Suginli Ko sa mga Istorya ni Jesus

Kon sangunan ka nga mamulong sa hinapus sa katapusang sesyon sa kinatibuk-ang komperensya, maminaw ka sa matag pulong, maghunahuna kon unsang bahina sa imong pakigpulong ang mahatag sa wala pa ang imong turno. Walay gihatag nga mga hilisgutan, walay panagsabut sa tema. Ang paagi sa Ginoo, siyempre, mao kanunay ang pinakamaayong paagi. Iyang kuhaon ang tinagsa, mainampoong paningkamot sa matag mamumulong ug mopahiangay og usa ka espirituhanong obra maestra, puno sa pinadayag ug gahum. Balik-balik nga tema, baruganan nga giugmad human sa laing baruganan, propetikanhong pasidaan, makadasig nga mga saad––ang balaanon nga pagkauyon usa ka milagro! Ako mopamatuod nga niining komperensya atong nadungog ug nabati ang hunahuna ug kabubut-on sa Ginoo.

Si Presidente Thomas S. Monson mihulagway sa bag-ong henerasyon nga “mao gayud ang pinakalabing maayo”¹ ug miingon ngadto sa atong mga kabatan-onan: “Kamo mianhi dinhi sa yuta sa usa ka mahimayaong panahon. Ang mga oportunidad nga anaa sa inyong atubangan hapit walay kinutuban.”² Apan mipasidaan usab siya, “Gibutang kita sa yuta sa masamok nga panahon.”³ “Panahon kini sa pagkamatuguton, sa kinatibuk-ang katilingban nga kanunay nagpasagad ug nagsupak sa mga balaod sa Dios.”⁴ Gilibutan kita sa daghan kaayo nga gimugna aron mabali ang atong atensyon. “Ang kaaway migamit sa tanang posibleng pamaagi aron sa paglit-ag kanatong tanan sa iyang mga pagpangilad.”⁵

Katungdanan nato ang pag-amuma sa bag-o nga henerasyon. Mianhi sila dinhi sa yuta uban sa importante nga mga responsibilidad ug dako nga espirituhanong mga kapasidad. Dili mahimo nga mobaliwala kita sa atong pag-andam kanila. Ang atong hagit isip mga ginikanan ug mga magtutudlo dili mao ang pagmugna og kalamboan sa ilang pagka-espirituhanon diha sa ilang mga kalag kondili mao ang pagpadayon sa kalamboan sa ilang pagka-espirituhanon nga anaa na tungod sa ilang hugot nga pagtuo nga ilang napalambo didto sa kinabuhi nga wala pa dinhi sa yuta.

Niining hapuna gusto nakong ipasabut og maayo ang pangaliyupo sa usa ka bata gikan sa usa ka kanta sa Primary:

Sa atong kalibutan karon, matag bata, matag batan-ong lalaki ug batan-ong babaye nagkinahanglan sa iyang kaugalingon nga pagkakabig sa kamatuoran. Ang matag usa nagkinahanglan sa iyang kaugalingon nga kahayag, sa iyang kaugalingon nga “makanunayon ug dili matarug”⁷ nga hugot nga pagtuo diha kang Ginoong Jesukristo, nga dili magsalig sa mga ginikanan, sa mga lider sa mga kabatan-onan, ug sa matinabangon nga mga higala.

Ang mga istorya kabahin ni Jesus mahimong makatabang sa pagpalambo sa pagtuo nga anaa sa mga kasingkasing sa atong mga anak. Si Jesus miingon, “Ako ang dalan, ang kamatuoran, ug ang kinabuhi.”⁸ Ang mga istorya kabahin ni Jesus nga kanunayng gipakigbahin magdala og hugot nga pagtuo ngadto ni Ginoong Jesukristo ug kalig-on ngadto sa pundasyon sa pagpamatuod. Aduna ba kamoy mahunahunaan nga mas bililhon pa nga gasa alang sa atong mga anak?

Ang kinabuhi ug mga pagtulun-an ni Jesukristo natuhop na ba diha sa mga hunahuna ug mga kalag sa atong mga anak? Naghunahuna ba sila kabahin sa kinabuhi sa Manluluwas kon maglibug sila kon unsay angayang buhaton sa ilang kaugalingong kinabuhi? Mas mag-anam kini ka importante sa umaabut nga katuigan.

Nahanduraw ba sa atong mga anak ang konseho nga wala pa dinhi sa yuta,⁹ diin si Jesus––ang labing halangdon sa tanan––mipahayag, “Ania Ako, ipadala Ako”?¹⁰ Nakita ba nila ang ilang kaugalingon nga kaandam sa pagserbisyo sama sa pagsunod sa Iyang ehemplo?

Naghunahuna ba sila mahitungod sa Iyang mapaubsanon nga pagkatawo,¹¹ ang Manluluwas sa kalibutan gipahigda sa pasungan?¹² Ang Iyang mga kahimtang nakatabang ba kanila nga mas makasabut sa tukma nga dapit sa kalibutanon nga mga kabtangan?

Nasayud ba sila nga si Jesus kanunay nga mitudlo nga, “Pangayo, ug kamo makadawat”?¹³ Ang Iyang mga pag-ampo sa pasalamat¹⁴ ug ang Iyang mga pangaliyupo ngadto sa Iyang Amahan¹⁵ nasilsil ba diha sa mga hunahuna sa atong mga anak kon magluhod sila sa pag-ampo sa ilang kaugalingon nga mga kabalaka?

Gisultihan ba nato sila kabahin sa gugma ni Jesus alang sa mga bata, kon giunsa Niya sila pagkugos diha sa Iyang mga bukton, nag-ampo alang kanila, ug mihilak?¹⁶ Nasayud ba ang atong mga anak nga si Jesus nagbarug nga andam “uban sa bukas nga mga bukton aron pagdawat [kanila]”?¹⁷

Mokuha ba sila og kalig-on diha sa mga istorya kabahin ni Jesus nga nagpuasa¹⁸––samtang kita nagtudlo kanila sa balaod sa puasa?

Diha sa ilang kaugalingong pag-inusara, nasayud ba ang atong mga anak sa kaguol nga gibati sa Manluluwas sa dihang ang Iyang mga higala mibiya Kaniya ug sa dihang gipangutana Niya ang Iyang mga Apostoles, “Buot ba usab kamong mobiya kanako?”¹⁹

Gibati ba sa atong mga anak ang gahum sa mga milagro sa Manluluwas? Giayo ni Jesus ang sanglahon,²⁰ gibalik ang panan-aw sa buta.²¹ Gipakaon Niya ang 5,000,²² gipalinaw ang dagat,²³ ug gibuhi og balik si Lazaro gikan sa pagkamatay.²⁴ Nagtuo ba ang atong mga anak nga “pinaagi kini sa hugot nga pagtuo nga ang mga milagro mahimo,”²⁵ ug nag-ampo ba sila alang sa mga milagro diha sa ilang kaugalingong kinabuhi?

Nadasig ba ang atong mga anak sa mga pulong sa Manluluwas ngadto sa magmamando sa sinagoga: “Ayaw kahadlok, sumalig ka lamang”?²⁶

Ang atong mga anak nasayud ba mahitungod sa Iyang hingpit nga kinabuhi,²⁷ sa Iyang dili hinakog nga pagpangalagad, sa pagluib Kaniya ug sa mapintas nga Paglansang sa Krus?²⁸ Mipamatuod ba kita ngadto kanila kabahin sa katinuod sa Iyang Pagkabanhaw,²⁹ sa Iyang pagbisita ngadto sa mga Nephite sa Amerika,³⁰ sa Iyang pagpakita ngadto ni Propeta Joseph Smith didto sa Sagrado nga Kakahoyan?³¹

Nagpaabut ba sila sa Iyang harianon nga pagbalik, sa panahon nga ang tanan mahuman na ug ang matag tuhod moluhod ug matag dila mokumpisal nga si Jesus mao ang Kristo?³²

Moingon ba ang atong mga anak, “Suginli ko sa mga istorya ni Jesus, gusto ko nga maminaw”?³³

Ngadto sa mga kabatan-onan ug mga anak: Pagpuyo sumala sa inyong importante nga mga responsibilidad ug dakong espirituhanon nga mga kapasidad. Pagtinguha nga mas masayud pa mahitungod ni Jesus; ablihi ang mga kasulatan. Ang usa ka ideya mao ang pagbasa og usab sa basahon ni Juan ug dayon hisguti kini uban sa inyong mga ginikanan, mga magtutudlo, ug sa usag usa.

Ngadto sa mga amahan ug mga inahan, ngadto sa mga lolo ug mga lola, ug ngadto niadtong walay kaugalingon nilang mga anak kinsa mahigugmaong nag-amuma og mga bata ug mga kabatan-onan, ang akong tambag mao ang paghisgut kanunay mahitungod ni Jesukristo. Sa Iyang balaan nga pangalan anaa ang dakong espirituhanon nga gahum. “Walay lain nga ngalan nga gihatag ni lain nga mga agianan … diin ang kaluwasan modangat ngadto sa mga katawhan, lamang diha ug pinaagi sa ngalan ni Kristo.”³⁴

Ngadto sa mga inahan nga nagpadako sa ilang mga anak nga walay amahan diha sa panimalay, mosaad ako kaninyo nga samtang kamo maghisgut kabahin ni Jesukristo, kamo mobati sa gahum sa langit nga nagpanalangin kaninyo.

Human sa kamatayon sa iyang bana, si Sister Stella Oaks mipadako sa iyang tulo ka batan-on nga mga anak (lakip ni Elder Dallin H. Oaks³⁵) isip usa ka inahan nga walay bana. Makausa miingon siya: “Akong nahibaloan nga ang Ginoo nahigugma kanako ug nga himoon ako nga makasugakod sa akong misyon. Gibati nako ang malukpanon nga gugma … [ug nasayud] nga siya [mopaluyo kanato] nga makalahutay sa mga pagbatok nga [mahimong] moabut.”³⁶

Mohimo ako og usa ka espesyal nga hangyo ngadto sa mga amahan: Palihug magmahimong usa ka importante nga bahin sa pagpakig-istorya ngadto sa inyong mga anak mahitungod sa Manluluwas. Nagkinahanglan sila sa mapamatuoron nga mga pagpahayag sa inyong hugot nga pagtuo, kauban niadtong sa ilang inahan.

Bisan tingali og adunay mga panahon nga ang usa ka anak dili maminaw uban sa matuohon nga kasingkasing, ang inyong pagpamatuod kabahin ni Jesus magpabilin sa iyang hunahuna ug kalag. Nahinumdom ba kamo sa istorya kabahin ni Alma, kinsa mipili sa sayop nga dalan? Sa pagbalik, siya miingon:

“Ako nahinumdom … sa akong amahan nga [namulong] … mahitungod sa pag-anhi … ni Jesukristo, … aron sa pag-ula sa iyang dugo alang sa mga sala sa kalibutan.

“Samtang ang akong hunahuna naghinuktok niini nga panumduman, ako nangamuyo sulod sa akong kasingkasing: O Jesus, ikaw nga Anak sa Dios, malooy ka kanako.”³⁷

Kon ang usa ka anak wala maminaw, ayaw pagpakawala sa paglaum. Ang panahon ug kamatuoran anaa dapig kaninyo. Sa sakto nga panahon, ang inyong mga pulong mobalik nga daw nagagikan mismo sa langit. Ang inyong pagpamatuod dili gayud mobiya sa inyong mga anak.

Samtang kamo mamulong nga may balaang pagtahud kabahin sa Manluluwas––diha sa sakyanan, sa bus, sa kan-anan, samtang kamo magluhod sa pag-ampo, panahon sa pagtuon sa kasulatan, o sa mga panag-istoryahanay sa lawom na nga kagabhion––ang Espiritu sa Ginoo mouban sa inyong mga pulong.³⁸

Kon buhaton ninyo ang inyong pinakamaayo, ang pagpamatuod kabahin ni Jesus hinayhinay nga modagayday diha sa kasingkasing sa inyong mga anak. Moduol sila ngadto sa ilang Langitnong Amahan diha sa mapainubsanon nga pag-ampo ug mabati ang Iyang impluwensya pinaagi sa gahum sa Espiritu Santo. Ang usa ka mas lig-on nga personal nga pagtuo diha ni Jesukristo moandam kanila alang sa mga hagit nga kasagaran gayud nilang atubangon.³⁹

Akong nakaila sila si Bill Forrest ug Debbie Hutchings sa dihang mga estudyante pa kami sa Brigham Young University. Si Bill mao pay pag-uli gikan sa iyang misyon. Siya ug si Debbie nagkahigugmaay ug naminyo didto sa Templo sa Oakland California. Ilang gitukod ang ilang panimalay didto sa Mesa, Arizona, ug napanalanginan og lima ka mga anak nga lalaki ug duha ka mga anak nga babaye. Gitudloan nila ni Bill ug Debbie ang ilang mga anak sa paghigugma ni Ginoong Jesukristo sama sa ilang paghigugma Kaniya. Ang ilang anak nga lalaki, si Elder Daniel Forrest, nga kasamtangang nagserbisyo karon sa Mexico Oaxaca Mission, miingon, “Matag buntag walay sipyat nga anaa kami sa lamesa sa dili pa moadto sa eskwelahan nga magbasa ug maghisgut sa mga kasulatan.”

Ang ilang anak nga babaye nga si Kara, minyo na karon nga may kaugalingong duha ka mga anak, klaro pa gihapon nga nakahinumdom sa iyang amahan nga magdrayb aron ihatud siya ngadto sa iyang sayo sa buntag nga mga kalihokan sa high school. Miingon siya, “Ang akong papa malingaw sa pagsag-ulo og mga kinutlo, mga kasulatan, ug mga balak [ug atol niadtong sayo sa buntag nga mga biyahe] magpraktis kami sa pagsag-ulo niini.” Usa sa iyang paborito nga kasulatan mao ang “Hinumdumi, hinumdumi nga kini diha sa lig-on nga sukaranan sa atong Manunubos, kinsa mao si Kristo, ang anak sa Dios, nga kamo kinahanglan gayud nga motukod sa inyong tukuranan; nga sa panahon nga ang yawa mopadala sa iyang mapintas nga mga hangin, … [siya] walay gahum ibabaw kaninyo sa pagbitad kaninyo … tungod sa lig-on nga sukaranan diin kamo natukod.”⁴⁰

Pagka Biyernes sa wala pa ang Pasko sa Pagkabanhaw niadtong tuig 2000, saktong 10 ka tuig ang milabay, si Bill Forrest nag-alagad isip bishop sa Estate Groves Ward didto sa Arizona. Sa iyang pagdrayb paingon sa trabaho, usa lamang ka milya (1.6 km) gikan sa panimalay, ang iyang sakyanan nabanggaan sa usa ka dakong trak nga kargahanan og mga graba. Si Debbie ug ang mga anak mibiya sa panimalay wala madugay human nakabiya si Bill ug wala damha nga miabut sa makalilisang nga talan-awon. Si Bill namatay sa aksidente. Ang imortal nga espiritu niining minahal nga bana ug amahan sa kalit gikuha pauli ngadto Kaniya kinsa nakabuntog sa kamatayon, ang Anak sa Dios, kansang mahimayaon nga Pagkabanhaw magkauban unta nilang saulogon nianang Pasko sa Pagkabanhaw.

Giunsa man ni Debbie ug sa iyang pito ka mga anak (ang kamanghuran singko anyos pa lang) sa pagkaplag og kalig-on nga ilang gikinahanglan? Si Kara, 15 anyos nianang higayuna sa pagka-aksidente sa iyang amahan, bag-ohay lang misulti kanako: “Mapasalamaton ako sa akong [inahan ug amahan] sa mga pamaagi nga ilang gitudlo kanako [mahitungod sa Manluluwas]. Ilang giablihan ang mga kasulatan uban kanako, nag-ampo uban kanako, ug mga ehemplo sila sa gugmang putli, paghigugma, ug pailub [sa Manluluwas].… Ang Pasko sa Pagkabanhaw [mao] ang usa ka makapatandog nga panahon sa akong kinabuhi matag tuig samtang naghunahuna ako sa kinabuhi, misyon, ug Pagkabanhaw sa atong Manluluwas ug mahinumduman nako ang kinabuhi sa akong amahan dinhi sa yuta.”

Si Elder Daniel Forrest miingon: “10 anyos pa lang ko sa dihang namatay ang akong amahan. Lisud kaayo kadto nga panahon.… Ang akong mama kanunay gayud nga usa ka ehemplo sa mga pagtulun-an sa Manluluwas. Akong gidala ang name tag sa akong amahan gikan sa iyang misyon didto sa Spain. [Duha] sa akong paborito nga mga kinutlo gikan sa akong amahan [mao]: ‘Ang duha ka tawo makahimo sa bisan unsa nga butang kon ang usa kanila mao ang Ginoo’ ug ‘Ang Manluluwas kinahanglan gayud nga mao ang atong pundasyon. Kon wala kana masukamod kita.’”

Ang hugot nga pagtuo diha ni Jesukristo mipuno sa mga kasingkasing sa mga anak nga Forrest. Niining katapusan sa semana nga Pasko sa Pagkabanhaw, 10 ka tuig na ang milabay sukad sa pagkamatay sa ilang amahan, gimingaw na kaayo sila kaniya, apan ang kahapdos sa iyang kamatayon “gituhop diha kang Kristo.”⁴¹ Nakahibalo sila, tungod sa dili maihap nga gasa sa Manluluwas, makauban ra nila pag-usab ang ilang amahan dinhi sa yuta ug ang ilang Langitnong Amahan.

Suginli ko sa mga istorya ni Jesus.

Sa dili madugay atong mapaminaw ang propeta sa Dios. Sa pagpamulong kabahin sa Iyang propeta, ang Ginoo miingon, “Kay ang iyang pulong ikaw makadawat, ingon og gikan sa akong kaugalingon nga ba-ba.”⁴² Ako mopamatuod nga si Presidente Thomas S. Monson mao ang tigpama-ba sa Ginoo dinhi sa yuta.

Ako mopamatuod nga si Jesus mao ang Kristo, ang Manluluwas sa tanang katawhan. Ang Iyang kinabuhi, Iyang Pag-ula, Iyang Pagkabanhaw, Iyang gipaabut nga pagbalik ingon ka siguro ug ka tinuod sama sa pagsubang sa adlaw. Daygon ang iyang pangalan sa kahangturan.⁴³ Sa balaan nga pangalan ni Jesukristo, amen.