Tabangi Sila sa Ilang Pagbalik

Mga kaigsoonan, ang atong Langitnong Amahan gusto ug nanginahanglan sa atong tabang sa pagdala sa Iyang espiritu nga mga anak balik ngadto Kaniya. Namulong ako mahitungod sa mga batan-on nga anaa na sa Iyang tinuod nga Simbahan ug mao nga nagsugod na diha sa higpit ug pig-ot nga dalan aron sa pagbalik ngadto sa ilang langitnong panimalay. Gusto Niya nga sila sayo nga makabaton og espirituhanon nga kalig-on aron magpabilin diha sa dalan. Ug Siya nanginahanglan sa atong tabang sa pagpabalik nila ngadto sa dalan diha-diha dayon kon magsugod na sila og kahisalaag.

Usa ako ka batan-ong bishop sa dihang nagsugod ko sa pagkasabut kon ngano nga ang Ginoo gusto nga atong palig-unon ang kabataan samtang batan-on pa sila ug luwason sila dayon. Sultihan ko kamo og usa ka istorya mahitungod sa usa ka batan-on nga nagrepresentar sa daghan kinsa akong gipaningkamutan nga tabangan sulod sa daghang katuigan.

Ang usa ka babaye milingkod sa akong atbang sulod sa akong opisina sa bishop pa ko. Gisultihan ko niya mahitungod sa iyang kinabuhi. Siya nabunyagan ug nakumpirmahan isip usa ka miyembro sa Simbahan sa dihang otso anyos pa siya. Walay luha sa iyang mga mata samtang iyang gisaysay ang sobra sa 20 ka tuig nga misunod, apan adunay kasubo sa iyang tingog. Miingon siya nga ang dalan sa pagpakasala nagsugod sa mga pagpili nga makig-uban sa mga tawo kinsa iyang gituohan nga makalingaw nga mga tawo. Nagsugod siya sa paglapas sa maingon og dili kaayo importante nga mga sugo.

Sa sinugdan mibati siya og gamay nga kaguol ug usa ka tipik sa kahasol. Apan ang pagpakig-uban sa iyang mga higala mihatag og usa ka bag-o nga pagbati nga magustuhan ug busa ang iyang panagsa nga saad sa paghinulsol nahimong daw dili na kaayo importante. Samtang nag-anam og kadaghan ang mga sugo nga iyang gisupak, ang pangandoy mahitungod sa usa ka malipayon nga mahangturong panimalay nag-anam og kahanaw.

Milingkod siya sa akong atbang diha sa unsay iyang gitawag nga kaalautan. Gusto niya nga luwason ko siya gikan sa lit-ag sa pagpakasala nga iyang nakaplagan nga ang iyang kaugalingon nagapos. Apan ang bugtong nga paagi aron siya makagawas mao ang iyang pagpalambo og pagtuo diha ni Jesukristo, ang pagbaton og usa ka masulub-on nga kasingkasing, paghinulsol, ug sa ingon malimpyohan, mausab, ug malig-on pinaagi sa Pag-ula sa Ginoo. Mihatag ako sa akong pagpamatuod ngadto kaniya nga sa gihapon posible kini. Ug posible gayud kini, apan mas lisud gayud kini kay sa pagpalambo unta og pagtuo kaniadto sa sayo sa iyang kinabuhi diha sa iyang panaw balik ngadto sa Dios ug sa panahon nga siya nagsugod og kahisalaag.

Busa kita labing makatabang sa mga anak sa Dios pinaagi sa paghatag og mga paagi sa pagpalambo og hugot nga pagtuo diha kang Jesukristo ug sa Iyang gipahiuli nga ebanghelyo samtang batan-on pa sila. Ug dayon kita kinahanglan gayud nga motabang sa pagbag-o niana nga pagtuo diha-diha dayon sa dili pa kini moawup samtang sila nahisalaag sa dalan.

Busa kamo ug ako makapaabut og hapit sunod-sunod nga oportunidad sa pagtabang sa mga magbibiyahe taliwala sa mga anak sa Dios. Ang Manluluwas misulti kanato kon ngano nga ingon man kana niana sa dihang Iyang gihulagway ang makuyaw nga panaw sa pagpauli alang sa tanan nga espiritu nga mga anak sa Dios lahus sa mga gabon nga mugna sa sala ug ni Satanas:

“Sulod kamo sa higpit nga ganghaan; kay lapad ang ganghaan, ug dako ang agianan, diin nagpaingon ngadto sa kalaglagan, ug dihay daghan kinsa mosulod niini;

“Tungod kay higpit ang ganghaan, ug pig-ot ang agianan, nga paingon sa kinabuhi, ug diyutay lamang ang makakaplag niini.”¹

Nakakita nang daan sa mga panginahanglan sa Iyang mga anak, ang usa ka mahigugmaon nga Langitnong Amahan mibutang og mga giya ug mga tigluwas diha sa ilang dalan. Gipadala Niya ang Iyang Anak, si Jesukristo, aron sa paghimo og luwas nga agianan nga posible ug makita. Gitawag Niya isip Iyang propeta niining panahona, si Presidente Thomas S. Monson. Sukad sa iyang kabatan-on, si Presidente Monson mitudlo dili lamang kon unsaon sa pagpabilin diha sa dalan apan kon unsaon usab sa pagluwas niadtong gidala ngadto sa kagul-anan.

Ang Langitnong Amahan mibutang kanato diha sa daghang nagkalainlaing mga katungdanan aron sa paglig-on ug, kon gikinahanglan, aron sa paggiya sa mga magbibiyahe ngadto sa luwas nga dalan. Ang atong labing importante ug gamhanan nga mga katungdanan mao ang diha sa pamilya. Kini importante tungod kay ang pamilya adunay oportunidad sa pagbutang sa mga tiil niini sa lig-on nga paagi diha sa dalan padulong sa langitnong panimalay niini aron sa pagsugod sa kinabuhi sa usa ka bata. Ang mga ginikanan, mga igsoon nga lalaki ug babaye, mga apohan, mga iyaan ug mga uyoan, gihimo nga mas gamhanan nga mga tiggiya ug tigluwas pinaagi sa higut sa gugma nga mao gayud ang kinaiya sa usa ka pamilya.

Ang pamilya adunay bintaha diha sa unang walo ka tuig sa kinabuhi sa usa ka bata. Nianang protektado nga katuigan, tungod sa Pag-ula ni Jesukristo, ang paggamit ni Satanas sa mga gabon sa kangitngit aron matago ang dalan sa pagbalik sa panimalay gialihan. Nianang bililhong katuigan ang Ginoo nagtabang sa mga pamilya pinaagi sa pagtawag sa mga Primary worker aron sa pagtabang sa pagpalig-on sa mga bata sa espirituhanong paagi. Naghatag usab Siya og mga naghupot sa Aaronic Priesthood aron motanyag og sakrament. Nianang mga pag-ampo sa sakrament, madungog sa mga bata ang saad nga mahimo unta sila sa umaabut makadawat sa Espiritu Santo isip giya kon sila magmasulundon sa mga sugo sa Dios. Isip resulta, sila mapalig-on sa pagbuntog sa tintasyon kon kini moabut ug dayon, dili madugay sa umaabut, moadto aron sa pagluwas sa uban.

Daghang mga bishop sa Simbahan gidasig sa pagtawag sa kinalig-unan nga mga tawo sa ward aron sa pagserbisyo sa matag usa sa mga bata diha sa Primary. Sila nakamatikud nga kon ang mga bata napalig-on, uban sa hugot nga pagtuo ug pagpamatuod, dili kaayo nila kinahanglanon nga luwason inig matin-edyer na. Namatikdan nila nga ang usa ka lig-on nga espirituhanong pundasyon makahimo og kalainan sa tibuok kinabuhi.

Makatabang kitang tanan. Ang mga apohang babaye, mga apohang lalaki, ug matag miyembro nga nakaila sa bata makatabang. Wala kini magkinahanglan og pormal nga calling diha sa Primary. Wala kini limit sa edad. Usa sa ingon nga babaye, isip batan-on, diha sa Primary general board nga mitabang sa pagmugna sa CTR motto.

Wala siya kapuya sa pagserbisyo sa mga bata. Mitudlo siya sa Primary sa iyang ward, sa iyang kaugalingon nga paghangyo, hangtud nga hapit na siya mag-edad og 90 anyos. Ang gagmayng mga bata makabati sa iyang gugma alang kanila. Nakita nila ang iyang ehemplo. Nakat-unan nila gikan kaniya ang simple nga mga baruganan sa ebanghelyo ni Jesukristo. Ug labaw sa tanan, tungod sa iyang ehemplo nakakat-on sila nga mabati ug makaila sa Espiritu Santo. Ug sa dihang nahimo nila kini, nagsugod na sila sa pagbaton sa hugot nga pagtuo nga ilang gikinahanglan sa pagbuntog sa tintasyon. Dili kaayo sila magkinahanglan nga luwason ug maandam sa pag-adto aron sa pagluwas sa uban.

Akong nakat-unan ang gahum sa simple nga pagtuo diha sa pag-ampo ug sa Espiritu Santo sa dihang ang among mga anak gagmay pa. Ang among kinamagulangan nga anak wala pa mabunyagi. Ang iyang mga ginikanan, mga magtutudlo sa Primary, ug ang mga lider sa priesthood naningkamot sa pagtabang kaniya nga mabati ug makaila sa Espiritu ug masayud kon unsaon sa pagdawat sa Iyang tabang.

Usa ka hapon niana ang akong asawa midala kaniya ngadto sa panimalay sa usa ka babaye nga mitudlo kaniya sa pagbasa. Ang among plano mao nga ako ang mokuha niya inig pauli nako gikan sa trabaho.

Ang iyang leksyon nahuman og sayo-sayo kay sa gituohan. Gibati niya ang pagsalig nga nakahibalo siya sa dalan paingon sa balay. Busa, misugod siya sa paglakaw. Miingon siya human niana nga siya adunay hingpit nga pagsalig ug ganahan sa ideya nga mag-inusara sa pagbiyahe. Human nga naabut na siya og mga katunga sa usa ka milya, (0.8 km), misugod na og ngitngit. Namatikdan na niya og sugod nga layo pa kaayo siya sa balay.

Makahinumdom pa gihapon siya nga ang mga suga sa mga sakyanan nga moagi kaniya nahanap tungod sa iyang mga luha. Gibati niya nga sama sa usa ka gamay nga bata, dili ang masaligon nga batang lalaki nga misugod sa paglakaw nga nag-inusara. Iyang naamgohan nga nagkinahanglan siya og tabang. Dayon adunay usa ka butang nga misantup sa iyang hunahuna. Nasayran niya nga kinahanglan niya nga mag-ampo. Ug mao nga mibiya siya sa dalan ug mipaingon ngadto sa pipila ka kakahoyan nga dili kaayo niya maklaro tungod sa kangitngit. Nakakita siya og dapit nga kaludhan.

Diha sa balilihan iyang nadungog ang mga tingog nga nagpaingon kaniya. Duha ka mga batan-on ang nakadungog kaniya nga naghilak. Sa ilang pagduol, miingon sila, “Makatabang ba kami kanimo?” Samtang naghilak misulti siya kanila nga siya nasaag ug gusto niya nga mopauli sa balay. Nangutana sila kon kahibalo ba siya sa numero sa telepono sa balay o address. Wala siya kahibalo. Nangutana sila kon kahibalo ba siya sa iyang pangalan. Wala siya kahibalo niana. Gidala nila siya didto duol sa dapit nga ilang gipuy-an. Ilang nakit-an ang among apelyido sa usa ka phone book.

Sa pagkadawat nako sa tawag, nagdali-dali ko aron sa pagluwas, mapasalamaton nga ang buotan nga mga tawo gibutang diha sa iyang dalan pauli sa balay. Ug mapasalamaton gayud ako nga siya gitudloan sa pag-ampo inubanan sa hugot nga pagtuo nga ang tabang moabut sa dihang siya nahisalaag. Kanang hugot nga pagtuo ang miagak kaniya ngadto sa kaluwasan ug midala kaniya og dugang pa nga mga tigluwas sa mas daghang higayon kay sa iyang maihap.

Ang Ginoo nagbutang og sundanan sa pagluwas ug mga tigluwas diha sa Iyang gingharian. Diha sa Iyang kaalam ang Ginoo midasig sa Iyang mga sulugoon sa pagbutang sa pipila sa labing gamhanan nga mga pamaagi aron sa paglig-on kanato ug sa pagsangun og labing maayo nga mga tigluwas samtang kita moagi sa mga katuigan sa pagkatin-edyer.

Nahibalo kamo mahitungod sa duha ka gamhanan nga mga programa nga gihatag sa Ginoo. Ang usa, alang sa young women, nga gitawag og “Personal nga Kauswagan”. Ang lain, alang sa mga naghupot sa Aaronic Priesthood, gitawag og “Katungdanan ngadto sa Dios”. Among giawhag ang mga batan-on sa bag-o nga henerasyon sa pagtan-aw sa ilang kaugalingong potensyal sa pagtukod og talagsaon nga espirituhanong kalig-on. Ug kami nangamuyo niadtong kinsa nagpakabana niadto nga mga batan-on sa pagbuhat sa mga butang nga ang Ginoo nagkinahanglan nga atong buhaton sa pagtabang kanila. Ug tungod kay ang kaugmaon sa Simbahan nagdepende kanila, kitang tanan nagpakabana.

Ang duha ka mga programa gipalambo apan ang katuyoan niini nagpabiling wala mausab. Si Presidente Monson mibutang niini nga paagi: kita kinahanglan gayud nga “magkat-on sa unsay angay natong makat-unan, magbuhat sa unsay angay natong buhaton, ug mahimo kon unsay angay nga kita mahimo.”²

Ang gamayng basahon nga Personal nga Kauswagan alang sa batan-on nga mga babaye mipaklaro sa katuyoan alang kanila: “Ang programa sa Personal nga Kauswagan migamit sa walo ka mga mithi sa Young Women aron sa pagtabang kanimo nga mas makasabut sa hingpit kon si kinsa ka, nganong ania ka dinhi sa yuta, ug unsa ang angay nimong buhaton isip usa ka anak nga babaye sa Dios aron sa pag-andam alang sa adlaw nga ikaw moadto sa templo sa paghimo og sagradong mga pakigsaad.”

Nagpadayon kini nga nag-ingon nga ang batan-on nga mga babaye “maghimo og mga pasalig, sa pagbuhat niini, ug pagreport sa imong kauswagan ngadto sa usa ka ginikanan o lider.” Nagsaad usab kini nga “ang mga sundanan nga imong naestablisar samtang nagtrabaho ka sa Personal nga Kauswagan—sama sa pag-ampo, pagtuon sa kasulatan, pagserbisyo, ug paghimo og journal—mamahimo nimong inadlaw nga mga kinaiya. Kini nga mga kinaiya makalig-on sa imong pagpamatuod ug makatabang kanimo nga makakat-on ug molambo sa tibuok nimong kinabuhi.”³

Ang programa sa Katungdanan ngadto sa Dios alang sa batan-ong mga lalaki sa Aaronic Priesthood gipalig-on ug gipokusan. Nalangkob kini diha sa usa ka simple nga basahon alang sa tanang tulo ka mga katungdanan sa Aaronic Priesthood. Ang young men ug ang ilang mga lider makadawat og usa ka kopya niining bag-o nga basahon. Kini usa ka gamhanan nga himan. Molig-on kini sa mga pagpamatuod sa batan-on nga mga lalaki ug sa ilang relasyon sa Dios. Motabang kini kanila nga makat-on ug ganahan nga motuman sa ilang mga katungdanan sa priesthood. Molig-on kini sa ilang mga relasyon uban sa ilang mga ginikanan, diha sa mga sakop sa korum, ug uban sa ilang mga lider.

Kining duha ka mga programa nagbutang og dakong responsibilidad diha sa mga paningkamot sa mga batan-on mismo. Gidapit sila sa pagkat-on ug sa pagbuhat sa mga butang nga mahagiton alang ni bisan kinsa. Samtang naghunahuna ko sa akong kaugalingong kabatan-on, wala ko kahinumdom nga adunay lisud kaayo nga mga hagit. Aw, sa pipila ka mga higayon gidapit ko sa pagkab-ot sa ingon ka lisud nga mga butang, apan panagsa ra. Kini nga mga programa nagkinahanglan og kamakanunayon, dakong paningkamot, ug pagtigum sa nakat-unan ug espirituhanon nga mga kasinatian sulod sa daghang katuigan.

Sa dihang naghunahuna ako mahitungod niini akong naamgohan nga ang sulod niini nga gagmayng mga basahon mao ang pisikal nga pagpakita sa pagsalig sa Ginoo diha sa bag-o nga henerasyon ug kanatong tanan nga nahigugma kanila. Ug akong nakita ang ebidensya nga ang pagsalig maayo kaayo nga pagkabutang.

Sa mga pagbisita nagtan-aw ako sa mga korum sa Aaronic Priesthood nga naglihok. Nakakita ako og batan-on nga mga lalaki nga nagsunod sa mga sundanan sa pagkat-on, paghimo og mga plano sa pagbuhat sa unsay gusto sa Dios nga ilang buhaton, dayon sa pagbuhat sa unsay ilang gipasalig nga ilang buhaton ug sa pagpakigbahin sa uban kon sa unsang paagi nga sila nausab sa espirituhanon nga paagi. Ug samtang ako nagtan-aw ug naminaw, nahimo kining klaro nga ang mga amahan, mga inahan, mga lider, mga higala, ug bisan ang mga silingan diha sa kongregasyon natandog sa Espiritu samtang ilang nadungog ang mga kabatan-onan nga nagpamatuod kon sa unsang paagiha sila nalig-on. Ang mga kabatan-onan nadasig samtang mipaambit sila og pagpamatuod, ug maingon man kadtong naningkamot sa pagtabang kanila nga molambo.

Ang programa sa Young Women aduna nianang sama nga gamhanang sundanan sa pagpalambo og espirituhanong kalig-on sa batan-ong mga babaye ug sa paghatag og oportunidad kanato aron motabang. Ang Personal nga Kauswagan nagtabang sa young women sa pagpangandam sa pagdawat sa mga ordinansa sa templo. Gitabangan sila pinaagi sa mga ehemplo sa mga inahan, mga apohang babaye, ug sa matag matarung nga babaye nga naglibut kanila diha sa Simbahan. Akong nakita kon giunsa sa mga ginikanan sa pagtabang ang usa ka anak nga babaye nga makab-ot ang iyang mga tumong ug mga pangandoy pinaagi sa pagtagad ug pagdayeg sa tanan nga maayong mga butang nga iyang gihimo.

Mga pipila lamang ka adlaw ang milabay nagtan-aw ko sa usa ka inahan nga nagbarug uban sa iyang batan-on nga anak nga babaye samtang manag-uban nga midawat sa ilang ganti sa Pahalipay sa Batan-ong Pagkababaye [Young Womanhood Recognition award]. Ug samtang mipakigbahin sila kanako kon unsay kahulugan niini ngadto kanila, gibati nako ang pagtugot sa Ginoo ug pagdasig alang kanatong tanan.

Sa tanan nga tabang nga atong mahatag niini nga mga batan-on, ang labing mahinungdanon mao ang pagpabati nila sa atong pagsalig nga sila anaa sa dalan pabalik ngadto sa Dios ug nga sila makahimo niini. Ug kita labing makahimo niana pinaagi sa pagkuyog kanila. Tungod kay ang dalan tungason ug usahay batoon, sila mobati usahay og kasagmuyo ug gani mapandol. Usahay mahimong bation nila ang kalibug mahitungod sa ilang kapalaran ug mahisalaag sa pagtinguha og mga tumong nga adunay gamay nga mahangturong bili. Kining dinasig nga mga programa makapaminus sa pagkahitabo niana tungod kay modala kini sa mga batan-on sa pagdapit ug sa pagdawat sa pakig-uban sa Espiritu Santo.

Ang pinakamaayong tambag nga atong mahatag sa mga batan-on mao nga makabalik sila sa Langitnong Amahan kon sila giniyahan ug korihian pinaagi sa Espiritu sa Dios. Busa kon maalamon kita, atong awhagon, dayegon, ug ipakita ang tanan nga nagdapit sa pakig-uban sa Espiritu Santo. Kon mopakigbahin sila kanato sa unsay ilang gibuhat ug gibati, kita kinahanglan gayud usab nga mopahimong sarang sa atong kaugalingon alang sa Espiritu. Dayon mobati sila diha sa atong pagdayeg ug sa atong mga pahiyum sa pagtugot sa Dios. Ug kon mobati kita nga kinahanglang mohatag og pangkorihir nga tambag, mobati sila sa atong gugma ug sa gugma sa Dios diha niini, dili pagpangasaba ug pagsalikway, nga makatugot kang Satanas nga modala kanila nga mas mopalayo.

Ang ehemplo nga labi nilang gikinahanglan gikan kanato mao ang pagbuhat sa unsay angay nila nga buhaton. Kinahanglan kita nga mag-ampo alang sa mga gasa sa Espiritu. Kinahanglan kita nga mamalandong sa mga kasulatan ug sa mga pulong sa buhi nga mga propeta. Kinahanglan kita nga maghimo og mga plano nga dili lamang mga pangandoy apan mga pakigsaad. Ug dayon kita kinahanglan nga motuman sa atong mga saad sa Ginoo. Ug kita kinahanglan nga modasig sa uban pinaagi sa pagpakigbahin nila sa mga panalangin sa Pag-ula nga miabut sa atong kinabuhi.

Ug kinahanglan nga atong ipakita diha sa atong kaugalingong kinabuhi ang makakunayon ug padayon nga pagkamatinud-anon nga gilauman sa Ginoo kanila. Kon kita mobuhat niini, kita makatabang kanila nga mabati gikan sa Espiritu ang kasiguroan nga kon sila mopadayon, madungog nila ang mga pulong gikan sa usa ka mahigugmaon nga Manluluwas ug sa Langitnong Amahan: “ … Maayong pagkabuhat, maayo ug kasaligan nga ulipon: sa diyutay kasaligan ka diay, sa daghan pagapiyalan ko ikaw: dumuyog ka sa kalipay sa imong agalon.”⁴ Ug kita kinsa nagtabang kanila nga makat-on makadungog niadto nga mga pulong uban sa hingpit nga kalipay.

Ako mopamatuod kaninyo nga ang Ginoo nahigugma kaninyo ug sa matag anak sa Dios. Mao kini ang Iyang gingharian, nga gipahiuli uban sa mga yawe sa priesthood pinaagi ni Propeta Joseph Smith. Si Thomas S. Monson mao ang propeta sa Ginoo karon. Ako mosaad sa matag usa kaninyo, nga samtang kamo mosunod sa dinasig nga paggiya dinhi, niining tinuod nga Simbahan ni Jesukristo, nga ang atong mga kabatan-onan ug kita kinsa nagtabang ug nahigugma kanila luwas nga makabalik ngadto sa atong panimalay uban sa Langitnong Amahan ug sa Manluluwas sa pagpuyo diha sa mga pamilya ug diha sa hingpit nga kalipay sa kahangturan. Sa pangalan ni Jesukristo, amen.