“Jakoba sy Esao,” Tantara ao amin’ny Testamenta Taloha (2022)
“Jakoba sy Esao,” Tantara ao amin’ny Testamenta Taloha
Genesisy 25–27
Jakoba sy Esao
Mpirahalahy sy fizokiana iray
Nanan-janaka kambana Isaka sy i Rebeka, dia i Jakoba sy i Esao. Mpihaza mahay i Esao. I Jakoba kosa niaiana fiainana tsotsotra ary nanaraka ny Tompo.
Esao no teraka voalohany. Ny teraka voalohany matetika no nandray ny tsodranon’ny fizokiana avy amin’ny rainy. Ny fizokiana dia midika fa hitarika ny fianakaviany izy ary hanana tany sy biby betsaka kokoa mba hikakarana ny fianakaviana. Saingy ny tenany no nampiahiahy kokoa an’i Esao fa tsy ny fianakaviany, ary tsy nankatò ny ray aman-dreniny sy ny Tompo izy.
Indray andro dia niverina avy nihaza i Esao. Noana be izy ary nitalaho tamin’i Jakoba mba hanome hanina azy. I Jakoba no tian’ny tompo hahazo ny tsodranon’ny fizokiana satria tsy mendrika izany i Esao. Nangataka an’i Esao hamarotra aminy ny fizokiana amin’ny alalan’ny sakafo vitsivitsy i Jakoba. Nanaiky i Esao ary nivarotra ny fizokiany tamin’i Jakoba.
Genesisy 25:23, 29–34; Hebreo 11:20
Naniry ny soa indrindra ho an’ireo zanany i Rebeka sy Isaka. Nalahelo izy ireo satria mbola nanohy nanao ny zavatra tiany atao i Esao fa tsy izay tian’ny Tompo.
Lasa antitra Isaka ary lasa jamba. Talohan’ny nahafatesany dia nangataka an’i Esao izy mba hihaza sy hahandro biby hohaniny.
Fantatr’i Rebeka fa tonga ny fotoana hanomezan’Isaka ny tsodranon’ny fizokiana.
Nangataka an’i Jakoba mba haka biby anankiroa i Rebeka mba hahafahany mahandro ny sakafo mialohan’ny hahatongavan’i Esao. Amin’izay i Jakoba no handray ny tsodrano.
Niankanjo tahaka an’i Esao i Jakoba ary nitondra ilay sakafo tany amin-drainy. Nomen’Isaka ny tsodranon’ny fizokiana i Jakoba. Rehefa niverina i Esao dia tezitra mafy tamin’i Jakoba izy. Saingy tokony ho an’i Jakoba ny fizokiana satria nitandrina ny didin’ny Tompo izy fa i Esao tsy nanao izany.