Ang Gahum sa Priesthood

Ako mamulong ngadto sa mga amahan sa mga pamilya ug sa mga pamilya sa bisag asa sa Simbahan.

Pipila ka tuig nga milabay among gisugdan ang correlation ubos sa pagdumala ni Presidente Harold B. Lee. Nianang higayuna, si Presidente Thomas S. Monson miingon: “Karon, kita nagtigum batok sa dakong nagkalainlaing matang sa sala, bisyo, ug kadautan nga nagkapundok sa atong atubangan…. Ang plano sa gubat diin kita nakig-away aron sa pagluwas sa mga kalag sa mga tawo dili atong kaugalingon. Kini [midangat pinaagi] sa pagdasig ug pagpadayag sa Ginoo.”¹

Atol niadtong mga tuiga, sa correlation ang tanang pamaagi sa pagpalakaw sa Simbahan nausab. Ang tibuok kurikulom gitukod pag-usab. Ang mga katuyoan ug mga kalabutan sa mga organisayon ngadto sa usag usa gipiho pag-usab. Ang mahinungdanong pulong atol niadtong mga tuiga sa correlation ug sa pagtukod pag-usab mao ang priesthood.

Si Presidente Monson misulti usab kabahin ni Gideon, usa ka bayani sa Daang Tugon. Si Gideon napili nga mangulo sa kasundalohan sa Israel, mga liboan ang gidaghanon. Apan kanilang tanan, siya mipili lamang og 300 ka mga tawo.

Si Gideon adunay makapaikag nga paagi sa pagpili sa iyang mga tawo. Sa diha nga ang mga tawo miinum og tubig sa sapa-sapa, ang kadaghanan moduko … aron makainum.” Kadto iyang lang gilabyan. Pipila ang mikabo og tubig sa ilang mga kamot ug miinum, nagpabiling hingpit nga mabinantayon. Sila ang gipangpili.²

Kita nagpuyo sa panahon sa “mga gubat [ug] hungihong sa mga gubat, ug mga linog sa nagkalainlain nga mga dapit.”³ Ingon sa gipanagna, “ug ang tibuok yuta [magka-] guliyang”⁴ ug si “Satanas anaa sa tanan nga bahin niini nga yuta.”⁵ Siya nagtinguha sa paglaglag sa tanan nga maayo ug matarung.⁶ Siya si Lucifer kinsa gipapahawa sa presensya sa Dios.⁷ Batok nianang tanan, kita adunay positibo nga mga pagbati kabahin sa umaabot.

Ang gamay nga pundok ni Gideon milampos tungod kay, sama sa gipahayag sa rekord, “sila nanindog ang tagsatagsa ka tawo sa ilang dapit.”⁸

Kining “kapaigoan sa kahingpitan sa mga panahon”⁹ mibukas uban sa pagpakita sa Amahan ug sa Anak ngadto sa batang lalaki nga si Joseph Smith.¹⁰ Sunod si anghel Moroni mipakita kang Joseph diin gilubong ang mga palid nga naglangkob sa Basahon ni Mormon.¹¹ Si Joseph gihatagan og gahum sa paghubad niini.¹²

Atol sa paghubad si Joseph ug Oliver Cowdery nakabasa kabahin sa bunyag. Sila nag-ampo aron masayud kon unsay buhaton.¹³ Didto mipakita kanila ang usa ka langitnon nga mensahero, si Juan Bautista. Iyang gitugyan ngadto kanila ang Aaronic Priesthood, “nga naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala.”¹⁴

Ang mga Apostoles nga si Pedro, Santiago, ug Juan, kinsa suod kaayo sa Ginoo sa Iyang pagpangalagad, sunod nga mipakita ug mitugyan ngadto ni Joseph ug Oliver sa mas taas nga priesthood,¹⁵ o “ang Balaan nga Priesthood, sunod sa Kapunongan sa Anak sa Dios.”¹⁶ Ang priesthood, nga gipasabut sa mga kasulatan, maoy ipangalan sunod kang Melchizedek, ang halangdon nga high priest kang kinsa si Abraham mibayad sa iyang mga ikapulo.¹⁷

Kini dayon ang nahimo nila nga pagtugot. Pinaagi sa mga yawe sa priesthood, ilang magamit ang tanang mga gahum sa langit. Gisugo sila sa pagsangyaw sa ebanghelyo ngadto sa tanang kanasuran.¹⁸

Dili gayud sayon niini ang pagsunod sa ebanghelyo ni Jesukristo. Dili kadto sayon sa dihang buhi pa Siya, ug dili kadto sayon sa unang mga adlaw sa Simbahan. Ang unang mga Santos napaubos sa dili ikahulagway nga pag-antus ug pagbatok.

Lapas na sa 180 ka tuig sukad ang priesthood napahiuli. Kita karon hapit na moabut og 14 ka milyon nga mga miyembro. Bisan pa niana, gamay ra kita nga bahin kon itandi ngadto sa binilyon nga katawhan dinhi sa yuta. Apan kita nagpabilin sa gihapon, ug kita nahibalo kaayo sa atong nahibaloan, ug kita magpadayon ug magsangyaw sa ebanghelyo.

Ang Basahon ni Mormon miklaro niini nga kita dili moduminar pinaagi sa gidaghanon. Kondili kita adunay gahum sa priesthood.¹⁹

Si propeta Nephi misulat, “Ug nahinabo nga ako nakakita sa simbahan sa Kordero sa Dios, ug ang iyang gidaghanon diyutay ra …; bisan pa niana ako nakakita nga ang simbahan sa Kordero, kinsa mao ang mga santos sa Dios, diha usab sa ibabaw sa tibuok yuta; ug ang ilang mga kamandoan diha sa ibabaw sa yuta gamay ra.”²⁰

Si Presidente Joseph Fielding Smith miingon, “Samtang ikasulti kini … nga kita pipila ra kon itandi sa … kalibutan, gani, kita matandi uban sa igpatubo nga gisulti sa Manluluwas, diin sa katapusan mopatubo [o mobayaw] sa tibuok kalibutan.”²¹

Kita makahimo ug sa tukma nga panahon piho nga makahimo sa pag-impluwensya sa tanang katawhan. Mahibaloan kini kon kinsa kita ug ngano nga kita mao. Ingon og kini walay paglaum, hilabihan kini ka lisud; apan dili lamang kini posible kondili sigurado nga kita makadaug sa gubat batok ni Satanas.

Pipila ka tuig na ang milabay ako mihatag og pakigpulong nga giulohan og “Unsay Kinahanglan nga Masayran sa Matag Elder: Usa ka Primer kabahin sa Mga Baruganan sa Panggobyerno sa Priesthood.” Sa kaulahian, sa dihang hapit na i-imprinta, akong giilisan ang ulohan nga mabasa: “Unsay Kinahanglan nga Masayran sa Matag Elder––ug sa Matag Sister Usab.”²²

Akong gilakip ang mga sister tungod kay mahinungdanon kini alang sa matag usa nga makasabut kon unsay gipaabut sa mga kaigsoonan. Gawas kon maangkon nato ang pagtagad sa mga inahan ug anak nga mga babaye ug igsoong mga babaye––kinsa adunay impluwensya sa ilang mga bana, mga amahan, anak nga mga lalaki, ug mga igsoon nga lalaki–– dili kita mouswag. Ang priesthood mawad-an og mahinungdanong gahum kon ang mga sister gipasagdan.

Ang Priesthood mao ang awtoridad ug gahum nga gihatag sa Dios ngadto sa mga tawo dinhi sa yuta aron sa pagbuhat alang Kaniya.²³ Kon ang awtoridad sa priesthood gigamit sa tukma nga paagi, ang mga naghupot sa priesthood mobuhat sa Iyang pagabuhaton kon ania pa Siya.

Nakahimo kita og maayo kaayo sa pagpang-apud-apod sa awtoridad sa Priesthood. Kita adunay awtoridad sa priesthood nga naestablisar sa hapit bisan asa. Kita adunay mga korum sa mga elder ug mga high priest sa tibuok kalibutan. Apan ang pagpang-apud-apod sa awtoridad sa priesthood miuswag, nga sa akong hunahuna, nag-una pa sa pagpang-apud-apod sa gahum sa priesthood. Ang priesthood walay kalig-on nga maanaa unta niini ug dili mabatunan ang kalig-on hangtud nga ang gahum sa priesthood ligdong nga natisok diha sa mga pamilya nga mao gayud unta ang angay.

Si Presidente Harold B. Lee mipahayag: “Ingon og klaro nako kini nga ang Simbahan walay laing mahimo––ug wala gayud––kondili sa paghimo og labaw sa pagtabang sa pamilya sa pagpadayon sa balaang misyon niini, dili lamang tungod kay mao kana ang organisayon sa langit, kondili usab tungod kay mao kana ang pinaka-praktikal nga tampo nga atong mahimo sa atong mga batan-on––aron sa pagtabang nga mulambo ang kalidad sa kinabuhi sa mga panimalay sa mga Santos sa Ulahing mga Adlaw. Sama ka importante sa atong daghang mga programa ug organisisyonal nga mga paningkamot, kini dili gayud mopuli sa panimalay; kini mosuporta gayud sa panimalay.”²⁴

Si Presidente Joseph F. Smith mihimo niini nga pamahayag kabahin sa priesthood diha sa panimalay: “Sa panimalay ang nagdumala nga awtoridad kanunay nga gitugyan diha sa amahan, ug sa tanang mga kalihokan sa panimalay ug mga hilisgutan sa pamilya walay laing labaw pa nga awtoridad. Aron sa paghatag og ehemplo niini nga baruganan, usa ka panghitabo tingali paigo na. Usahay mahitabo kini nga ang mga elder tawgon aron sa pagpangalagad sa mga miyembro sa pamilya. Diha niining mga elder mahimong anaay mga presidente sa stake, mga apostoles, o gani mga miyembro sa unang kapangulohan sa Simbahan. Dili angayan ubos niini nga mga kahimtang alang sa amahan nga maghinan-aw lang ug magpaabut sa mga elder nga maoy modumala sa pagpangalagad sa importante nga ordinansa. Ang amahan anaa. Kini iyang katungod ug iya kining katungdanan sa pagdumala. Siya gayud ang mopili og usa ka tawo kinsa mupahigayon sa lana, ug sa usa nga mosulti sa pag-ampo, ug dili gayud mobati nga tungod kay adunay mga presiding authority diha sa Simbahan nga siya pagakuhaan sa iyang katungod sa pagdumala sa pagpahigayon niana nga panalangin sa ebanghelyo diha sa iyang panimalay . (Kon wala diha ang amahan, ang inahan kinahanglan nga mohangyo gayud sa anaa nga tigdumala nga awtoridad nga maoy mopahigayon.) Ang amahan modumala diha sa lamesa, sa pag-ampo, ug mohatag sa kinatibuk-ang mga panudlo nga may kalabutan sa kinabuhi sa iyang pamilya ni bisan kinsa nga maanaa.”²⁵

Panahon sa Gubat sa Vietnam, mihimo kami og nagsunod-sunod nga espesyal nga mga miting alang sa mga miyembro sa Simbahan nga gitawag sa pagserbisyo sa militar. Human sa ingon nga miting didto sa Chicago, nagtindog ako tapad ni Presidente Harold B. Lee sa diha nga usa ka buotan nga batan-ong Santos sa Ulahing mga adlaw misulti ni Presidente Lee nga siya nagbakasyon aron sa pagbisita sa iyang panimalay ug dayon pabalikon sa Vietnam. Gihangyo niya si Presidente Lee sa paghatag kaniya og panalangin.

Sa dako nakong kahibulong, si Presidente Lee miingon, “Ang imo gayud nga amahan ang mohatag kanimo og panalangin.”

Nasagmuyo kaayo, ang batan-ong lalaki nga miingon, “Ang akong amahan dili makamaong mohatag og panalangin.”

Si Presidente Lee mitubag, “Pauli, dong, ug sultihi ang imong amahan nga moadto ka sa gubat ug gusto nga makadawat og usa ka panalangin sa amahan gikan kaniya. Kon dili siya makamao, sultihi siya nga maglingkod ka sa bangko. Makabarug siya sa imong luyo ug ibutang ang iyang mga kamot sa imong ulo ug mosulti og bisan unsay moabut sa hunahuna.”

Kining batan-on nga sundalo milakaw nga nagmasulub-on.

Paglabay sa duha ka tuig ako siyang gikahimamat pag-usab. Wala na ko kahinumdom kon diin. Iya akong gipahinumduman niana nga kasinatian ug miingon, “Akong gihimo ang gisugo kanako. Mipasabut ako sa akong amahan nga molingkud ako sa bangko ug nga kinahanglang ibutang niya ang iyang mga kamot sa akong ulo. Ang gahum sa priesthood misanap namong duha. Mao kadto ang kalig-on ug panalipud niadtong makuyaw nga mga bulan sa gubat.”

Sa laing higayon didto ako sa usa ka layong siyudad. Human sa komperensya nag-orden kami ug nag-set apart sa mga lider. Sa among pagtapus, ang presidente sa stake nangutana, “Makaorden ba kami sa usa ka batan-ong lalaki nga mahimong elder kinsa molakaw na aron magmisyon?” Ang tubag, tinuod gyud, nga oo.

Sa pagduol sa batan-ong lalaki, iyang gikamay ang tulo ka mga brother sa pagsunod ug mibarug alang sa pag-orden kaniya.

Akong namatikdan sa luyo nga lumbay ang usa ka liwat og nawong niining bataa, ug nangutana, “Imo ba kanang amahan?”

Ang batan-ong lalaki miingon, “Oo.”

Ako miingon, “Ang imong amahan ang mo-orden nimo.”

Ug siya misupak, “Apan nakahangyo na ako og laing brother nga mo-orden nako.”

Ug ako mitubag, “Dong, ang imong amahan ang mo-orden kanimo, ug ikaw mabuhi aron magpasalamat sa Ginoo tungod niining adlawa”

Dayon ang amahan miduol.

Mapasalamaton kaayo nga usa siya ka elder. Kay kon dili pa, mahimo na siya karon! Sa militar ilang tawgon kana nga usa ka pag-usbaw sa ranggo. Usahay ang ingon nga mga butang gihimo sa Simbahan.

Ang amahan dili makamaong mo-orden sa iyang anak nga lalaki, giagbayan nako siya, ug gitudloan siya sa ordinansa. Sa dihang nahuman na siya, ang batan-ong lalaki nahimo na nga elder. Dayon usa ka maanindot nga butang ang nahitabo. Hingpit nga nausab, ang amahan ug anak naggakus. Klaro kaayo nga wala kini mahitabo kaniadto.

Ang amahan, samtang naghilak, miingon, “wala ako maka-orden sa uban nakong anak nga mga lalaki.

Hunahunaa kon unsa ka dako ang natuman kon lain pa ang nag-orden kaniya, bisan pa og usa ka apostol.

Samtang ang priesthood karon anaa sa tibuok kalibutan, among gitawag diha sa matag elder ug high priest, matag naghupot sa priesthood sa pagbarug, sama sa diyutay apan gamhanan nga pundok sa 300, ni Gideon sa iyang kaugalingong dapit. Karon kinahanglan gayud nga atong pukawon ang matag elder ug high priest, sa matag korum ug grupo, ug sa mga amahan sa matag panimalay ang gahum sa priesthood sa Labawng Makagagahum.

Ang Ginoo miingon nga “ang mahuyang nga mga butang sa kalibutan moabut ug mopukan sa gamhanan ug mga malig-on.”²⁶

Si propeta Nephi nagsulti usab kabahin sa “gahum sa Kordero sa Dios, nga kini mikunsad diha sa mga santos sa simbahan sa Kordero, ug diha sa mga katawhan sa pakigsaad sa Ginoo, kinsa nagkatibulaag diha sa ibabaw sa tibuok yuta” ug miingon nga “sila gisangkapan sa katarung ug uban sa gahum sa Dios sa dako nga himaya.”²⁷

Kita nagkinahanglan sa matag usa. Ang gikapoy o naluya o tapulan ug bisan kadtong nalugmok sa sala, kinahanglan gayud nga ipahiuli pinaagi sa paghinulsol ug sa pagpasaylo. Daghan kaayo sa atong kaigsoonan sa priesthood nga nagpuyo ubos sa ilang mga katungod ug sa mga gidahum sa Ginoo.

Kita kinahanglan gayud nga magpadayon, masaligon sa langitnong gahum sa priesthood. Usa kini ka kapanguhaan sa kalig-on ug pagdasig aron masayud kon kinsa kita ug unsay anaa kanato ug unsay kinahanglan gayud nga buhaton diha sa buluhaton sa Labawng Makagagahum.

Ang Ginoo miingon, “Ako, ang Ginoo, mapugos sa pagtuman kon kamo mobuhat sa unsa nga Ako misulti; apan kon kamo dili mobuhat sa unsa nga Ako misulti, kamo dili makaangkon og saad.”²⁸

Ang mga panimalay nga walay priesthood ang pagabantayan ug pangalagaran pinaagi sa mga korum sa priesthood. Niini nga paagi, walay dili makadawat og mga panalangin sa bisan kinsa nga pamilya sa Simbahan.

Mga tuig na nga milabay usa ka pamilya nagkatigum diha sa higdaanan sa usa ka gamayng tigulang nga Danish nga babaye. Uban kanila mao ang iyang badlungon nga hamtong, nga anak nga lalaki. Sulod sa milabayng mga tuig siya nagpuyo diha sa panimalay.

Naghilak nga siya nangamuyo, “Mama, kinahanglan nga mabuhi ka. Mama, dili mahimo nga mamatay ka.” Siya miingon, “Mama, dili ka mobiya. Dili ako motugot nga mobiya ka.”

Ang gamay nga inahan mihangad sa iyang anak ug sa nagputol-putol niya nga Danish nga pinulongan miingon, “Apan ver is yo powah?”––hain ang imong gahum?

Si Pablo miingon:

“[Kita] mga tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang;

“Diha kaniya ang tibuok nga tinukod nausa ug nagatubo ngadto sa pagka-templo nga balaan diha sa Ginoo:

“Ug nga diha kaniya kamo usab ginabalay aron aron mahimong puloy-anan sa Dios pinaagi sa Espiritu.”²⁹

Nga ang buluhaton sa Ginoo mopasulabi dili usa ka pangutana. Nga kinahanglan gayud nga atong han-ayon ang atong mga paningkamot ug maghiusa sa atong mga kaugalingon mao ang mga gisugo.

Ang awtoridad sa priesthood ania kanato. Human sa tanan nato nga pakig-correlate ug pag-organisar, ato na karong responsibilidad sa pagpalihok sa gahum sa priesthood diha sa Simbahan. Ang awtoridad sa priesthood madawat pinaagi sa pag-orden; ang gahum sa priesthood madawat pinaagi sa pagka-matinud-anon ug masulundon nga pagpuyo sa pagtahud sa mga pakigsaad. Kini mapalambo pinaagi sa pagbansay ug paggamit sa priesthood diha sa pagkamatarung.

Karon, mga amahan, pahinumduman ko kamo sa sagrado nga kinaiya sa inyong mga calling. Kamo adunay gahum sa priesthood nga gikan gayud sa Ginoo aron sa pagpanalipud sa inyong panimalay. Adunay mga higayon sa dihang ang tanan nga nagbarug isip panalipud tali sa inyong pamilya ug sa pagsamok sa kaaway mao kana nga gahum. Makadawat kamo og panudlo gikan sa Ginoo pinaagi sa gasa sa Espiritu Santo.

Ang kaaway dili aktibo nga nagtugaw sa atong mga miting sa Simbahan, tingali panagsa ra. Pinaagi sa gagmay ug sa daghan, gawasnon kita nga magkapundok kutob sa atong gusto nga wala kaayoy pagsamok. Apan siya ug kadtong kinsa nagsunod kaniya mao ang matinguhaon sa pag-ataki sa panimalay ug sa pamilya.

Ang sangputanan sa tanang kalihokan sa Simbahan mao nga ang tawo ug ang iyang asawa ug ilang mga anak malipayon unta sa ilang panimalay, mapanalipdan sa mga baruganan ug mga balaod sa ebanghelyo, luwasnon nga masilyo diha sa mga pakigsaad sa mahangturon nga priesthood.

Matag balaod ug mga baruganan ug gahum, matag tinuohan, matag ordinansa ug pag-orden, matag pakigsaad, matag wali ug matag sakrament, matag tambag ug pagtul-id, mga pagbugkos, mga tawag, mga pag-release, ang serbisyo––kining tanan anaa isip katapusang katuyoan niini ang pagkahingpit sa indbidwal ug sa pamilya, tungod kay ang Ginoo miingon, “Mao kini ang akong buhat ug ang akong himaya—ang pagpahinabo sa pagka-mortal ug sa kinabuhi nga dayon sa tawo.”³⁰

Ako mohatag og pamatuod sa gahum sa priesthood nga gihatag sa Simbahan aron sa pagpanalipud kanato ug mogiya kanato. Ug tungod kay aduna kita niana, kita walay kahadlok sa umaabut. Ang kahadlok mao ang katugbang sa hugot nga pagtuo. Magpadayon kita, masaligon nga ang Ginoo nagbantay kanato, ilabina sa pamilya. Kaniya ako mosaksi diha sa pangalan ni Jesukristo, amen.