Feagaiga Tuai

O tusitusiga a perofeta anamua o e sa galulue i lalo o le uunaiga a le Agaga Paia ma e foi sa molimau mai i le tele o senituri e uiga ia Keriso ma lana misiona i le lumanai. O loo i ai foi i lea tusi se talafaamaumau o le talafaasolopito o Aperaamo ma e e tupuga mai ia te ia, e amata mai ia Aperaamo, ma le feagaiga po o le molimau, na faia e le Alii ma Aperaamo ma ana fanau.

O tusi muamua e lima o le Feagaiga Tuai sa tusia e Mose. O tusi ia o le Kenese, Esoto, Levitiko, Numera, ma le Teuteronome. O le Kenese e faatatau lea i le amataga o le lalolagi, tagata, gagana, ituaiga, ma le amataga o le aiga o Isaraelu.

O tusi o le talafaasolopito ua faamatala mai ai mea na tutupu ia Isaraelu. O tusi ia o le Iosua, Faamasino, Ruta, 1 ma le 2 Samuelu, 1 ma le 2 Tupu, 1 ma le 2 Nofoaiga a Tupu, Esera, Neemia, ma Eseta.

O nisi o tusi o solo o loo tusia ai le poto ma tala a perofeta. O tusi ia e aofia ai le Iopu, Salamo, Faataoto, Failauga, Pese a Solomona, ma le Auega.

Sa lapataia Isaraelu e perofeta e uiga i a latou agasala ma sa molimau atu e uiga i faamanuiaga e oo mai i le usiusitai. Sa latou molimau atu e uiga i le oo mai o Keriso, o lē e togiola mo agasala a i latou o e salamo, maua sauniga, ma ola i le talalelei. O tusi a perofeta e aofia ai le Isaia, Ieremia, Esekielu, Tanielu, Hosea, Ioelu, Amosa, Opetaia, Iona, Mika, Nauma, Sapakuka, Sefanaia, Hakai, Sakaria, ma Malaki.

O le tele o tusi o le Feagaiga Tuai sa tusia i le Faa-Eperu. E itiiti ni tusitusiga o loo i ai i le Faa-Alamaika, o se gagana e tai uiga tasi ma le Faa-Eperu.