Report sa Departamento sa Pag-awdit sa Simbahan, 2009

Minahal nga mga Kaigsoonan: Sigun sa gilatid sa pinadayag diha sa seksyon 120 sa Doktrina ug mga Pakigsaad, ang Konseho sa Paggasto sa mga Ikapulo mao ang magtugot sa paggasto sa mga pundo sa Simbahan. Kini nga konseho gilangkoban sa Unang Kapangulohan, sa Korum sa Napulog Duha ka mga Apostoles, ug sa Presiding Bishopric. Kini nga konseho maoy moaprubar sa mga badyet alang sa mga departamento ug operasyon sa Simbahan. Ang mga departamento sa Simbahan mogasto sa mga pundo nga pinasubay sa giaprubahan nga badyet ug sumala sa mga lagda ug mga patakaran sa Simbahan.

Ang Departamento sa Pag-awdit sa Simbahan gihatagan og katungod sa pag-abli sa tanang rekord ug sistema nga gikinahanglan aron sa pagtimbang-timbang sa kahusto sa pagkontrol kalabut sa mga resibo ug paggasto sa mga pundo, ug pagbantay sa mga kabtangan sa Simbahan. Ang Departamento sa Pag-awdit sa Simbahan gawasnon sa tanang ubang mga departamento ug mga kalihokan sa Simbahan, ug ang mga kawani naglangkob sa mga certified public accountant, certified internal auditors, certified information systems auditors, ug uban pang kwalipikadong mga propesyonal.

Basi sa mga pag-awdit nga gihimo, ang Departamento sa Pag-awdit sa Simbahan nagtuo nga, sa tanang mga materyal nga butang, mga amot nga nadawat, mga paggasto nga nahimo, ug mga kapanguhaan sa Simbahan alang sa tuig 2009 nadumala ug narekord sumala sa tukmang mga pamaagi sa pagsubay, gitugotan nga mga badyet, ug mga lagda ug mga patakaran sa Simbahan.

Matinahurong gisumiter,

Departamento sa Pag-awdit sa Simbahan

Robert W. Cantwell

Tigdumalang Direktor