“Mpaminany Elia,” Tantara ao amin’ny Testamenta Taloha (2022)
“Mpaminany Elia,” Tantara ao amin’ny Testamenta Taloha
1 Mpanjaka 16–18
Mpaminany Elia
Finoan’ny reny iray sy fahagagana avy amin’ny Tompo
Tsy nisy orana tao amin’ny fanjakan’i Isiraely, ary efa ho lany ny rano. Tsy tia ny mpaminanin’ Andriamanitra i Ahaba mpanjaka sy i Jezabela mpanjakavavy. Novonoin’izy ireo mihitsy aza ny mpaminany sasany. Nivavaka tamin’ny sampy ilay mpanjaka sy manjakavavy mba hiavian’ny orana. Saingy nilaza tamin’izy ireo i Elia mpaminany fa tsy handefa orana mandritra ny taona maro ny Tompo.
1 Mpanjaka 16:29–33; 17:1; 18:13
Tezitra mafy tamin’i Elia ilay mpanjaka sy mpanjakavavy. Nampitandrina an’i Elia ny Tompo mba hiafina satria tandindomin-doza ny ainy.
Nentin’ny Tompo teo amin’ny rano iray i Elia ary nandefa vorona izy hitondra hanina ho azy. Saingy satria tsy nisy orana dia maina ilay rano ka tsy nanana rano i Elia.
Nentin’ny Tompo tamina vehivavy iray tany amin’ny tanàna lavitra iray i Elia. Nangataka rano sy mofo taminy i Elia. Saingy ny ampy ho an’ny tenany sy ny an’ny zanany mandritra ny andro iray ihany no nanany.
Fantatr’i Elia fa izany no mba hanina sisa nananany. Nampanantena izy fa raha toa ka omeny hanina izy dia hanome sakafo ho azy sy ny fianakaviany ny Tompo mandrapiverin’ny orana.
Nanao mofo ho an’i Elia ilay vehivavy. Dia nitombo ny diloilo sy ny kobany! Nisy sakafo ampy ho an’i Elia sy ho azy tao nandritra ny andro maromaro.
Indray andro dia narary ny zanak’ilay vehivavy ka maty. Nanontany an’i Elia izy hoe nahoana no navelan’ny Tompo hitranga izany.
Nanana ny fisoronana i Elia. Nitsodrano ilay zanany izy ary nangataka ny Tompo mba hamerina indray ny ainy. Niaina indray ilay zaza ary nahafantatra ilay vehivavy fa mpaminan’ny Tompo i Elia.