Ang Pag-ugmad og Maayong Paghukom ug Dili ang Paghukom sa Uban

Nagpuyo kita sa kalibutan diin daghang mga sitwasyon nga nagkinahanglan sa atong mga paghukom nga sagad malisud. Bisan pa man ang Manluluwas mihatag sa kasugoan nga “dili maghukom” sa atong isigkatawo.¹ Unsaon nato kini sa pagbuhat ug sa gihapon magamit ang maayong paghukom diha sa kalibutan nga puno sa pagpanglingla ug kadautan? Kita kinahanglan gayud nga maayong mohukom kon mohimo og kritikal nga mga desisyon sa matag yugto sa atong kinabuhi sama sa pagpili og mga higala, pagpangita og mahangturon nga kapikas, o sa pagpili og trabaho nga makapahimo kanato sa pag-amuma sa atong pamilya ug sa pag-alagad sa Ginoo. Bisan tuod nga ang Manluluwas nag-ingon kanato nga dili maghukom sa uban, Siya naglaum gihapon kanato nga mohimo og labing maayong paghukom.

Kita mahimong sagad nga makamatikod sa atong mga kaugalingon nga naghimo og hinanali nga mga paghukom kalabut sa mga tawo, nga makapausab o mopaklaro pag-usab sa atong relasyon uban kanila. Sagad mahimo ang sayop nga mga paghukom gumikan sa kakulang sa impormasyon o tungod kay wala kita makakita lapas nianang anaa gayud sa atubangan nato.

Agig paghulagway, ang istorya sagad maasoy mahitungod sa panahon dihang si Jesus mibisita sa panimalay nila ni Maria ug Marta, kinsa nagpuyo sa Betania uban sa ilang igsoon, si Lazaro. Usa kadto ka lugar nga kahimut-an sa Manluluwas, diin Siya makapahulay ug malingaw sa palibut sa usa ka matarung nga panimalay. Panahon sa usa sa iyang mga pagbisita, si Marta nagkapuliki sa pag-andam og pagkaon ug si Maria mipili nga molingkod sa tiilan sa Manluluwas aron modawat sa Iyang panudlo.

“Apan si Marta nagkalibuglibog sa hilabihang pag-amuma, ug siya miduol kang Jesus, ug miingon kaniya, Ginoo, wala ba ikaw magkabana nga gipasagdan man lamang niining akong igsoon nga mag-inusara ako sa pag-amuma? …

“Apan si Jesus mitubag ug miingon kaniya, Marta, Marta, nalibog ug nagkapuliki ikaw sa daghang mga butang:

“Apan usa ra gayud ka butang ang kinahanglanon: ug hingpilian ni Maria ang maayong bahin nga dili na makuha gikan kaniya.”²

Daghang mga leksyon sa Dominggo ang natudlo gamit kini nga istorya nga mahimong makapaubos ni Marta kalabut sa iyang pagtuo. Bisan pa man adunay laing istorya niining bantugan nga babaye, si Marta, nga makahatag kanato og mas lawom nga panglantaw sa iyang pagsabut ug pagpamatuod. Nahitabo kini dihang ang Manluluwas miabut aron sa pagpabuhi og balik sa iyang igsoon, si Lazaro, gikan sa pagkamatay. Niini nga okasyon si Marta kadto kinsa atong nasayran nga miduol ngadto ni Jesus “dihang iyang nadunggan” nga Siya miabut. Samtang siya mihimamat Kaniya, siya miingon nga siya nasayud nga “bisan unsa nga [Siya ma]ngayo sa Dios, ang Dios [mo]hatag [Kaniya].”

Dayon si Kristo mipakigbahin uban ni Marta sa labing mahinungdanong doktrina sa pagkabanhaw, nga miingon;

“Ako mao ang pagkabanhaw, ug ang kinabuhi; ang mosalig kanako, bisan siya mamatay, mabuhi siya:

“Ug ang tanan nga buhi ug nagsalig kanako dili na gayud mamatay. Motuo ba ikaw niini?”

Siya mitubag kaniya uban sa iyang gamhanan nga pagpamatuod: “Oo, Ginoo: ako nagatuo nga ikaw mao ang Kristo, ang Anak sa Dios, nga moanhi sa kalibutan.”³

Kapila man si Marta nasaypan isip tawo kinsa mas mipalabi sa mga pagbuhat kay sa Espiritu? Bisan pa man, ang iyang pagpamatuod diha sa pagsulay sa pagkamatay sa iyang igsoon tataw nga nagpakita sa kalawom sa iyang panabut ug pagtuo.

Daghang mga sister ang nakadungog sa unang istorya ug naghunahuna kon sila usa ba ka Maria o usa ka Marta, apan ang kamatuoran anaa sa pagkasayud sa kinatibuk-an sa tawo ug sa paggamit sa maayong paghukom. Pinaagi sa pagkasayud og dugang kalabut ni Marta, atong nakita nga sa tinuod siya usa ka tawo nga espirituhanon kaayo kinsa adunay isug ug walay kahadlok nga pagpamatuod sa misyon sa Manluluwas ug sa Iyang balaanong gahum sa kinabuhi. Ang sayop nga paghukom kang Marta tingali nakapugong kanato sa dili pagkasayud sa matuod nga kinaiya niining talagsaon nga babaye.

Sa personal nga sitwasyon, isip usa ka batan-on nga doktor nakakat-on ko og mahinungdanong leksyon mahitungod sa paghimo og dinalian nga mga paghukom. Samtang nagtrabaho ko sa panggabii nga oras sa usa ka pang-emerhensya nga departamento, usa ka batan-ong lalaki ug iyang asawa miabut tungod kay nag-antus siya sa grabe nga kasakit. Sa ilang mga sininaan ug kakulang sa kalimpyo, sayon nga makit-an nga lisud ang ilang kinabuhi. Ang iyang buhok dili maayong pagkagalam ug taas kaayo. Ang ilang mga sinina dugay-dugay na nga wala malabhi, ug ang epekto sa malisud nga kinabuhi makita sa ilang mga nawong.

Human sa akong pag-eksamin, nakig-istorya ko sa lalaki nga mipahibalo sa problema ug mihisgut unsaon sa pagtambal. Kini nga tawo mitan-aw kanako nga may dakong paghigugma sa iyang mga mata nga talagsa ra kaayo nga masinati ug nangutana uban sa tibuok gugma sa usa ka mapinanggaon nga bana, “Doktor, mamaayo ra ba ang minahal nakong asawa?” Niana nga higayon, gibati nako ang Espiritu nga nagpamatuod nga siya anak sa Dios ug nakita sa iyang mga mata ang ebidensya sa Manluluwas. Kining tawhana tinuod nga nagpakita og gugma alang sa uban, ug nahukman nako siya. Usa kadto ka leksyon nga nagbilin og malungtaron nga impresyon.

Ang maayong paghukom gikinahanglan dili lamang sa pagsabut sa mga tawo apan sa pag-atubang usab og mga desisyon nga sa kasagaran modala kanato o mopalayo gikan sa atong Langitnong Amahan. Samtang gihinumduman nako ang akong kaugalingong kinabuhi, makita nako ang daghang mga higayon diin ang usa ka gamay nga pagtipas sa padulngan pinasubay sa dili maayong paghukom modala unta kanako palayo gikan sa unsay gusto sa Ginoo kanako—mga desisyon sama sa pagbaton og pamilya samtang nag-eskwela, ang pagka-aktibo sa tanang aspeto sa ebanghelyo, pagbayad og mga ikapulo ug mga halad sa panahon nga ang kinitaan gamay kaayo, ug ang pagdawat og mga calling sa lisud nga mga panahon, nakatabang kanako nga makasabut pa og dugang kalabut sa sakripisyo. Daghang mga panalangin sa kinabuhi ang wala madawat tungod kay ang kalibutanong paghukom gigamit ngadto sa tinud-anay nga espiritwal nga desisyon.

Adunay daghan kaayo nga mga kinaiya sa mga tawo kinsa nakapalambo og maayong paghukom. Motanyag ko og upat ka mga giya alang sa pagpalambo niana nga paghukom sa paghimo og importante nga mga desisyon.

Una, ibutang ang kaugalingon nimong mga sumbanan pinasubay sa ebanghelyo ni Jesukristo. Ang usa ka tawo dili gayud mahimong usa ka maayong tighukom kon wala ang ebanghelyo ni Jesukristo isip kapasikaran. Ang ebanghelyo adunay taas ug malampuson nga rekord sa paggiya sa mga tawo ngadto sa kalipay. Pipila sa mga ideya sa kalibutan mipabilin sa katawhan nga nag-utaw-utaw sa pagsulay sa pagpangita sa kaugalingon nilang mga sumbanan. Tungod niini, kita makadungog og mga pulong sama sa “usa ka bag-ong moralidad.” Kini nga mga pulong malinglahon! Ang mga sumbanan sa moralidad mahangturon ug wala mausab; ni kita mosulay sa pagdiskubre og usa ka bag-ong interpretasyon niini. Alang sa mga kabatan-onan kini nga mga sumbanan nakasulat diha sa pamphlet nga Alang sa Kalig-on sa mga Kabatan-onan. Kini nga mga sumbanan tataw nga nahisubay sa ebanghelyo ni Jesukristo ug gituyo aron mapadayon hangtud sa hamtong nga kinabuhi. Tingali maayo alang kanato isip mga hamtong sa pagtuon ug paggamit niini nga pamphlet sa atong kinabuhi.

Ikaduha, paminaw sa mga mensahe sa buhing propeta. Unsa kadaghan sa dili maayong mga paghukom sa pinansyal ang malikayan unta kon kita naminaw pa sa daghang katuigan sa pagpanambag nga gihatag sa atong mga propeta mahitungod sa paglikay sa peligroso nga pamasin ug sa pagsunod og mainampingon nga pag-badyet aron malikay sa utang? Unsa unta kadaghan sa mga kaminyoon ang nasalbar pinaagi sa paggamit og maayong paghukom sa paglikay sa media nga modala ngadto sa pagkaadik sa pornograpiya ug kasakit sa dughan? Matag kinatibuk-ang komperensya ug magasin sa Simbahan naglangkob og tambag gikan sa mga propeta diin, kon buhaton, modala kanato ngadto sa maayong paghukom. Dili kita makalingkawas kon baliwalaon nato kini.

Ikatulo, pag-ugmad uban sa Balaang Espiritu og usa ka relasyon kalabut sa pagpaminaw. Gihatagan kita sa gasa sa Espiritu Santo human sa atong bunyag, apan sagad wala nato magamit kini nga gasa, nahikalimot nga Siya motabang kanato sa labing importante nga mga paghukom sa atong kinabuhi. Ang Ginoo mihatag kanato niini nga gasa, kay nasayud nga kita mag-atubang og malisud nga mga paghukom sa kinabuhi. Ang pagpaminaw niining tingog kinahanglanon sa pagpalambo og maayong paghukom. Ang usa ka relasyon kalabut sa pagpaminaw sagad nagkinahanglan og usa ka hilum nga palibut diin kita makabaton og panahon sa pagpamalandong ug pagpaminaw sa ligdong, hinay nga tingog. Kining malinawon nga palibut pareho ra sa gawas ug sa sulod. Busa, labaw pa kini sa pagpalong sa musika sa kalibutan o ang pagpalanog sa uban nga media; kini usab ang pagpalong sa kabanha sa sala nga anaa sa sulod sa atong kalag. Kini moabli sa komunikasyon uban sa Espiritu, nga gikinahanglan gayud kaayo.

Si Kristo miingon: “Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw.”⁴ Ang kalinaw nga nagagikan sa pagpaminaw sa Balaang Espiritu mowagtang sa kahadlok sa paghimo og dili maayo nga paghukom sa kinabuhi.

Ikaupat, sunda ang mga sugo. Ang pagkaandam nga mosunod sa mga sugo sa Dios nagbukas kanato og daghang gisaad nga mga panalangin. Ang Basahon ni Mormon, agig dugang isip laing tugon ni Jesukristo, usa ka basahon mahitungod sa mga sangputanan sa pagsunod ug dili pagsunod sa mga sugo. Ang Ginoo miingon kang Nephi sa ikaduhang kapitulo sa una niyang basahon, “Ug sanglit kamo maghupot sa akong mga sugo, kamo mouswag.”⁵

Kining sama nga saad gibalik-balik sa hapit matag inila nga propeta sa Basahon ni Mormon. Liboan ka tuig sa kasaysayan girekord diin naghatag sa pagsaksi nga kining mga butanga tinuod. Ug ang sama nga mensahe magamit nato karon. Ang maayong paghukom labing maayo nga makat-unan ug magamit sulod sa mga utlanan nga gitakda sa Ginoo pinaagi sa paghatag kanato og mga sugo.

Ako mopamatuod nga kon mag-atubang kita og lisud nga mga desisyon ug mosunod niini nga mga lagda, makahibalo kita og mas maayo kon unsaon nato sa paghukom. Sa pangalan ni Jesukristo, amen.