Fale Fetafai

O se maota o le Alii, o le nofoaga tutotonu o le tapuaiga a Isaraelu i le taimi o le esoto mai Aikupito. O le fale fetafai o se malumalu e mafai ona fesiitai ma e mafai foi ona talai ma toe faatuina. Sa faaaogaina e le fanau a Isaraelu se fale fetafai seia oo ina latou fausia le malumalu o Solomona (MF&F 124:38).

Na faaali e le Atua le fua o le malumalu ia Mose (Esoto 26–27), ma sa fausia ai e le fanau a Isaraelu le malumalu e tusa ma lena fua (Esoto 35–40). Ina ua maeʼa le fale fetafai, sa ufitia i se ao le faleie, ma sa faatumuina i le mamalu o le Alii le fale fetafai (Esoto 40:33–34). O le ao o se faailoga o le faatasi mai o le Atua. O le po, sa foliga mai ai le ao o se afi. Ina ua toʼa le ao i luga o le faleie, ona tolauapi ai lea o le fanau a Isaraelu. Ina ua alu le ao, ona latou ō lea faatasi ma le ao (Esoto 40:36–38; Numera 9:17–18). Sa aveina e le fanau a Isaraelu le fale fetafai faatasi ma i latou aso o la latou taamilosaga i le toafa ma aso o lo latou manumālō i le laueleele o Kanana. Ina ua mavae lena manumālō, ona ave lea o le fale fetafai i Sailo, o le nofoaga na filifilia e le Alii (Iosua 18:1). Ina ua uma ona fausia e le fanau a Isaraelu le malumalu o Solomona, ona mou ai lea o le fale fetafai mai le talafaasolopito.

Sa faaaogaina e le Alii ma Isaia le faleie po o le fale fetafai e avea o se faatusa o aai o Siona ma Ierusalema i le taimi o le afio faalua mai o le Alii (Isai. 33:20; Mose 7:62).