Ang Sukaranan sa Atong Manunubos

Pipila ka tuig na ang milabay ako mibisita sa Nauvoo, Illinois uban sa akong pamilya. Didto ang unang mga Santos miabut nga nangita og kadangpan. Kadaghanan nawagtangan sa ilang mga panimalay ug mga umahan, ug ang pipila nawad-an sa ilang mga minahal tungod sa nagkagrabe nga pagpanggukod. Sa Nauvoo naghugpong sila ug mitukod og bag-o ug matahum nga siyudad. Apan ang pagpanggukod walay hunong, ug pagka 1846 sa makausa pa sila napugos sa pagbiya sa ilang mga panimalay––niining tungora tunga-tunga sa tingtugnaw. Ilang gilinya ang ilang mga karomata diha sa Karsada sa Parley, nga naghulat sa ilang turno sa pagtabok sa nabagtok nga katubigan sa Suba sa Mississippi ngadto sa walay kasiguroan nga umaabot. Samtang nagbarug kami sa Karsada sa Parley nga naghunahuna sa ilang malisud nga mga kahimtang, ang akong mga mata napunting sa nagsunod-sunod nga kahoy nga mga karatula nga gilansang sa mga haligi sa koral diin gikulit ang mga kinutlo gikan sa mga diary niadtong nag-antus nga mga Santos. Samtang kami nagbasa sa matag kinutlo, sa among kahingangha ang among nakit-an sa ilang mga pulong dili ang pagkawalay paglaum ug pagkawalay kadasig, kondili ang pagsalig ug pasalig ug gani ang hingpit nga kalipay. Sila napuno sa paglaum, ang paglaum nga gipakita pinaagi niining kinutlo gikan sa diary ni Sarah DeArmon Rich, Pebrero 1846: “Ang pagsugod sa ingon nga biyahe panahon sa tingtugnaw … daw sama sa naglakaw paingon sa ba-ba sa kamatayon apan kami may hugot nga pagtuo … [ug] among gibati ang pagmaya nga ang adlaw sa among kaluwasan miabut.”¹

Kining una nga mga Santos sa pagkatinuod walay gayuy mga pinuy-anan, apan sila wala mawad-i sa paglaum. Ang ilang mga kasingkasing masulub-on, apan ang ilang mga espiritu lig-on. Sila nakakat-on og usa ka lawom ug importante nga leksyon. Sila nakakat-on nga ang paglaum nga inubanan sa mga panalangin sa kalinaw ug kalipay, wala mag-agad sa kahimtang. Ilang napalgan nga ang tinuod nga tinubdan sa paglaum mao ang hugot nga pagtuo––ang hugot nga pagtuo kang Ginoong Jesukristo ug sa Iyang walay kinutuban nga Pag-ula, ang usa ka siguro nga pundasyon diin pagatukuron ang atong mga kinabuhi.

Karon laing grupo sa mga pioneer ang naghulagway niining importante nga baruganan. Niadtong Martes, ika-12 sa Enero, usa ka kusog kaayo nga linog miigo sa nasud sa Haiti. Ang linog migun-ob sa ulohang siyudad sa Port-au-Prince. Ang linugdangan niini malaglagon––gibanabana nga 1,000,000 ka mga tawo ang nawad-an og mga pinuy-anan, ug labaw pa sa 200,000 ang gikataho nga nangamatay.

Samtang ang kalibutan nagbantay sa wala pa sukad mahitabo nga internasyonal nga pagtubag, laing talagsaon ug makapadasig nga paningkamot sa pagluwas ang gipahigayon didto sa Port-au-Prince––kini gidumala pinaagi sa usa ka komite nga gilangkuban og lokal nga mga lider sa Simbahan sa Haiti nga gi-organisar sumala sa sumbanan sa priesthood ug naglihok ubos sa inspirasyon. Ang mga miyembro sa komite naglakip sa duha ka mga stake president ug duha ka mga stake Relief Society president sa Port-au-Prince ug mission president, kinsa sa pangidaron nga 30 nagdumala og 74 ka full time nga mga misyonaryo sa Port-au-Prince Mission, sa Haiti.

Ang tanan niyang mga misyonaryo taga-Haiti, ug sa milagroso nga paagi walay usa kanila nga naangol niining malaglagon nga linog. Sa mga kamot niining dinasig nga lokal nga mga lider gitugyan ang mga kapanguhaan sa Simbahan, mga kapanguhaan nga naglakip sa ubay-ubay nga mga amot sa kadaghanan ninyo. Tungod niini nga mga kontribusyon, ang mga tawo sa Haiti mapasalamaton kaayo. Ubos sa pagdumala sa komitiba, ang trak nga puno sa mga sangkap miabut gikan sa Dominican Republic hapit diha-diha dayon. Pagkahuman sa linog, ang mga eroplanong puno sa mga pagkaon, mga sistema sa water purification, mga tolda, mga habol, ug mga sangkap sa medisina miabut uban sa team sa mga doktor.

Ang siyam ka mga simbahan sa sulod ug sa palibut sa Port-au-Prince kadaghanan wala madaut––laing talagsaon nga milagro. Sulod sa mga semana human sa linog, kini nahimong mga kapasilongan alang sa labaw pa sa 5,000 nga mga taga-Haiti ug nahimong mga lugar diin ang pagkaon, tubig, ug medikal nga pagtagad giapud-apud. Ang mahinungdanon nga mga panginahanglan nahatag, ug ang kahusay misugod og balik taliwala sa kaguliyang.

Bisan kon ang matinud-anon nga taga-Haiti nga mga Santos nag-antus sa hilabihan, sila puno og paglaum alang sa umaabot. Sama sa unang mga pioneer niadtong 1846, ang ilang mga kasingkasing masulub-on apan ang ilang mga espiritu lig-on. Sila usab nagtudlo kanato nga ang paglaum ug kalipay ug hingpit nga kalipay dili mga produkto sa kahimtang kondili sa hugot nga pagtuo diha sa Ginoo.

Si propeta Mormon, sa iyang kaugalingon nakasinati sa malisud nga mga kahimtang, nakasabut ug klaro nga nagtudlo niini nga doktrina:

“Ug usab, akong hinigugma nga mga kaigsooan, ako mamulong nganha kaninyo mahitungod sa paglaum.…

“… Tan-awa ako moingon nganha kaninyo nga kamo magbaton og paglaum pinaagi sa pag-ula ni Kristo … ug kini tungod sa inyong hugot nga pagtuo kaniya sumala sa saad.

“Busa, kon ang usa ka tawo adunay hugot nga pagtuo siya kinahanglan nga magbaton og paglaum; kay kon wala ang hugot nga pagtuo wala usab ang paglaum.”²

Ang paglaum moabut tungod sa hugot nga pagtuo kang Jesukristo. Nabuntog na Niya ang kalibutan ug misaad nga Iyang pagapahiran ang atong mga luha kon kita moduol lamang ngadto Kaniya ug motuo ug mosunod.³

Ang pipila kinsa niini mismong higayuna mibati og kalisud o nawad-an sa paglaum tingali naghunahuna kon unsaon nila pag-angkon og balik ang paglaum. Kon kamo usa kanila, hinumdumi nga ang paglaum moabut isip resulta sa hugot nga pagtuo. Kon gikinahanglan nga magtukod kita og paglaum, kinahanglan gayud nga atong tukuron ang atong hugot nga pagtuo.

Ang hugot nga pagtuo diha sa Manluluwas nagkinahanglan og labaw pa kay sa pagtuo lamang. Si Apostol Santiago mitudlo nga gani bisan pa ang mga yawa nagatuo man usab ug nagapangurog.⁴ Apan ang tinuod nga hugot nga pagtuo nagkinahanglan og trabaho. Ang kalainan tali sa mga yawa ug sa matinud-anon nga mga miyembro sa Simbahan dili ang tinuohan kondili ang buhat. Ang hugot nga pagtuo motubo pinaagi sa paghupot sa mga sugo. Kinahanglan gayud nga atong buhaton ang pagsunod sa mga sugo. Gikan sa Ang Giya ngadto sa mga Kasulatan atong mabasa nga: “mga milagro dili mamunga og hugot nga pagtuo, apan ang lig-on nga hugot nga pagtuo motubo pinaagi sa pagkamasulundon sa ebanghelyo ni Jesukristo. Sa lain nga pagkasulti, ang hugot nga pagtuo moabut pinaagi sa pagkamatarung.”⁵

Kon kita maningkamot nga mosunod sa mga sugo sa Dios, maghinulsol sa atong mga sala, ug mosaad sa atong labing maayo nga mga paningkamot nga mosunod sa Manluluwas, kita motubo nga masaligon nga pinaagi sa Pag-ula, ang tanan mamaayo ra. Kadtong mga pagbati pagapamatud-an pinaagi sa Espiritu Santo kinsa miabug gikan kanato sa unsay gitawag sa atong pioneer nga mga inahan ug mga amahan nga “katapulan ta.” Bisan pa man sa atong mga pagsulay, puno kita sa pagsabut sa kaayohan ug bation ang pagkanta uban kanila nga sa pagkatinuod “maayo ra ang tanan.”⁶

Dili ko buot nga mopakunhod sa kamatuoran sa klinikal nga pagkasubo. Alang sa pipila, ang mga sulbad sa pagkasubo ug pagkabalaka makit-an pinaagi sa pagkonsulta sa hanas nga mga propesyonal. Apan sa kadaghanan nato, ang kasubo ug kahadlok mosugod og kahanaw ug pulihan sa kalipay ug kalinaw kon atong ibutang ang atong pagsalig sa Tigpasiugda sa plano sa kalipay ug kon kita mopalambo og hugot nga pagtuo diha sa Prinsipe sa Kalinaw.

Dili pa lang dugay usa ka minahal kong higala namatay tungod sa kanser. Siya ug ang iyang pamilya mga tawo nga adunay hilabihan nga hugot nga pagtuo. Makadasig kining tan-awon kon sa unsang paagi nga ang ilang hugot nga pagtuo miagak kanila nga makasugakod niining hilabihan ka lisud nga panahon. Sila napuno sa kalinaw sa hunahuna nga nakapatunhay ug nakapalig-on kanila. Uban sa ilang pagtugot gusto ko nga mobasa og sulat gikan sa usa ka miyembro sa pamilya nga gisulat pipila lamang ka adlaw sa wala pa ang iyang amahan mamatay:

“Ang katapusang pipila ka adlaw nahimong hilabihan ka lisud.… Kagabii samtang nagpundok kami tapad sa katre ni Papa, ang Espiritu sa Ginoo mabati, ug tinuod nga nahimo gayud nga among maghuhupay. Kami nagmalinawon.… Kini mao ang labing lisud nga butang nga sukad nasinati ni bisan kinsa kanamo, apan among gibati ang kalinaw sa kahibalo nga … ang atong Amahan sa Langit misaad nga manag-uban kami pag-usab og puyo isip usa ka pamilya. Human ang doktor misulti ni Papa didto sa ospital nga wala nay lain pa nga mahimo, ang among amahan mitan-aw kanamong tanan uban sa hingpit nga hugot nga pagtuo ug maisugon nga nangutana, ‘Aduna bay bisan kinsa niining lawak nga may problema sa plano sa kaluwasan?’ Kami walay problema sa plano sa kaluwasan, ug mapasalamaton alang sa amahan ug inahan kinsa mitudlo kanamo sa pagbaton og hingpit nga pagsalig sa plano.”

Ako mamulong ngadto sa tanan kinsa nag-antus, ngadto sa tanan kinsa nagbangutan, ngadto sa tanan kinsa nag-atubang karon o kinsa moatubang pa sa mga pagsulay ug mga hagit niining kinabuhia. Ang akong mensahe alang niadtong kinsa nabalaka o nahadlok o nawad-an og paglaum. Ang akong mensahe maoy usa ka pagpalanog, usa ka pagpahinumdom sa makanunayon nga makapahupay nga tambag gikan sa usa ka mahigugmaong Amahan ngadto sa Iyang mga anak sukad pa sa sinugdanan sa kalibutan.

“Hinumdumi, hinumdumi nga kini diha sa lig-on nga sukaranan sa atong Manunubos kinsa mao si Kristo, ang anak sa Dios, nga kamo kinahanglan gayud nga motukod sa inyong tukuranan; nga sa panahon nga ang yawa mopadala sa iyang mapintas nga mga hangin, oo, ang iyang mga pana diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha kaninyo, kini walay gahum ibabaw kaninyo sa pagbitad kaninyo ngadto sa bung-aw sa pagkauyamot ug walay katapusan nga pagkaalaot, tungod sa lig-on nga sukaranan diin kamo natukod nga mao ang tinuod nga tukuranan, usa ka tukuranan diin kon ang mga tawo magtukod dili sila mapukan.”⁷

Ako mopamatuod kabahin Kaniya, nga Iyang nabuntog ang kalibutan, nga Siya dili gayud malimot o mobiya kanato kay Siya mikulit kanato diha sa mga palad sa Iyang mga kamot.⁸ Ako mopamatuod nga kadtong kinsa maghupot sa Iyang mga sugo motubo diha sa hugot nga pagtuo ug paglaum. Sila pagahatagan og kusog aron sa pagbuntog sa tanang mga pagsulay sa kinabuhi. Sila makasinati og kalinaw nga molabaw sa tanang pagsabut. ⁹ Sa pangalan ni Jesukristo, amen.