Aperaamo
O le atalii o Tara, na fanau i Uro i Kaletaia (Kene. 11:26, 31; 17:5). O se perofeta a le Alii ma lē na osi i ai ni feagaiga faavavau e le Alii e faamanuiaina ai atunuu uma o le lalolagi. O Aperaamo sa igoa muamua ia Aperamo.
O le tusi a Aperaamo
O talafaamaumau anamua na tusia e Aperaamo lea na oo mai i lima o le Ekalesia i le 1835. O talafaamaumau ma ni isi o mami na maua i tuugamau o Aikupito e Antonio Lebolo, o lē na tuuina atu ia mea ia Michael Chandler. Sa faaali e Chandler ia mea i le Iunaite Setete i le 1835. O ni isi o uo a Iosefa Samita na faatauina ia mea mai ia Chandler ma sa tuuina atu ai ia mea i le Perofeta, o lē na faaliliuina ia mea. O ni isi o nei talafaamaumau o loo maua nei i le Penina Tau Tele.
O le mataupu 1 o loo faamaumauina ai mea na faia e Aperaamo i Uro i Kaletaia, o le nuu lea na taumafai ai faitaulaga amioleaga e osi le taulaga ia te ia. O le mataupu 2 o loo faamatala mai ai ana malaga i Kanana. Na faaali mai ai le Alii ia te ia ma sa osia ni feagaiga ma ia. O le mataupu 3 o loo faamaumau ai le vaai o Aperaamo i le iunivesi ma sa ia iloa ai le sootaga o tino faalelagi. Mataupu 4–5 o le isi lea tala e uiga i le Foafoaga.
O le fanau a Aperaamo
O tagata o e, e ala i le usiusitai i tulafono ma sauniga o le talalelei a Iesu Keriso, e maua folafolaga ma feagaiga na faia e le Atua ia Aperaamo. E mafai e alii ma tamaitai ona maua nei faamanuiaga pe afai o i latou o ni e tupuga moni mai i le gafa o Aperaamo pe avea i latou o ni tamafai i lona aiga e ala i le taliaina o le talalelei ma le papatisoga (Kala. 3:26–29; 4:1–7; MF&F 84:33–34; 103:17; 132:30–32; Ape. 2:9–11). E mafai e fanau moni a Aperaamo ona le maua o latou faamanuiaga e ala i le lē usiusitai (Roma 4:13; 9:6–8).