“Elia sy ireo mpisoron’i Bala,” Tantara ao amin’ny Testamenta Taloha (2022)
“Elia sy ireo mpisoron’i Bala,” Tantara ao amin’ny Testamenta Taloha
1 Mpanjaka 18
Elia sy ireo mpisoron’i Bala
Ny mpaminanin’ Andriamanitra sy ny mpisorona sandoka
Nijaly hatrany ny fanjakan’ Isiraely noho ny tsy fisian-drano. Nilaza tamin’ny vahoaka ny mpanjaka Ahaba mba hanaraka andriamani-diso antsoina hoe Bala.
Nalefan’ny Tompo i Elia mpaminany mtba hihaona amin’i Ahaba. Nanasa ny olona rehetra teny an-tampon’ny tendrombohitra iray i Elia. Nanasa ny mpanjaka sy ny mpisorony izy ho amina fanamby iray mba hahitana hoe ny Tompo sa i Bala no tena Andriamanitra marina.
Nohazavain’i Elia ilay fanamby. Hanao sorona ombilahy eo ambony alitara izy sy ireo mpisoron’i Bala, saingy tsy hasian’izy ireo afo izany. Fa hivavaka amin’ny bala kosa ireo mpisorona mba hampirehitra afo. Avy eo i Elia hivavaka amin’ny Tompo mba hampirehitra afo. Fantatr’i Elia fa ny Andriamanitra tena marina ihany no hampirehitra ny afo.
Nivavaka tamin’ny andriamanitr’izy ireo ny mpisoron’i Bala nanomboka ny maraina mandra-misasak’alina, saingy tsy nisy na inona na inona nitranga. Nihomehy azy ireo i Elia ary nilaza fa mety natory i Bala andriamanitr’izy ireo.
Tezitra ireo mpisorona ary nitsambikina teo amin’ny alitara, ary nihiaka mandrapahariva ny andro. Nanantena izy ireo fa hamaly ny andriamanitr’izy ireo, nefa mbola tsy nisy afo ihany.
Dia anjaran’i Elia izao. Nanamboatra alitara ho an’ny Tompo izy, nihady hady manodidina ny alitara, ary nanomana ny sorona.
Nangataka ny vahoaka i Elia mba hameno rano siny efatra ary handraraka izany in-telo eo amin’ny hazon’ny alitarany. Nandena ny hazo sy ny alitara ny rano. Nameno ilay hady manontolo izany.
Nivavaka tamin’ny Tompo i Elia mba hanehoana ny tena herin’ Andriamanitra. Latsaka ny afon’ny Tompo ka nandevona ilay sorona sy ny hazo sy ny vato ary rano. Fantatry ny vahoaka fa ny Andriamanitr’i Elia no tena Andriamanitra marina. Nivavaka i Elia mba hitsahatra ny hain-tany ary nandefa orana ny Tompo.