«Հեսու մարգարեն», Հին Կտակարանի պատմություններ (2022)
«Հեսու մարգարեն», Հին Կտակարանի պատմություններ
2 Օրինաց 10, 31, 34, Հեսու 1, 3-6, 10-11, 21, 24
Հեսու մարգարեն
Վերջին փորձությունը՝ մինչև խոստացված երկիր մտնելը
Տերը կանչեց Հեսուին՝ լինելու նոր մարգարե Մովսես մարգարեի երկինք վերցվելուց հետո: Մինչ իսրայելացիները ճամբար էին խփել Հորդանան գետի մոտ, Տերն ասաց, որ ժամանակն է, որ նրանք տեղափոխվեն խոստացված երկիր:
Երկրորդ Օրինաց 34․1-9, Հեսու 1․1-4, Ալմա 45․19
Խոստացված երկիրը Քանանում էր, բայց այնտեղ ամբարիշտ մարդիկ էին ապրում: Տերը Հեսուին ասաց, որ ուժեղ և համարձակ լինի։ Տիրոջ օգնությամբ իսրայելացիները կարող էին գրավել Քանանի երկիրը:
Հեսուն զորք հավաքեց: Տերը նրանց ասաց, որ իրենց հետ տանեն տասը պատվիրանների քարե տախտակները և մյուս սուրբ գրությունները: Քահանաներն այս սրբազան իրերը տանում էին մի տուփի մեջ, որը կոչվում էր ուխտի տապանակ: Այնուհետև զորքը պատրաստվեց անցնելու Հորդանան գետը: Գետը խորն էր և արագահոս:
Երկրորդ Օրինաց 10․5, 31․25-26, Հեսու 1․10-11, 3․1-11
Հեսուն իսրայելացիներին խոստացավ, որ Տերը կօգնի նրանց անցնել գետը:
Հեսուն 12 քահանաների խնդրեց վերցնել ուխտի տապանակը և մտնել ջուրը։ Հենց քահանաները գետը մտան, ջուրը բաժանվեց:
Իսրայելացիները գետն անցան ցամաքով: Հեսուն իսրայելացիներին խնդրեց գետի չոր հունից վերցնել 12 քար: Նա քարերը շարեց՝ իսրայելացիներին հիշեցնելու համար այդ օրվա Տիրոջ հրաշքի մասին։
Հեսուն Իսրայելի բանակն առաջնորդեց դեպի Քանանի երկիրը: Նրանք հասան Երիքով կոչվող քաղաքը: Քաղաքը շատ ամուր էր և բարձր պարիսպներ ուներ: Տերը Հեսուին ասաց, թե ինչպես նվաճել Երիքովը: Նա ասաց, որ իսրայելացիները պետք է վեց օր շարունակ շրջեն Երիքովի շուրջը: Հեսուն հնազանդվեց Տիրոջը:
Հեսուն քահանաներին ասաց, որ ուխտի տապանակը տանեն իսրայելացիների առաջից։ Ամեն օր բանակը շրջում էր Երիքովի շուրջը, և յոթ քահանաներ փչում էին իրենց փողերը։ Մյուս բոլոր իսրայելացիները լուռ էին։
Յոթերորդ օրը բանակը յոթ անգամ արշավեց Երիքովի շուրջը: Երբ քահանաները փչում էին իրենց փողերը, Հեսուն իսրայելացիներին ասաց, որ բարձր աղաղակեն։ Հանկարծ Երիքովի պարիսպները վայր ընկան, և Հեսուի զորքը գրավեց քաղաքը:
Տերն օգնեց իսրայելացիներին, ինչպես և խոստացել էր: Հեսուի զորքը շարունակեց նվաճել քանանացիների երկիրը, և իսրայելացիները սկսեցին ապրել այնտեղ: Հեսուն հիշեցրեց նրանց Տիրոջ հրաշքների ու խոստումների մասին: Նա խնդրեց իսրայելացիներին ծառայել Տիրոջը: