang. Pahinumduman ko kamo sa kasulatan nga makita diha sa Alma: “Tan-awa ako moingon nganha kanimo, nga pinaagi sa gagmay ug yano nga mga butang ang mga dagko nga butang ipahinabo” (Alma 37:6). Kon gamiton diha sa atong inadlaw-adlaw nga kinabuhi, kining upat ka “gagmay ug yano” nga mga giya gikan sa basahon ni Josue mahiusa aron sa paghatag og labing gamhanan nga tinubdan sa kaisug ug kalig-on nga anaa niini: hugot nga pagtuo diha sa atong Langitnong Amahan ug sa Iyang Anak, si Jesukristo.

Ang Langitnong Amahan nasayud nga ang atong indibidwal nga mga panaw dili sayon. Nag-atubang kita matag adlaw og mga sitwasyon nga nagkinahanglan og kaisug ug kalig-on. Usa ka bag-ong istorya diha sa Church News nagpamatuod niini nga kamatuoran:

“Ang usa ka magtutudlo sa high school pipila ka bulan ang milabay misugod sa iyang pahimangno usa ka adlaw niana pinaagi sa paghangyo sa mga estudyante kinsa misuporta og usa ka politikanhon nga isyu sa pagbarug sa usa ka bahin sa lawak, samtang kadtong kinsa supak niini gipahimangnoan sa pagbarug sa pikas bahin sa lawak.

“Human makaporma ang mga estudyante sa ilang mga habig, ang magtutudlo mibarug didto sa habig sa misupak. Nagtumbok sa usa ka batan-ong babaye nga anaa sa habig sa mga nagsuporta, ang magtutudlo misugod sa pagpangataki kaniya ug sa uban nga mga klasmeyt tungod sa ilang mga ideya.

“Ang batan-ong babaye, kinsa usa ka Mia Maid sa iyang ward, midawat sa pagpangataki nga misaway sa iyang mga gituohan.

“[Nagpabilin siya] nga kalmado sa atubangan nga pagpangataki nga gihimo sa usa ka tawo nga anaa sa katungdanan” (“What Youth Need,” Church News, Mar. 6, 2010, 16).

Kining batan-on nga babaye mipakita og talagsaon nga kaisug sa iyang kaugalingong natad sa panggubatan, nga niining panahona mao ang lawak sa iyang eskwelahan. Bisan asa man kamo, ug bisan unsa man ang inyong atubangon, ako naglaum nga inyong pahimuslan ang mga giya nga makita diha sa basahon ni Josue aron makasalig kamo sa saad sa Ginoo: “Magmakusganon ka ug magmaisug; ayaw pagkahadlok, ug dili ka magmaluya: kay ang Ginoo nga imong Dios magauban kanimo bisan asa ikaw paingon” (Josue 1:9).

Gusto nakong ibilin kaninyo ang akong pagpamatuod nga ang Langitnong Amahan nakaila ug nahigugma sa matag usa kaninyo. Kon kamo moduol ngadto Kaniya, Siya dili mopakyas kaninyo! Siya mopanalangin kaninyo og kalig-on ug kaisug nga inyong kinahanglanon aron sa pagkompleto sa inyong panaw balik ngadto Kaniya. Mapasalamaton ako sa mga kasulatan, ug sa gamhanan nga mga ehemplo sama sa propeta nga si Josue. Mapasalamaton ako ni Presidente Monson, kinsa naningkamot sa pagdala kanato nga luwas balik ngadto sa atong Langitnong Amahan. Nag-ampo ako nga, sama sa mga anak sa Israel, makasulod kitang tanan ngadto sa atong “yuta nga saad” ug makakaplag og kapahulayan diha sa mga panalangin sa Ginoo. Namulong ako niining mga butanga sa pangalan ni Jesukristo, amen.