Sētane. Ko e tēvoló ʻa e fili ʻo e māʻoniʻoní pea mo kinautolu ʻoku nau feinga ke fai ʻa e finangalo ʻo e ʻOtuá. Ko e foha fakalaumālie moʻoni ia ʻo e ʻOtuá pea naʻá ne hoko ʻi ha taimi ʻe taha ko ha ʻāngelo pule ʻi he ʻao ʻo e ʻOtuá (ʻĪsaia 14:12; 2 Nīfai 2:17). Ka neongo iá, naʻá ne angatuʻu ʻi he moʻui ʻi he maama fakalaumālié ʻo ne fakalotoʻi ha vahetolu ʻe taha ʻo e fānau fakalaumālie ʻa e Tamaí ke nau angatuʻu kiate ia (T&F 29:36; Mōsese 4:1–4; ʻĒpa. 3:27–28). Naʻe kapusi hifo ʻa kinautolu mei he langí, pea naʻe taʻofi meiate kinautolu ʻa e faingamālie ke nau maʻu ha sino fakamatelie mo moʻui ʻi he moʻui fakamatelié, pea te nau malaʻia ʻo taʻengata. Talu mei he taimi naʻe kapusi hifo ai ʻa e tēvoló mei he langí, mo ʻene feinga maʻu pē ke kākaaʻi ʻa e tangata mo e fefine kotoa pē ʻo tohoakiʻi atu ʻa kinautolu mei he ngāue ʻa e ʻOtuá koeʻuhí ke ne ngaohi ai ʻa e faʻahinga ʻo e tangatá ke nau mamahi ʻo hangē pē ko iá (Fakahā 12:9; 2 Nīfai 2:27; 9:8–9).
Ko e siasi ʻo e tēvoló
Ko e kautaha kovi mo fakamāmani kotoa pē ʻi he māmaní ʻa ia ʻoku nau liliu fakakeheʻi ʻa e ongoongolelei maʻa mo haohaoá pea tauʻi ʻa e Lami ʻa e ʻOtuá.